74 настай эмээг дээрэмдсэн хэрэгтнүүдийн ялыг хэвээр үлдээв

Өндөр настай эмээг орцонд нь хийсч унатал нь унаган цүнхийг нь дээрэмдэж байгаа хэргийн бичлэг өнгөрсөн оны нэгдүгээр сард сошиал ертөнцөд тархан шуугиан тарьж байсан. Дараа нь мөн ар гэрийнхэн нь эмээ хүндээр гэмтсэн талаар мэдээлэл тавьж, олон нийт настай эмэгтэйг гэмтээн дээрэмдсэн залуусыг хүчтэй шүүмжилж байсан билээ.

Камерын бичлэгийн тусламжтайгаар энэхүү хэргийг илрүүлэн Л.Амаржаргалд 6 жил, Э.Мөнх-Эрдэнэ, А.Баатар нарт тус бүр 5 жил 1 cap хорих ял оногдуулаад байсан билээ. Хэрэгтнүүд шийдвэрийг үл зөвшөөрөн давж заалдсан бөгөөд өнөөдөр Улсын дээд шүүх хэргийг дахин хянан хэлэлцсэн байна. Энэ талаарх албан мэдээллийг хүргэе.

Улсын Дээд шүүхийн хяналтын шатны эрүүгийн хэргийн шүүх хуралдаанаар Л.Амаржаргал, Э.Мөнх-Эрдэнэ, А.Баатар нарт холбогдох хэргийг шүүгдэгч нарын өмгөөлөгчдийн гаргасан гомдлын дагуу 2017 оны 1 дүгээр сарын 18-ны өдөр хянан хэлэлцлээ.

Л.Амаржаргал, Э.Мөнх-Эрдэнэ, А.Баатар нар нь урьдчилан үгсэн тохиролцож 2016 оны 1 дүгээр сарын 7-ны орой 22 цагийн үед Баянгол дүүргийн 15 дугаар хорооны нутаг байрлах 24 дүгээр байрны орцонд 74 настай иргэн Ц-ийн эд хөрөнгийг авах зорилгоор амь биед нь аюултайгаар хүч хэрэглэн довтолж, түүний бие махбодид нь хүндэвтэр гэмтэл учруулан цүнхтэй эд зүйлийг нь дээрэмдэж 300.000 төгрөгийн хохирол учруулсан гэмт хэрэгт холбогджээ.

Баянгол дүүргийн Эрүүгийн хэргийн анхан шатны шүүх Эрүүгийн хуулийн 147 дугаар зүйлийн 147.2 дахь хэсэгт зааснаар Л.Амаржаргалд 6 жил, Э.Мөнх-Эрдэнэ, А.Баатар нарт тус бүр 5 жил 1 cap хорих ял оногдуулсныг давж заалдах шатны шүүх хэвээр үлдээсэн юм.

Улсын Дээд шүүхийн хяналтын шатны эрүүгийн хэргийн шүүх хуралдаанаар уг хэргийг хянан хэлэлцээд анхан болон давж заалдах шатны шүүхийн шийдвэрийг хэвээр үлдээж, шүүгдэгч нарын өмгөөлөгчдийн гаргасан гомдлыг хэрэгсэхгүй болгож шийдвэрлэв гэж Улсын Дээд шүүхээс мэдээлсэн байна.