Энэ жилийн наадмаар Улсын харцага Цэдэвийн Содномдорж түрүүлж Монгол Улсын арслан цол хүртлээ

Тулгар төрийн 2226, Их Монгол Улсын 811, Ардын хувьсгалын 96 жилийн ой, Үндэсний их баяр наадмын барилдаанд хүчит 512 бөх уран мэхээ уралдуулж, хүч бяраа сорин барилдсанаас Хөвсгөл аймгийн Тосонцэнгэл сумын харьяат, ШШГЕГ-ын харьяа “Сүлд” спорт хороо, “Хөвсгөлийн хүчтэн” дэвжээний бөх улсын харцага Цэдэвийн Содномдорж түрүүлж Монгол Улсын арслан цол хүртлээ.

Энэ жилийн наадмаас Улсын начин зургаа, Улсын харцага хоёр, Улсын заан хоёр,  Улсын гарьд, Улсын арслан цолтон тус бүр нэг төрлөө. Улсын арслан цолтон болсон Ц.Содномдорж өмнө нь улсын баяр наадамд гурван удаа зургаа давж байсан бол энэ жилийн наадамд ийнхүү үнэн хүчийг үзүүлэн  ес давж, түрүүллээ.

Ц.Содномдорж арслан цолоо гардсаныхаа дараа наадамчин олондоо хандаж “Түмэн амгалан сайхан наадацгааж байна уу? Төрийнхөө наадамд түрүүлсэндээ баяртай байна. Намайг өдий зэрэгтэй өсгөж өгсөн миний аав ээж, нутгийн зон олон болон намайг дэмжиж ирсэн бүх хүмүүс, наадамчин зон олондоо баярлалаа гэж хэлье ээ” хэмээн баярын сэтгэгдлээ хуваалцсан юм.

Ц.Содномдорж, энэ жилийн баяр наадмын гурвын даваанд улсын харцага Т.Амартүвшинг, дөрвийн даваанд аймгийн арслан О.Гантулгыг, тавын даваанд улсын начин Л.Цэрэнтогтох, зургаагийн даваанд аймгийн арслан Г.Ганжад, долоогийн даваанд аймгийн арслан М.Бадарч, наймын даваанд улсын харцага Н.Жаргалбаяр, есийн даваанд улсын харцага Ө.Бат-Оршихийг тус тус даван хүчит энэ наадмын 512 бөхийн түрүү болж, хотол олноо баярлууллаа. Харин Увс аймгийн Улаангом сумын харьяат улсын харцага Ө.Бат-Орших энэ наадамд үзүүрлэж Монгол Улсын Гарьд цол хүртлээ.


Шөвгийн дөрөвт Булган аймгийн Сайхан сумын харьяат, Монгол Улсын Хөдөлмөрийн баатар, олимпийн наадмын алт, мөнгөн медальт, улсын харцага Н.Түвшинбаяр, Сэлэнгэ аймгийн харъяат, улсын харцага Н.Жаргалбаяр нар шалгарч Монгол Улсын заан цолны болзол хангасан юм.

Дашрамд сонирхуулахад, үндэсний бөхийн барилдаанд түрүүлсэн бөхийг “Ланд крузер-200” маркийн автомашинаар шагнадаг уламжлал тогтоод байгаа юм. Шинэ арслан маргааш энэхүү шагналаа Сүхбаатарын талбайд гардана.