“Утааны эсрэг ээж, аавууд” эрчтэй тэмцэж байна

Хүн бүрийн амны уншлага болоод буй Улаанбаатарын утааны эсрэг дорвитой арга хэмжээ яаралтай авахыг шаардаж ээж, аавууд ирэх даваа гарагийн 12.00 цагт Сүхбаатарын талбайд жагсана хэмээн өнгөрсөн долоо хоногт сошиалаар болон мэдээллийн хэрэгслээр мэдээлсэн.

Тэгвэл "Утааны эсрэг ээж, аавууд" группээс санаачилсан утааны эсрэг жагсаал Сүхбаатарын талбайд товлосон ёсоор өнөөдөр /2016-12-26/ 12:00 цагт эхэллээ.

Хоёр цагийн хугацаанд үргэлжлэх тайван жагсаалд эцэг, эхчүүд чөлөөтэй оролцож, зорилгоо нэгтгэх боломжтой юм.

Жагсагчид Монгол Улсын Ерөнхийлөгч, Үндэсний аюулгүй байдлын зөвлөл, УИХ, Засгийн газар, Нийслэлийн ИТХ, Улаанбаатар хотын Захирагч нарт хандаж дараахь шаардлагыг тавьж байгаа.

Агаарын бохирдолд хордож тэвчээрийн туйлдаа хүрсэн ээж, аавууд жагсаж байна. Агаарын бохирдлыг бууруулна, арилгана гэж хүлээсээр ард түмэн бид хордож үхлээ.

Ард бидний үр хүүхэд өвдөж, эмнэлэг эмийн сангийн хооронд явсаар хоол авах мөнгөө эмчилгээний зардалд өгөөд дууслаа. Өвдсөн хүүхдэд эмнэлэг хүрэлцэхгүй шалан дээр хэвтэж байна.

Иймд бид эрүүл, аюулгүй орчинд амьдрах үндсэн эрх нь зөрчигдсөн үр хүүхэд, ард түмнийхээ төлөө Засгийн газар, эрх баригчид бодитой арга хэмжээ авч, цэвэр агаартай болох хүртэл тууштай тэмцэхээ мэдэгдэж байна.

Тэд Ерөнхийлөгч, Засгийн газар, Улаанбаатар хотын захиргаанд шаардлага хүргүүллээ.

Монгол Улсын Ерөнхийлөгч Ц.Элбэгдорж танаа:

1. Агаарын бохирдол гамшгийн хэмжээнд хүрсэн энэ үед Ерөнхийлөгч Ц.Элбэгдорж та өөрийн бүрэн эрхийнхээ хүрээнд онц байдал яаралтай зарлаж, шаардлагатай арга хэмжээ авахыг шаардаж байна.

Засгийн газарт:

1. Агаарын бохирдол гамшгийн хэмжээнд хүрсэнийг хүлээн зөвшөөрч бодитой арга хэмжээ ав. Зохих нэмэлт өөрчлөлтийг Гамшгийн тухай хуулинд оруул.
2. Засгийн газар арванхоёрдугаар сарын 28-ны өдрийн ээлжит хурлаа өргөтгөсөн бүрэлдэхүүнээр буюу Ерөнхийлөгч, УИХ-ын бүх байнгын хороодын дарга нар, Үндэсний аюулгүй байдлын зөвлөл, Агаарын бохирдлыг бууруулах үндэсний хороотой хамтран Баянхошуунд зохион байгуул.
3. Агаарын бохирдлын эсрэг сүүлийн 15 жилд зарцуулсан хөрөнгө санхүү, хийсэн ажлын тайланг 2017 оны нэгдүгээр сарын 15-ны дотор иргэдэд тайлагна.
4. Агаарын бохирдлыг 2018 он гэхэд 80 хувь бууруулах нэгдсэн төлөвлөгөөг боловсруулж, 2017.01.26-нд иргэдэд нээлттэй танилцуул.
5. Хүүхдийн өвчлөл, хэвтэн эмчлүүлэлт, амбулаторийн үзлэг, нас баралтын статистик мэдээг ангилал тус бүрээр долоо хоног бүр ард нийтэд ил тод мэдээл.
6. 2017.01.10-ны өдөр гэхэд нэг ч монгол хүүхэд эмнэлгийн коридпорт, шалан дээр, шатан дээр хэвтэж эмчлүүлэхгүйгээр зохион байгуул. Мөн эмнэлгийн ор хүрэлцээгүй гэсэн шалтгаанаар буцаалгахгүй байхаар эмнэлгийн хүрэлцээг нэмэгдүүл.
7. Агаарын бохирдлоос болж өрх айлд улирч буй алдагдсан боломжийн зардлыг тооцох аргачлал яаралтай боловсруулж, энэ зардалд ирэх жилийн төсөвт хөрөнгө хуваарил.
8. Агаарын бохирдол хэмжэгч суурин станцыг Дархан, Эрдэнэт хот аймгийн төв бүрт шинээр суурилуулж нэгдсэн мэдээллийг иргэдэд өг.
9. Утаанаас үүдэлтэй агаарын бохирдлыг 2017.01.15-ны өдөр гэхэд 25 хувь бууруулах арга хэмжээ ав.

Улаанбаатар хотын захиргаанд:

1. Агаарын бохирдлын голомтод хордож буй жирэмсэн эмэгтэйчүүд, гурав хүртэлх насны хүүхэдтэй эцэг, эхчүүдийг бохирдол багатай бүс рүү нүүлгэн шилжүүлэх арга хэмжээ яаралтай ав.
2. Улаанбаатар хотын гэр хорооллын хүүхдийн цэцэрлэгт бүрт 2016.12.31-ний өдөр гэхэд агаар цэвэршүүлэгч төхөөрөмж авч байруулал.
3. Иргэд, ялангуяа жирэмсэн эмэгтэйчүүд, өндөр настан, хүүхдээ асран хамгаалж буй эцэг, эхэд чиглэгдсэн агаарын бохирдлоос үр хүүхдээ, өөрийгөө хамгаалах мэдээллийн цогц арга хэмжээг авч олон нийтийн мэдээллийн хэрэгсэл, нийгмийн сүлжээгээр мэдээл.
4. Улаанбаатар хотод шинээр 15 агаарын чанар хэмжигч суурин станц нэмж суурилуул.
5. Энэ оны арваннэгдүгээр сарын 15-наас хойш хотын утаанаас дайжиж сувилуулсан жирэмсэн болон бага насны хүүхэдтэй ээж, аавуудад зардлын 50 хувийг нөхөн олго.

Энэхүү шаардлагын эхний хариуг 2017 оны нэгдүгээр сарын 10-ны дотор багтаан “Утааны эсрэг ээж, аавууд” хөдөлгөөнд бичгээр, мөн нийт иргэдэд олон нийтийн мэдээллийн хэрэгслээр дамжуулан танилцуулахыг шаардаж байна.

Хэрэв бидний шаардлагыг хүлээж авахгүй, одоогийн явуулж байгаа үр дүнгүй аргаа үргэлжлүүлсээр байвал бидний үр хүүхдийн эрүүл мэнд, бидний эрүүл мэндийг санаатайгаар хохироож байна гэж үзэн ардчилсан нийгмийн иргэд бид төр, засгаас хариуцлага нэхэж огцруулах хүртэл арга хэмжээ авахаа мэдэгдье.

ЖАГСААЛД ОРОЛЦОГЧ ЭЭЖ, ААВУУДЫН ТӨЛӨӨЛӨЛ

Мөн жагсаал зохион байгуулагчдаас жагсаалд оролцогчдод дараахь анхааруулгыг гаргажээ.

Хамгийн дулаан хувцасаа өмсөж ирнэ үү. Гадаа хүйтэн тул бүгдээрээ яг цагтаа цуглаад богино хугацаанд жагсаалаа хийгээд тарцгаая.

Жагсаалын үеэр халуун аарц, цай, маск тараах хувь хүн байгаа боловч аль болох өөрийн хувийн бэлтгэлтэй ирэх нь зөв шүү.

Жагсаалын үеэр Утааны эсрэг өөрийн бэлдсэн уриа лоозон барьж ирвэл сайн. Гэхдээ бид утааг бууруулах яг бодит үр дүнд хүрэхийн тулд дуу хоолойгоо​ илэрхийлж байгаа учраас аль нэг нам, улстөрчлүү нэр заан дайрах агуулгагүй байх ёстойг анхаарна уу.

Утааны эсрэг жагсаалд барьж зогсох өлгийнд ороосон хүүхдийн тоглоом эсвэл даавуу бэлтгэж ирвэл сайн. Энэ нь утаанаас болж бидний хүүхдүүд хамгийн ихээр хохирч байгаа гэдгийг илэрхийлэх зорилготой.

Та бид тайван замаар жагсаалаа хийх болно. Тиймээс жагсаалын үеэр эмх замбараатай байх нь бидний жагсаал, тэмцэл үр дүнтэй байхад нөлөөлөх болно.

Тодруулахад, Зөвхөн нэг жилийн дотор буюу өнгөрсөн жил /2015 он/ 0-5 насны 435 хүүхэд хатгалгаагаар нас баржээ гэсэн харамсалтай тоо гарчээ.

Гэрэл зургийг Ц.ГАНБОЛД