Ц.Алдармаа Д.Оюунтуулд ойролцоогоор 30 сая төгрөгийн хохирол учруулж 7 жилийн хорих ял авлаа

        Сүүлийн хагас жилийн хугацаанд олны анхаарлыг татаж, хэрхэн шийдэгдэх нь хүлээлт үүсгээд байсан сэдвийн нэг бол яах аргагүй “Шинэ үе"-ийн жүжигчин бүсгүйчүүдийн шүүх хурал. Өнгөрсөн дөрөвдүгээр сарын 28-ны өдөр Эрдэнэт хотод тоглолтоор явж байсан “Шинэ үе” продакшны жүжигчин Ц.Алдармаа, Д.Оюунтуул нар согтууруулах ундаа хэрэглэсэн үедээ маргалдан бие биенээ буцлам халуун усаар түлж шуугиан дэгдээсэн.  Ц.Алдармаа “Гурван гал” эмнэлэгт эмчилгээ хийлгэн удалгүй эдгэрсэн бол Д.Оюунтуулын хувьд удаан хугацаагаар эмчилгээ хийлгэж, өнөөдрийн байдлаар Нэгдсэн гуравдугаар эмнэлэгийн дотрын тасагт хэвтэн эмчлүүлж байгаа. Д.Оюунтуул Ц.Алдармаад 1.750.000 төгрөгийн хохирол учруулсан гэж байгаа бол Ц.Алдармаа Д.Оюунтуулд ойролцоогоор 30 сая төгрөгийн хохирлыг учруулсан гэж тэдний өмгөөлөгчид мэдэгдсэн юм.

Хоёр ч удаа хойшилсон шүүх хурал өчигдөр дүүргийн эрүүгийн хэргийн II шүүхэд боллоо. Нэг үгээр хэлбэл анхан шатны шүүх хурлын тогтоол гарсан юм. Шүүх хурлын танхимд Д.Оюунтуул, Ц.Алдармаа болоод тэдний гэр бүлийнхэн, “Шинэ үе” продакшныхан ирсэн байлаа. Гэвч өглөө эхэлсэн шүүх хурал өдрийн 14 цаг хүртэл хойшилж товолсон цагаасаа нэг цагийн дараа эхэлсэн. Хурал эхлэхээс өмнө шүүгдэгчид өөрсдийн өмгөөлөгч нараас зөвлөгөө авч, огт айж сандарсан зүйлгүй байсан ч  шүүх хурал эхлэхэд жүжигчин Ц.Алдармаа нулимс дуслуулан зогсож байгаа харагдсан. Шүүх хурал нээлттэй эхэлсэн хэдий ч жүжигчин Ц.Алдармаагийн өмгөөлөгч “Цөөнгүй хүний хувийн нууц, нэр хүнд болоод эрүүл мэндтэй холбоотой зүйлс яригдах учраас шүүх хурлыг цаашид хаалттай үргэлжлүүлье” гэсэн хүсэлт гаргасан. Энэ хэрэг "Шинэ үе"-ийн дотоод асуудалтай холбоотой тул олон нийтэд дэлгэхээс зайлсхийсэн юм. Ингээд шүүх хурал 10 минут завсарлаж шүүгч нар хоёр талын өмгөөлөгч нарын хүсэлтийг хэлэлцэж үзээд цаашид шүүх хурал хаалттай үргэлжилсэн.

Энэ үеэр шүүгдэгч нарын ар гэрийнхэн болоод ажлын хамт олон хаалттай хаалганы гадна хүлээж, адилхан эмэгтэй хүмүүс хэн хэнд нь хөнгөн шийдвэр гаргаасай хэмээн бодож суугаагаа ч нуугаагүй юм. “Шинэ үе” продакшны захирал Ариуболд, жүжигчин Ундармаа, Сөрөлт, Ганбаяр, Отгонтуяа, Билгүүн нар ирсэн бөгөөд жүжигчин Ганбаяр урьд нь уг хэргийн гэрчээр оролцож байсан юм. Харин өчигдрийн тухайд тэд энэ талаар ам нээхээс татгалзсан юм.

Таван цаг гаруй үргэлжилсэн шүүх хурал оройн 19 цагийн орчимд өндөрлөж шүүхийн шийдвэр гарахад Ц.Алдармаад эрүүгийн хуулийн 96.2.6-д зааснаар бусдын биед онц хэрцгий аргаар санаатайгаар гэмтэл учруулсан гэдэг үндэслэлээр 7 жил 10 хоногийн ял оноосон бол жүжигчин Д.Оюунтуулд  хөдөлмөрийн хөлсний доод хэмжээг долоо дахин нэмэгдүүлсэнтэй тэнцэх 1.350.000 төгрөгийн торгууль ногдууллаа. Шүүх хурлын дараагаар шүүгдэгчидийн аль аль нь сэтгэгдлээ хуваалцахыг хүсээгүй юм.

Харин Ц.Алдармаагийн өмгөөлөгч Б.Дашдорж, Н.Мандах нар “Бидний зүгээс  энэхүү хурлаар хэргийг нэмэлт мөрдөн байцаалтанд шилжүүлэх саналтайгаар орсон боловч харамсалтай нь шүүгчид хүлээж авсангүй. Гэхдээ нотлох баримтуудыг судлаад үзэхэд шүүхийн шийдвэр урьдчилан гарсан байна гэдгийг хоёр өмгөөлөгч ойлгосон. Өөрөөр хэлбэл шүүгч өөрийнхөө шийтгэх тогтоолоо шинээр гаргасан нотлох баримтуудыг өмгөөлөгч нарт танилцуулах үед гаргасан байсан гэж ойлгож байна” хэмээн өөрсдийн байр сууриа илэрхийлсэн юм. Мөн тэрээр хуулинд заасны дагуу 14 хоногийн дотор дараа дараагийн давж заалдах шатны шүүхэд хандана гэдгээ хэлсэн. Шүүх хурлын дүгнэлт гарсны дараа Ц.Алдармааг хуулийн дагуу хорих анги руу авч явсан юм.

Шүүхийн шийдвэр түүний өмгөөлөгч болоод гэр бүлийнхэнд нь хүндхэн туссан. Ингээд  19.30 цагийн үед Тахарын албаныхан шүүхийн байрнаас яллагдагч Ц.Алдармааг Цагдан хорих 461 дүгээр анги руу тоноглол бүхий машинаар авч явлаа.  Ар гэрийнхэн нь Ц.Алдармаад дулаан хувцас өгөхийг хүссэн ч ажлын цаг тдуусан учраас боломжгүй гэдэг хариуг өгчээ. Ингээд нэгэн үе тайз дэлгэцийн бүтээлд дүрээ мөнхлөн байсан жүжигчин бүсгүй ял авч өмссөн хувцастайгаа хорих ангируу ачигдлаа.

 Д.Оюунтуул нь 1979 онд төрсөн, 35 настай. Харин Ц.Алдармаа 1985 онд төрсөн, 29 настай юм. Ид хийж бүтээх насан дээрээ яваа, удаан хугацаанд хамт ажиллаж эгч дүүс болтлоо нөхөрлөсөн хоёр залуухан бүсгүй сархадын балгаар бие биерүүгээ элдэв үг шидэлцэн эцэст нь нэгнийгээ торны цаана суулгахаар болоод байна. Хар усны балаг гэдэг хэнийг ч алдаа гаргахад “дэм” болдог нь жүжигчин бүсгүйчүүдийг ч мөн тойроогүй дайраад өнгөрлөө. Гэхдээ давж заалдах шатны шүүхэд хандана гэдгээ мэдэгдсэн болохоор энэ хэрэг өөрөөр шийдэгдэх байх гэж найдах хүн олон байна.

Эх сурвалж: WWW.ZINDAA.MN