Элчин сайд Цай Вэньруй: Монголын ард түмэнд баярлалаа

Өмнөд хөрш БНХАУ-д коронавирусийн халдвар тархаж, дэлхий нийтийн анхаарал татах асуудал болоод байгаа. Хөрш зэргэлдээ Монгол Улсын хувьд ч одоогоор коронавирусийн халдвар албан ёсоор бүртгэгдээгүй байгаа ч ДЭМБ-аас онцгой анхаарах бүс хэмээн зарлаж, Монгол Улс хилээр зорчих хөдөлгөөнийг хааж, олон нийтийн арга хэмжээг хориглоод байгаа. Хэдий тийм ч хөрш улсад хүндрэлтэй нөхцөл байдал үүсээд байгаа хүнд үед монголчууд БНХАУ-ын ард түмэнд туслах хөдөлгөөн өрнүүлж эхлээд байна. Тухайлбал, МҮХАҮТ бизнес эрхлэгчдээ уриалан БНХАУ-д коронавирусний халдварт өвчинтэй тэмцэхэд дэмжлэг үзүүлэхээр хандивын аян эхлүүлээд буй. Энэхүү уриалгад бизнесмэнүүд нэгдэн одоогоор  цуглараад байгаа эхний 140 сая төгрөгийг БНХАУ-аас Монгол Улсад суугаа ЭСЯ-нд гардуулан өглөө.

Аяны хүрээнд МҮХАҮТ 25 сая төгрөг, МҮХАҮТ-ийн дэргэдэх Монгол-Хятадын бизнесийн зөвлөл 5 сая төгрөг, Лава Лийжюр ХХК 10 сая төгрөг, Талын Хишиг Майнинг ХХК 100 сая төгрөг тус тус хандивлалаа. МҮХАҮТ-ийн гишүүн байгууллагууд болон бизнес эрхлэгчдээс БНХАУ-д тусламж, дэмжлэг үзүүлэх санаачилга цөөнгүй гарч байгаа бөгөөд аян цаашид үргэлжлэх юм.

Ийнхүү хөрш Монголын ард түмэн, бизнес эрхлэгчид тусламжийн гараа сунгаж байгаад БНХАУ-аас Монгол Улсад суугаа Онц бөгөөд Бүрэн Эрхт Элчин сайд Цай Вэньруй туйлын их баяртай байгааг илэрхийлээд хувиасаа болон Элчин Сайдын яамны зүгээс туйлын их баярлаж байгаагаа илэрхийллээ.

БНХАУ-аас Монгол Улсад суугаа Онц бөгөөд Бүрэн Эрхт Элчин сайд Цай Вэньруй: 

        -Айл хүний амь нэг, саахалт хүний санаа нэг гэдгээр биднийг зовох цагт Монголын төр засаг, олон нийтийн байгууллага, бизнесийн хүрээнийхэн, хувь хүмүүүс биднийг ойлгож, дэмжиж, маш их сэтгэлийн дэм үзүүллээ.  Бидэнтэй мөр зэрэгцэн зогсч хамтран тэмцэхээ илэрхийлсэн байна. Энэ нь биднийг маш их зоригжуулж байна. Бидэнд маш их тус дэм болж байна. Хятадын ард түмнийг маш их зоригжуулж байна.   

Сүүлийн үед Хятадын сошиалаар Монголын ард түмэнд талархах, магтах пост мянга, мянгаар бичигдэж байна. Монголын ард түмнийг аюул зовлонгоос хол байгаарай гэж хүсч байна, Монголд нэг ч тохиолдол  гарахгүй байхыг ерөөсөн пост их байна. Өвчин гарсан нь маш муухай хэрэг боллоо. Харин энэ өвчнийг дарахад хоёр ард түмэн хамтран ажиллаж, бие биенээ ойлгож байна, ард түмний ойлголцоо харилцаа, сэтгэл маш их ойр болж байна. Энэ нь бидний хоорондын харилцаа, ард түмний сэтгэл санааны ойлголцол ямар өндөр төвшинд хүрснийг харуулж байна.  

Энэ бүхэн Хятад Монголын харилцааны чиглэлээр ажилладаг биднийг маш их зоригжуулж байна. Бид Хятад Монгол хоёр улсын сайн хөршийн найрсаг харилцаа, хамтын ажиллагаа, ард түмний найрамдлыг улам хөгжүүлэхэд зоригжуулж байна.  

Энд ажиллаж байгаа миний бие, манай Элчин сайдын яамны хамт олон шургуу ажиллаж, Монголын ард түмний сэтгэлийг хариулах болно.  

Сэтгэлийн дэм бол маш их хэрэгтэй, маш том дэмжлэг. Монголын ард түмэн өөрсдөө тийм ч их баян биш байхад биднийг маш их дэмжиж, бидэнд их хэмжээний мөнгө, эмнэлгийн хэрэгсэл, материалаар дэмжиж байгаа нь Монголын ард түмэн ямар их сайн санаатай ард түмэн бэ гэдгийг бүрэн дүүрэн харуулж байна. Бид ёстой их талархаж байна.

        -Монгол эмч нар өвчний голомт Ухань хотод очиж ажиллах хүсэлтэй байгаагаа илэрхийлсэн. Ийм боломж бий юу?

        -Сошиалд ийм мэдээ байхыг харсан. Монголын эмч нар ийм ухамсартай, ийм сайхан санаатай байгааг харахад сэтгэл их хөдөлж байна. Харин миний мэдэж байгаагаар олон улсын нэг ч баг Хятадад ажиллаагүй байгаа.

        -БНХАУ-д нөхцөл байдал ямар байна вэ? Та энэ талаарх мэдээллээ бидэнтэй хуваалцаач?

        -Нөхцөл байдал хүндхэн байна. Хятадад өвчний нөхцөл байдал хүнд байгаа. Гэвч сүүлийн өдрүүдэд нас баралт буурч, эдгэрсэн хүний тоо хурдацтай нэмэгдэж, халдварт өвчинтэй тэмцэх ажил үр дүнгээ өгч байна. Энэ өвчин гарангуут манай улс маш өндөр  анхаарал хандуулж, шинэ төрлийн халдварт өвчинтэй тэмцэх ажлыг манай улсын дарга Си Жиньпин өөрөө командалж, Ерөнхий сайд ажлын хэсгийг тэргүүлж, Хятад улсын хэмжээнд өвчнийг хяналтад авах системийг богино хугацаанд бий болголоо. Ингэж анхаарал тавьснаар бусад улсад тархах явдлыг сааруулж байна. Одоогоор бусад улсад ердөө 1 хувийн тархалт байна. Энэ нь манай улсын авсан арга хэмжээ үр дүнгээ үзүүлж байна гэдгийг харуулж байна.

        Үүний зэрэгцээ Хятад улс бусад улсад коронавирусийн халдвар тарахаас сэргийлэн авч буй арга хэмжээг олон улсын байгууллага болон ДЭМБ-аас өндрөөр үнэлсэн. Хүн төрөлхтөний өмнө өөрийн хүлээсэн үүрэг, хариуцлагаа биелүүлсэн гэж үзэж байна. Энэ өвчинтэй тэмцэхэд олон улсад үлгэр жишээ үзүүлж байна.  Хятад улс энэ өвчнийг бүрэн дарж чадна гэдэгт итгэл төгс байна гэдгийг илэрхийлсэн. Мөн энэ өвчнийг дарахад олон улсын зүгээс Хятад улсыг дэмжихийг уриалсан. Мөн Хятад улсыг чиглэх, харилцан зорчих хөдөлгөөн болон худалдааны хязгаарлалтыг хийхгүй байхыг уриалсан. Хязгаарлалт хийхийг ДЭМБ дэмжихгүй байгаагаа илэрхийлсэн.

        Монгол Улсын төр засаг, олон нийтийн байгууллага, бизнесийн хүрээнийхэн, хувь хүмүүс энэ хугацаанд Хятадын ард түмэнд маш их дэмжлэг үзүүлж байна. Бидэнд зориг нэмж, халдварт өвчний эсрэг нэгдэж буй Монголын ард түмэнд Хятадын ард түмэн гүнээ талархаж байгааг тэмдэглэн хэлмээр байна. Монголчуудын энэ ач тусын хариуд хоёр орны сайн хөршийн найрсаг харилцааг улам бэхжүүлэхийн төлөө манай ЭСЯ чармайн ажиллах болно.

        Тэрбээр “Хятадад өвчний нөхцөл байдал хүнд байгаа. Гэвч сүүлийн өдрүүдэд нас баралт буурч, эдгэрсэн хүний тоо хурдацтай нэмэгдэж, халдварт өвчинтэй тэмцэх ажил үр дүнгээ өгч байна. Шинэ төрлийн халдварт өвчинтэй тэмцэх ажлыг манай улсын дарга Си Жиньпин өөрөө командалж, Ерөнхий сайд ажлын хэсгийг тэргүүлж, Хятад улсын хэмжээнд өвчнийг хяналтад авах системийг богино хугацаанд бий болголоо. Үүний зэрэгцээ Хятад улс бусад улсад коронавирусийн халдвар тарахаас сэргийлэн авч буй арга хэмжээг ДЭМБ-аас өндрөөр үнэлсэн. Монгол Улсын төр засаг, олон нийтийн байгууллага, бизнесийн хүрээнийхэн, хувь хүмүүс энэ хугацаанд Хятадын ард түмэнд маш их дэмжлэг үзүүлж байна. Бидэнд зориг нэмж, халдварт өвчний эсрэг нэгдэж буй Монголын ард түмэнд Хятадын ард түмэн гүнээ талархаж байгааг тэмдэглэн хэлмээр байна. Монголчуудын энэ ач тусын хариуд хоёр орны сайн хөршийн найрсаг харилцааг улам бэхжүүлэхийн төлөө манай ЭСЯ чармайн ажиллах болно” гэв.

        МҮХАҮТ-ийн ерөнхийлөгч О.Амартүвшин: ”Бидний хөрш, хамгийн том худалдааны түнш оронд үүсээд буй онцгой нөхцөл байдалд тусламжийн гараа сунгах ёстой гэдэг дээр манай бизнес эрхлэгчид санал нэгдсэн. Өнөөдөр бид Хятадын ард түмэнд 140 сая төгрөгийн хандив өргөж байна. Үүнд манай хувийн хэвшлийнхний санаачилга өндөр байгаад баяртай байна. БНХАУ халдварт өвчинтэй тэмцэх ажлыг, манай улс энэ өвчнөөс урьдчилан сэргийлэх ажлыг өндөр түвшинд зохион байгуулж байна. Айл хүний амь нэг, саахалт хүний санаа нэг гэдэгчлэн энэхүү хүнд нөхцөлд эв санааны дэмжлэг үзүүлэх нь чухал юм” хэмээгээд нийт бизнес эрхлэгчдийг аянд нэгдэхийг уриаллаа.

Монгол Хятадын Бизнесийн зөвлөлийн тэргүүн А.Энхболд: Монгол Улсын Засгийн газрын шийдвэрийн дагуу МҮХАҮТ-ын дэргэдэх Монгол Хятадын Бизнесийн зөвлөл энэ хоёрдугаар сарын 5-нд Удирдах зөвлөлөө шинэчлэн зохион байгуулж ажиллаж байна. Манай улсын экспорт, импортын хамгийн том хөрш, мөнхийн харилцаат Хятад улсад коронавирусийн халдвар тархсан энэ онцгой нөхцөлд “Айл хүний амь нэг, саахалт хүний санаа нэг” гэж ярьдагчлан Монголчууд бид хүч санаа нэгдэн, тусламж үзүүлэх нь зүйтэй гэж үзсэн. Монгол Хятадын бизнесийн зөвлөл бол хоёр орны бизнесийн харилцааны маш том гүүр болдог байгууллага. Удирдлага шинэчлэгдсэнээр бид олон чухал ажлуудыг зохион байгуулахаар төлөвлөөд байгаа бөгөөд Хятадын ард түмэнд туслах тусламжийн аяныг зохион байгуулж байгаадаа тун баяртай байна. Энэхүү аянд маань нэгдээрэй гэж нийт монголчуудаа уриалмаар байна.

Дашрамд сануулахад БНХАУ-д коронавирусийн халдвар дэгдсэнээр Монголд мөн зарим төрлийн бизнес эрхлэгчдэд хүндрэл тулгарахаар нөхцөл байдал үүсээд байгаа. Тиймээс МҮХАҮТ нийгмийн хариуцлагын хүрээнд Давагдашгүй хүчин зүйлийн гэрчилгээг үнэ төлбөргүй олгож эхлээд байгаа юм байна. Энэ талаарх мэдээллийг хүргэж байна.  

МҮХАҮТ-ийн гүйцэтгэх захирал Т.Дүүрэн: "Дайн дажин, өвчин, байгалийн гамшиг зэрэг урьдчилан таах боломжгүй нөхцөл байдал үүссэнээс тухайн үйлчилгээ, бараа бүтээгдэхүүнийг нийлүүлэх боломжгүй болсон тохиолдолд Давагдашгүй хүчин зүйлийн гэрчилгээ олгодог. Энэ нь гэрээгээ зөрчиж буй хэрэг бус харин давагдашгүй хүчин зүйл өрнөж буй хугацаанд алданги, торгууль төлөхгүй байх нөхцөлийг ААН-үүдэд олгож буй хэрэг юм. Хөл хорио тогтоосон энэ үед ялангуяа гадаадын хөрөнгө оруулалттай үйлчилгээний байгууллагууд Давагдашгүй хүчин зүйлийн гэрчилгээ авахаар их хандаж байна. Иймд МҮХАҮТ нийгмийн хариуцлагын хүрээнд 550.000-1.000.000 төгрөгийн үнэтэй байдаг энэхүү гэрчилгээний хураамжийг 3 дугаар сарын 2 хүртэл чөлөөлөх шийдвэр гаргасан" гэлээ.

Уг гэрчилгээ нь өөрөөс хамаараагүй нөхцөл байдлын улмаас гэрээгээ зөрчих, нэмэлт торгууль, хүү, алданги төлөх зэрэг тооцоогүй эрсдэлээс хамгаалдаг, дэлхийн олон оронд хүчинтэй эрхзүйн баримт бичиг юм.