ЦАГ АГААРЫН 10 ХОНОГИЙН УРЬДЧИЛСАН ТӨЛӨВ БАЙДАЛ НАЛАЙХ, ЭМЭЭЛТИЙН ПОСТЫГ 2027 ОНД ШИЛЖҮҮЛНЭ ХХБ-НЫ ЦАХИМ БАНКНЫ TDB ONLINE АППЛИКЕЙШН ШИНЭЧЛЭГДЭЖ, TDB АПП НЭРТЭЙ БОЛЖЭЭ УИХ ДАХЬ АН-ЫН БҮЛГИЙН АЖЛЫН АЛБАНЫ ДАРГААР Б.ТӨРМӨНХИЙГ ТОМИЛЖЭЭ “ШИНЭ ХОВД” ҮЙЛДВЭРЛЭЛ, ТЕХНОЛОГИЙН ПАРКТ 100 ГАРУЙ АЖ АХУЙН НЭГЖ ҮЙЛДВЭР БАЙГУУЛАХ ХҮСЭЛТ ИРҮҮЛЖЭЭ

ЭРДЭНЭБҮРЭНГИЙН УЦС-ЫН БҮТЭЭН БАЙГУУЛАЛТАД ТУЛГАРСАН АСУУДЛЫГ ШУУРХАЙ ШИЙДВЭРЛЭНЭ

57 минутын өмнө
0

Ховд аймгийн Эрдэнэбүрэн сумын нутаг, Ховд голын Шижигтийн хавцалд хэрэгжиж буй усан цахилгаан станцын барилга угсралтын ажил 2025 оны долоодугаар сард эхэлсэн бөгөөд 2026 оны аравдугаар сарын байдлаар 40 гаруй хувийн гүйцэтгэлтэй үргэлжилж байна.

Баруун бүсийн эрчим хүчний хангамжийг нэмэгдүүлэх стратегийн ач холбогдолтой Эрдэнэбүрэнгийн усан цахилгаан станцын бүтээн байгуулалтыг эрчимжүүлж, тулгамдсан асуудлыг шуурхай шийдвэрлэхээр Засгийн газраас ажиллаж байна.

Ерөнхий сайд Н.Учрал төслийн талбайд ажиллаж, барилга угсралтын явцтай танилцан, холбогдох байгууллагуудад шаардлагатай арга хэмжээг шуурхай авч хэрэгжүүлэх чиглэл өглөө.

Төслийн талбайд дотоод, гадаадын 600 гаруй хүн ажиллаж байгаа бөгөөд станцыг 2030 онд ашиглалтад оруулахаар төлөвлөжээ. Бүтээн байгуулалтыг саадгүй үргэлжлүүлэхэд түр горимоор оруулж ирсэн тоног төхөөрөмж, техник хэрэгслийн Монгол Улсын нутаг дэвсгэрт байх хугацааг сунгах, гаалийн баталгаат агуулахын зөвшөөрөлтэй холбоотой асуудлыг шийдвэрлэх шаардлагатай байгааг төслийн багийнхан танилцуулсан байна.

Ерөнхий сайд холбогдох яам, агентлаг, орон нутгийн удирдлага болон захиалагч, гүйцэтгэгч байгууллагуудын хамтын ажиллагааг сайжруулж, тулгамдсан асуудлыг шуурхай шийдвэрлэхийг үүрэг болголоо. Мөн барилга угсралтын чанар, тоног төхөөрөмжийн нийлүүлэлт, хөдөлмөрийн аюулгүй байдалд тогтмол хяналт тавьж ажиллахыг анхааруулсан байна.

90 мегаваттын суурилагдсан хүчин чадалтайгаар төлөвлөгдсөн Эрдэнэбүрэнгийн усан цахилгаан станц ашиглалтад орсноор жилд дунджаар 366.8 сая киловатт.цаг цахилгаан эрчим хүч үйлдвэрлэх боломжтой. Ингэснээр баруун бүсийн эрчим хүчний хангамжийг бэхжүүлж, импортын хамаарлыг бууруулахын зэрэгцээ усалгаатай газар тариалан, үйлдвэрлэл, аялал жуулчлалыг хөгжүүлэх нөхцөл бүрдэх юм.

Төслийг хэрэгжүүлэхдээ байгаль орчны хамгаалал, усны нөөцийн зохистой ашиглалт, орон нутгийн иргэдийн эрх ашгийг нэн тэргүүнд тавьж, бүтээн байгуулалттай холбоотой мэдээллийг ил тод хүргэх шаардлагатайг Ерөнхий сайд онцоллоо.