Татварын багц хуулийн төсөлд хэд хэдэн анхаарах заалтууд байгаа талаар бизнес эрхлэгчид ярьж байна
- schedule 2019 оны 3 сарын 23
- chat_bubble 0
УИХ-аар хэлэлцэж байгаа Татварын багц хуулийн төслийн зарим зүйл заалт татвар төлөгч, бизнес эрхлэгчдийн эрх ашгийг зөрчиж буй талаар МҮХАҮТ-ын шинэ удирдлагууд болон томоохон компаниудын төлөөлөл хэвлэлийн хурал хийлээ.
МХАҮТ-ын ерөнхийлөгч О.Амартүвшин:
-УИХ-ын ээлжит бус чуулганаар татварын багц хуулийн асуудлыг хэлэлцүүлж байна. Татварын хууль олон Засгийн газар дамжин яригдаж байгаа. Өмнө нь танхим гишүүдийнхээ дунд санал асуулга зохион байгуулаад өөрсдийнхөө саналыг ажлын хэсэгт хүргүүлсэн. Эндээс зарим нь дэмжигдэж, зарим нь дэмжигдээгүй. Харин УИХ-аар хэлэлцэгдэж буй Татварын хуульд татварын байцаагчийн торгох хэмжээ эрс нэмэгдүүлсэн байна. Улмаар авлига, ашиг сонирхлын асуудал бүрдэх нөхцөл үүсч байгааг харж байна гэлээ. Тэд хуулийн төсөлд хэд хэдэн анхаарах заалтууд байгаа талаар дурдсан юм. Үүнд,
Шинэ Татварын ерөнхий хуулиар Татварын байцаагчийн торгох хэмжээ эрс нэмэгдсэн нь дарамтлах, улмаар авлига ихсэх нэг нөхцөл болж болзошгүйг анхаарах. Тухайлбал, хуулийн 84.2-д Суутган татвараа аваагүй, тайлагнаагүй бол төлөх татварын 50 хувьтай тэнцэх, мөн 83 дугаар зүйл, 85.1 дүгээр зүйл заалтаар татвар төлөх орлогоо дарагдуулсан гэж үзвэл торгуулийн хэмжээг 50 хувиас 100 хувиар торгох эрхийг олгосон.
Шинэ татварын ерөнхий хуулийн 53, 55, 62-73 дугаар заалтуудаар татварын өр барагдуулах, албадан арга хэмжээ авах, битүүмжлэх харилцааг хатуу чанга болгож өгсөн нь өнөөдрийн нөхцөлтэй хэрхэн зохицож буйг анхаарах ёстой.
Шинэ хуулийн 34 зүйлээр Татварын Эрсдлийн удирдлага гэдэг хяналт, шалгалт хийх шинэ заалтыг оруулж өгсөн. Эрсдэлтэй гэдэг нэрийдлээр хяналт шалгалт хийх нөхцөлийг бүрдүүлж байна.
Мөн татвар төлөгч бус түүний харилцан хамаарал бүхий этгээдүүд болон гуравдагч этгээдийг хамруулан татварын асуудлаар шалгах, хянах, мэдээлэл гаргуулж авах онцгой эрхийг татварын алба, байцаагчид бий болгож өгсөн.
Торгуулийн хэмжээ өсөхийн хэрээр бизнесийн байгууллагын үйл ажиллагаанд эрсдэл, хүндрэл учирна. Татварын байцаагчдын хувьд өнөөдрийг хүртэл бидний яриад байгаа авлига, далд эдийн засаг даймжирах болчихоод байна.
Татварын орчинг сайжруулахын тулд татварын хуулийг сайжруулах нь мэдээж чухал. Гэхдээ засах гэж байна гээд улам дордуулж болохгүй. Дахиж зарчмын зөрүүтэй саналуудаараа бизнес эрхлэгчдийнхээ дуу хоолойг сонсож, хаврын чуулганаар дахин оруулах саналтай байгаагаа илэрхийлж байна" хэмээн ярилаа.
Санал болгох
Сонин хачин
Уншиж байна ...