ЗАМ, ТЭЭВРИЙН САЙДЫН ШУУРХАЙ ХУРАЛДААН БОЛЛОО

Зам, тээврийн сайдын шуурхай хуралдаан өнөөдөр (2025.11.24) боллоо. Хурлын эхэнд Зам, тээврийн сайд Б.Дэлгэрсайхан хүйтний эрч чангарч байгаатай холбогдуулан  салбар тус бүр өвөлжилтийн бэлтгэл ажлын гүйцэтгэлд дахин хяналт тавьж ажиллах, цаг агаарын нөхцөл байдалтай холбогдуулан гэнэтийн болзошгүй эрсдлээс урьдчилан сэргийлж ажиллахыг онцгойлон анхаарууллаа.

Мөн ойрын өдрүүдэд цастай, цасан шуургатай байгаа учраас орон нутгийн замд халтиргаа гулгаа үүсэх, зам даваа хаагдах эрсдэл өндөр байгаа  тул автозам, агаарын тээвэр, автотээврийн салбарын цаг үеийн мэдээллийг орон нутаг дахь шуурхай штабаас салбарын сайд руу яаралтай ирүүлж, хариуцлагатай ажиллахыг газрын дарга нарт дахин сануулав.  

Хоёрдугаарт, 2025 оны 11 дүгээр сарын 17-18-ны өдрүүдэд Монгол Улсын Ерөнхий сайд Г.Занданшатар ОХУ-ын Москва хотноо ШХАБ-ын гишүүн орнуудын Засгийн газрын тэргүүн нарын зөвлөлийн өргөтгөсөн хуралдаанд оролцоод ирсэн. Айлчлалын бүрэлдэхүүнд Зам, тээврийн сайдаар ахлуулсан томилолтын баг өргөн бүрэлдэхүүнтэй оролцоод ирсэн. Албан уулзалтын хүрээнд хийх бэлтгэл ажил их байгааг онцлоод, газрын дарга нарыг ажлаа эрчимжүүлэхыг үүрэг болголоо.  “Улаанбаатар төмөр зам” ХНН-ийн Тээвэрлэлт, хөдөлгөөн хариуцсан замын орлогч дарга Д.Амарбаясгаланд тодорхой чиглэлүүдийг хэлж, ажлаа яаравчлахыг үүрэг болгов.

Мөн ОХУ-д хийсэн албан уулзалтуудын үр дүнг өнөөдрийн Засгийн газрын хуралдаанд танилцуулж,  олон нийтэд мэдээлэл хүргэж ажиллах талаар танилцууллаа.  

Гуравдугаарт, салбарын сайдын зүгээс маргааш буюу 2025 оны 11 дүгээр сарын 25-нд "Монголын төмөр зам" ТӨХК-ийн Багахангай-Хөшигийн хөндий чиглэлийн салбар төмөр замын төслийн барилгын ажил гүйцэтгэж буй   ААН, компаниудын төлөөллийг хүлээн авч уулзана, эхний санхүүжилтийг олгох болсонтой холбогдуулан албан уулзалтыг хийж, санал солилцоно гэв.

Шуурхай хуралд харьяа газрын дарга нар 98 хувийн ирцтэй хамрагдаж, салбар тус бүр төлөвлөгөөт ажлын явц, тулгамдаж буй зарим асуудлаа танилцууллаа. Салбарын сайд хуралдаанд танилцуулсан ажлуудыг хэлэлцээд, агаарын тээвэр, авто зам, авто тээвэр, төмөр замын салбарт  анхаарах шаардлагатай чухал ажлуудыг тодотгож, үүрэг чиглэл өглөө. Хуралдааны төгсгөлд, газрын дарга нарыг төрийн ажлыг хүлээгдэл чирэгдэлгүй шуурхай явуулах, албан бичгийн хүлээгдэл чирэгдлийг бууруулах, ажлаа эрчимжүүлж ажиллахыг үүрэг болгов.  

Цаг агаарын нөхцөл байдалтай холбогдуулан онгоцны нислэгийн цаг хоцрох саатах, орон нутгийн замд осол аваар гарах зэрэг гэнэтийн болзошгүй эрсдлээс урьдчилан сэргийлж ажиллахыг онцгойлон анхааруулав.