Ази, номхон далайн бүсийн орнуудын Иргэний нисэхийн Ерөнхий захирлуудын 54 дүгээр хурал Улаанбаатарт эхэллээ

Тус хурлын үйл ажиллагааны үеэр Зам, тээврийн хөгжлийн сайд Д.Ганбат нийт төлөөлөгчдөд хандаг үг хэллээ. Тэрээр "Бид нэг дэлхийтэй, нэг зорилготой. Улс орон бүрийн онцлогоос хамаарч иргэний нисэхийн салбарт тулгарч буй асуудлууд өөр өөр, шийдэл нь харилцан адилгүй байх боловч Олон улсын иргэний нисэхийн байгууллагын өмнөх хурлуудаас дэвшүүлсэн “нэг ч орныг орхихгүй хамтдаа хөгжих” уриан дор үйл ажиллагаагаа явуулж байгаа бид нэгэн цогц системийн бүрдэл юм" хэмээн онцлов.

Мөн Ази, Европ, Америк тивийг холбох нислэгийн хамгийн дөт замналтай, олон улсын нислэгийн аюулгүй байдлыг бүрэн хангасан, техник технологийн хамгийн сүүлийн үеийн ололт, тоног төхөөрөмжөөр хангагдсан навигацийн үйлчилгээтэй Монгол Улс нь бусад улс орнуудтай идэвхтэй хамтран ажиллах болно гэдгийг хэллээ. Ази, Номхон далайн бүс нутгийн иргэний нисэхийн салбарын хөгжлийг эрчимжүүлэхэд хүчин чармайлт гарган, хувь нэмрээ оруулж ажилласаар байх болно гэдгээ илэрхийллээ.

Монгол Улс Нэгдсэн үндэсний байгууллага /НҮБ/-ын тусгай агентлаг болох Олон улсын иргэний нисэхийн байгууллага /ИКАО/-д 1989 онд гишүүнээр элсэн, 193 бүрэн эрхэт гишүүний нэг болсон юм. 
ОУИНБ нь гишүүн улс орнуудаа Америк, Африк, Европ, Ази, Номхон далай, Ойрхи дорнодын зэрэг 7 бүсэд хувааж, 3 жил тутам ерөнхий ассамблейгаараа сонгодог 36 орны төлөөлөлтэй Зөвлөл үйл ажиллагаагааг нь удирдан явуулдаг. Ази номхон далайн бүс хамгийн олон орон хамрагддаг бүс бөгөөд жил бүр Иргэний нисэхийн ерөнхий захирлуудын хурлыг аль нэг улсад 5-7 хоногийн хугацаагаар зохион байгуулж ирсэн.
Манай улс ОУИНБ-аас зохион байгуулж буй үйл ажиллагаанд идэвхитэй оролцож, олон улсын хэмжээний эрх зүйн акт, конвенци, баримт бичигт нэгдэн, иргэний агаарын тээврийн аюулгүй ажиллагаа, аюулгүй байдал, нисэх онгоцны буудлын үйл ажиллагаа, агаарын тээвэрлэгчдийн үйл ажиллагааг зохицуулах бодлого боловсруулах, хэрэгжилтийг зохион байгуулахад хамтарч ажилладаг юм.

Иргэний нисэхийн аюулгүй ажиллагаа, аюулгүй байдлын чиглэлээр олон улсын аудит хийлгэх, сургалт, судалгаанд хамрагдах, Агаарын тээвэрлэгчдийн холбооноос зохион байгуулдаг хамтын ажиллагааны хөтөлбөрт оролцох, дотоод болон гадаад орнуудын иргэний нисэхийн байгууллагууд, сургалтын байгууллагуудыг гэрчилгээжүүлэх зэрэг үйл ажиллагаанд хамрагдах, оролцох, зохион байгуулах чиглэлээр ажиллаж ирлээ.

Ази, номхон далайн бүсийн орнуудын Иргэний нисэхийн Ерөнхий захирлуудын 54 дүгээр хурал Улаанбаатар хотноо энэ сарын 7-11-ний өдрүүдэд болж байна.

Энэ хуралд бүс нутгийн төлөөлөл төдийгүй, иргэний нисэхийн олон улсын төрөл мэргэжлийн 10-12 байгууллага, агаарын тээвэр өндөр хөгжсөн Америк, Европын улс орнуудын төлөөлөгчид, агаарын хөлөг болон агаарын навигаци, аюулгүй ажиллагаа, аюулгүй байдлын чиглэлийн тоног төхөөрөмж, нисэхийн цахим хяналт удирлагын систем, үйлдвэр эрхлэгчид, олон улсын байгууллагууд байнга оролцдог уламжлалтай.

Дээрх хурлыг Ази, Номхон далайн бүсэд хамаарах зарим улс орон 2-3 удаа хүлээн авсан бөгөөд Монгол Улс 2003 онд 40 дүгээр хурлыг хүлээн авч, Улаанбаатар хотноо амжилттай зохион байгуулагдсанаар ОУИНБ-ын дээд удирдлага, гишүүн орнуудаас өндөр үнэлгээ авч байсан.

ОУИНБ-аас 2012 онд Ази, Номхон далайн бүсийн орнуудын Иргэний нисэхийн ерөнхий захирлуудын 54 дүгээр хурал (DGCA 54)-ыг Монгол Улсад зохион байгуулах санал тавьж, 2015 оны 52 дугаар хурлаар баталсан. 2016 оны 07 дугаар сард Шри-Ланка Улсад зохион байгуулагдсан 53 дугаар хурлын үеэр Монгол Улсад хурлын тугийг албан ёсоор шилжүүлэн өгч, хурлын сэдвийг тогтсон.

Энэ удаагийн “Ази, Номхон далайн бүсийн орнуудын Иргэний нисэхийн ерөнхий захирлуудын 54 дүгээр хурал” нь “The challenge of managing outcome focused and risk based regulations for Asia Pacific states" –/Эрсдэлд тулгуурласан, үр дүнд чиглэсэн зохицуулалт хийхийг Ази, номхон далайн бүсийн орнуудад уриалах нь/ сэдвийн дор болж байгаа юм. 
Ази, Номхон далайн бүсийн орнуудын Иргэний нисэхийн ерөнхий захирлуудын 54 дүгээр хурал 5 хоног үргэлжлэх бөгөөд Ази, Номхон далайн бүсийн 40-өөд орон, иргэний нисэхийн олон улсын 12 байгууллагын нийт 400-гаад төлөөлөгч оролцож байна.

Олон улсын хурал манай улсад зохион байгуулагдсанаар:

1. Монгол Улсын нэр төрийг олон улсын тавцанд өргөх, 
2. Монгол Улсын иргэний нисэхийн салбарыг олон улсад сурталчлах,
3. Ази, Номхон далайн бүсийн орнуудын хоорондын хамтын ажиллагааны цар хүрээг өргөтгөх,
4. Иргэний нисэхийн олон улсын байгууллагатай хамтран ажиллах боломжийг нэмэгдүүлэх ач холбогдолтой.