БЭЭЖИН: Ши Жиньпин дарга НҮБ-ын ерөнхий нарийн бичгийн дарга Гутерриштэй утсаар ярьжээ
- schedule 2020 оны 3 сарын 13
- chat_bubble 0
БЭЭЖИН: Хятад улсын дарга Ши Жиньпин НҮБ-ын ерөнхий нарийн бичгийн дарга Гутерриштэй 03-р сарын 12-нд утсаар ярилаа.
Ши Жиньпин дарга:
- “COVID-19” гарсны дараа ерөнхий нарийн бичгийн дарга та надад захидал илгээж, анхааран халамжилж, Хятадын талын авсан сэргийлэн хамгаалах арга хэмжээг идэвхтэй үнэлж, олон удаа илээр үг хэлж тахал өвчинтэй тэмцэж буй хүчин чармайлтыг дэмжиж буйгаа илэрхийлсэн юм. Зовох цагт нөхрийн чанар танигдана гэж үг бий. Бид танд талархаж байна. Хатуужилтай хичээл зүтгэлээр халдварт өвчний Хятадын дотоодын байдалд сайн хандлага гарч, үйлдвэрлэл амьдралын дэг журам хурдтайгаар сэргэж байна. Дараагийн алхамд бид халдвараас сэргийлэн хамгаалах ажлаа цаашид эрчимжүүлж, шуурхай бодитой, нухацтай арга хэмжээ хэрэгжүүлэх болно. Үүний хамт эдийн засаг нийгмийн хөгжлийн олон төрлийн ажилд шуурхайлна. Хятадын ард түмэн "КОВИД-19"-ийг ялан давах нь дамжиггүй. Мөн эдийн засаг нийгмийн хөгжлийн товлосон зорилтоо лавтай биелүүлэх болно. Үүнд бид огт эргэлзэхгүй байна гэж хэллээ.
Дарга Ши Жиньпин мөн "Хятадын ард түмний шаргуу хөдөлмөр дэлхийн улс орнуудад үнэ цэнтэй цаг хугацаа гаргаж, тархахаас урьдчилан сэргийлэх, хянах ажилд чухал хувь нэмэр орууллаа. Энэ хугацаанд олон улс оронд тахал тархаж, байдал түгшүүртэй байна. Олон улсын хамтын нийгэмлэг үйл ажиллагаагаа ахиулж, хамтарсан урьдчилан сэргийлэх, хяналт тавих чиглэлээр олон улсын хамтын ажиллагааг үр дүнтэй хэрэгжүүлж, тархалтыг даван туулах хүчирхэг хамтарсан хүчин байгуулах хэрэгтэй. Хятад улс урьдчилан сэргийлэх, хянах чиглэлээр туршлагаа холбогдох улс орнуудтай хуваалцах, эм, вакциныг хамтарсан судалгаа хийх, тахал гарч байгаа зарим оронд өөрийн хүчин чадлын хүрээнд тусламж үзүүлэхэд бэлэн байна. Хятад улс НҮБ, ДЭМБ-ыг олон улсын хамтын нийгэмлэгийг бодлогын уялдаа холбоог бэхжүүлэх, хөрөнгө оруулалтыг нэмэгдүүлэхэд дэмжлэг үзүүлэх, ялангуяа олон нийтийн эрүүл мэндийн тогтолцоо сул хөгжиж буй орнуудад туслахыг дэмжиж байна. Хятад улс ДЭМБ-д 20 сая долларын хандив өгөхөөр зарлаад байна" гэж хэлэв.
Дарга Ши Жиньпин:
- “COVID-19”-ын халдвар нь хүн төрөлхтөн бол хувь тавилангийн хамтын нийгэмлэг болохыг дахин харуулж байна. Эдийн засгийн даяаршлын эрин үед ийм томоохон онцгой байдал сүүлийнх биш бөгөөд аюулгүй байдлын уламжлалт болон уламжлалт бус янз бүрийн асуудлууд шинэ сорилтуудыг үргэлжлүүлэн авчрах болно. Олон улсын хамтын нийгэмлэг нь хүн төрөлхтний ирээдүйн төлөө хамт олны талаархи ойлголтыг бий болгож, бие биендээ тусалж, эрсдэл, бэрхшээлийг даван туулахын тулд хамтдаа ажиллах ёстой. Энэ жил НҮБ байгуулагдсаны 75 жилийн ой тохиож байна. Бид НҮБ-д төвлөрсөн дэлхийн засаглалын тогтолцоог бэхжүүлэх, сайжруулах хэрэгтэй. Хятад улс НҮБ-ын ажлыг үргэлжлүүлэн дэмжинэ гэж онцоллоо.
Гутерриш: - Хятадын “COVID-19” халдвар ихээр буурсанд маш их баярлаж, баяр хүргэж байна. Хэлбэрэлтгүй шийдвэр зориг болон хүчирхэг тэмцлээр Хятад улс халдварыг удахгүй даван туулахаар барахгүй эдийн засгийн дэг журмаа ч түргэн сэргээнэ гэдэгт итгэж байна. Энэ нь Хятадын ард түмэнд төдийгүй дэлхий дахинд хийж буй томоохон хувь нэмэр юм. НҮБ Хятадын талын хүндрэл бэрхшээлтэй орнуудад туслан халдварт өвчинтэй тэмцэж буйд талархаж, Хятад улс хөгжиж буй орнуудтай урьдчилан сэргийлэх тогтоон барих туршлагаа хуваалцаж, эм эмнэлгийн эд бараа болон вакцин эм бэлдмэлээр тусалж буйг сайшааж байна. Хятадын дэмжлэг олон талт үзэлд туйлын чухал юм. НҮБ Хятад улстай цаг уурын өөрчлөлт, тогтвортой хөгжлийн олон салбарын хамтын ажиллагаагаа цаашид үргэлжлүүлэхийг хүсэж байна. Хятад улс олон улсын үйл хэрэгт улам чухал удирдах үүрэг гүйцэтгэхийг хүсэн хүлээж байна гэж хэллээ.
Найруулагч:С.САРАНЧИМЭГ
Эх сурвалж:www.xinhuanet.com
Санал болгох
Сонин хачин
Уншиж байна ...