“Мунзуй” хэмээх Г.Нямдорж: Н.Номтойбаяр намайг гүтгэх болгонд би шинэ шинэ мэдээлэл дэлгэж хэвлэлийнхнийг баярлуулах болно

УИХ-ын гишүүн Н.Номтойбаяр “Le Triskell” бааранд танхайрч бусдыг хутгалсан гэх асуудалд холбогдоод байгаа билээ. Тэрээр “Би хүн хутгалаагүй, харин над руу “Мунзуй” хэмээх Г.Нямдорж хутга барьж дайрсан”  хэмээн мэдэгдэж байгаа билээ. Энэхүү хэргийн гэрч Г.Нямдорж “Би гавъяа байгуулаагүй болохоор хэвлэл мэдээллийнхнээс дөлж явсан. Гэтэл Н.Номтойбаяр намайг байлгаж суулгахгүй гүтгэхээс гадна ярих зайлшгүй асуудал надад байна. Тэр юу вэ гэвэл Номтойбаяраас зугтаагаад эх орондоо ирж чадахгүй байгаа гурван хүүхэд, хоёр том хүний тухай юм” гээд яриагаа эхэллээ.
-Сүүлийн арав гаруй хоног “Мунзуй” хэмээх Нямдорж гэдэг хүний муу муухайг дуудлаа. Та яагаад дуугарсангүй бэ?
-Би сүүлийн арав гаруй хоног хүнд ноцтой гэмт хэрэгт гүтгүүллээ, доромжлууллаа. Өт хүртэл биедээ хүрэхээр атирдагтай адил тэсвэр тэвчээр алдагдлаа. Найз нөхөд, гэр бүлийнхэн маань хүртэл уурлаж байна. “Чи яагаад дуугарахгүй байгаа юм бэ” гэж. Би үнэндээ хүний мууд дурлаж явдаг эр хүн биш. Миний багын найз Н.Номтойбаяр өөрийн үйлдсэн үйл лайгаа даагаад явчихаж чадахгүй над руу буруугаа чихэх гэж оролдлоо. Эхний үед албан тушаалтайгаа үлдэх гэж чармайж байна гэж бодсон. Гэтэл сүүлдээ намайг гэмт этгээд, луйварчин гэж зарлаж байна. Би гэмт хэрэгтэн юм бол шоронд байна биз дээ. Монголын цагдаа МАН-аас сонгогдсон УИХ-ын гишүүн Н.Номтойбаяр хүн хутгалсан гээд мэдэгдээд байхад “Мунзуй” хэмээх Г.Нямдоржид эрүүгийн хуулийн 181.3-аар хэрэг үүсгэсэн гэж бичээд байх юм. Н.Номтойбаяр хуулиас дээгүүр эрх мэдэл эдлээд байж болохгүй биз дээ.
-Таныг эрэн сурвалжилж байна гэсэн мэдээлэл тасарсангүй?
-Намайг эрэн сурвалжилж байгаа юм уу, эрүүгийн хэрэг үүсгэсэн үү гэж   цагдаа дээр очсон. Тэгтэл үгүй гэсэн байхгүй юу. “МАК”  гэдэг компани монголын бүх хэвлэл мэдээллийн хэрэгслээр төлбөртэй мэдээлэл цацсан. Хэвлэлийн дайралт гэдэг аймаар юм байна. Цагааныг хар, үнэнийг худлаа болгох баячуулын тархи угаах хэрэгсэл юм биш үү?
-Оргон зайлсан, УИХ-ын гишүүн Н.Номтойбаяраас уучлалт гуйсан гээд бичээд байсан шүү дээ?
-Намайг уучлалт гуйгаасай гэж мөрөөдөхгүй юу. Би түүнээс юу гэж уучлалт гуйх юм бэ. Бүр гадаад руу гарсан гэж мэдээлсэн. Энэ бүхний цаана мөнгө урсаж байсан. “Мунзуй” Нямдорж гэдэг хүнийг УИХ-д өрсөлдөх гэж байгаа юм шиг муу муухайгаар сурталчиллаа. Одоо болоо юм шүү. Эхний тав хоног харсан. За ингээд болино биз дээ гэж. Тэгтэл та бидний сонгосон төрийн түшээ маань иргэн Нямдоржийг  гэмт хэрэгт гүтгээд эхэлдэг байна. Би чинь сэтгэл зүрхтэй, найз нөхөдтэй хүн шүү дээ.
-Тантай утсаар ярих ч юм уу, сүрдүүлсэн үү?
-Номтойбаяр уу, чадахгүй шүү дээ. Тэр чинь ганцаараа хүн зодож чадахгүй хүүхэд шүү дээ. Тэр хүн уснаас хуурай гарахын тулд улс төржүүлж эхэлсэн. Ардчилсан намын үед эрүүгийнхэн даварч байна. Х.Тэмүүжин сайдаа Мунзуйгаа аваач ч гэх шиг. Би эрүүгийн гэмт хэргээс төрөөгүй. Хууль зүйн сайд Х.Тэмүүжин гэдэг хүнийг таних ч үгүй. Зурагтаар л харсан. Х.Тэмүүжин сайд намайг  аваад  яах юм бэ. Зүгээр ажлаа хийж яваа хүнийг шоронд хийх юм уу.
-Нэг ёсондоо шоронд хийгээч гэсэн үг үү?
-Би төрөөр хүмүүжсэн хүн. Хар багаасаа өнчирч хатуу ширүүн амьдрал туулахдаа алдсан явдал бий. Тийм учраас намайг хүмүүжүүлсэн төрдөө залбирч явдаг. Энэ төр бидний эцэг, хууль бүх хүнд тэгш шударга үйлчилдэг л юм бол Н.Номтойбаяр гэдэг хүнийг төр хүмүүжүүлэх цаг болжээ. Монгол Улсад УИХ-ын гишүүн хүн хутгалсан анхны тохиолдол гарлаа шүү дээ.

Н.Номтойбаяр Чикогод гэмт хэрэгт өдүүлэн АНУ-ын шүүхээр  таслагджээ

-Та гэр орноо яаж тэжээдэг хүн бэ?
-УИХ-ын эрхэм гишүүн Н.Номтойбаяр ингэж хэлж байна уу. Би өглөө босоод гэр бүлээ тэжээх гээд гардаг. Монголын бүх эрчүүл өглөө босоод гэр бүлээ тэжээх гэж гардаг, ажилдаа явдаг. Харин Н.Номтойбаяр яаж шоудах уу, архидах уу гэж босдог биз дээ. Энэ хүн та бидний амьдралыг мэдэхгүй учраас элэглэж шоолдог юм билээ. Миний хувьд өөрийн гэсэн багахан бизнес хийгээд явж байна шүү дээ. Түүний хэлээд байгаа шиг муу аргаар мөнгө олж явсангүй. Ард түмний баялгаас цөлмөөгүй шүү дээ.
-УИХ-ын гишүүн Н.Номтойбаярыг хэдийнээс эхэлж мэддэг болсон бэ?
-Манай Дөчин мянгатын хүүхэд байхгүй юу. Багаасаа тэнэмэл хүүхэд байсан гэхэд болно. Эхлээд энэ нөхөр чинь нэгдүгээр сургуульд орсон. Тэндээ муу сураад, сахилгагүйтээд хөөгдсөн байхгүй юу. Дараа нь 45 дугаар сургуульд орсон ч бас төгсч чадаагүй. Би яагаад үүнийг ярих болов гэхээр Номтойбаяр намайг 14 жил шоронд суусан, өөрөө болохоор эрдэм номд шамдсан гэдэг байхгүй юу. Ингээд би найзынхаа  Ерөнхий боловсролд анхаарч эхэлсэн дээ. Мань хүн 1978 онд төрөөд 1986 онд дунд сургуульд орсон гэдэг. Гэтэл 17 настай АНУ-д аяга таваг угааж байснаа сонин хэвлэлд ярьсан байна лээ. Миний сонсноор дунд сургуулиа төгсч чадалгүй АНУ явсан.
-Дунд сургуулиа төгсөөгүй хэрэг үү?
-Тийм ээ. Бодоод үзэхгүй юу. Би 24 дүгээр дунд сургууль төгссөн гэрчилгээтэй, зургийн цомогтой хүн  шүү. Харин УИХ-ын эрхэм гишүүн Н.Номтойбаярт тийм гэрчилгээ, зургийн цомог, ангийн хүүхэд байна уу. Байхгүй шүү дээ.
-Н.Номтойбаяр 14 жил гадаадад сурсан юм биш үү?
-2001 оноос эхлэн  АНУ-ын Индиана мужийн Валпарайсо их сургуулийн улс төрийн шинжлэх ухаан, практик бизнесийн ангид орж суралцсан гэдэг юм. Тэнд сурч байхдаа мань эр Чикого хотын бааранд архи ууж танхайрч, хүн зодсон байдаг. Тэгээд АНУ-ын шүүхээр таслагдаад албадан гаргуулсан хүн шүү дээ.
-Шүүхээр ял авсан хэрэг үү?
-Тэгэлгүй яах бэ. Энэ бүхэн баримттай, баталгаатай зүйл шүү дээ. Хууль хяналтын байгууллагынхан АНУ-ын Чикого хотын шүүхээс гаргасан Н.Номтойбаярт холбогдох хэргийн материалтай танилцаж болно. Тэгэхээр яаж Индиана мужийн  Валпарайсо их сургуулийг хос мэргэжлээр төгсөх юм бэ. Мань хүн чинь нэг хэсэг АНУ руу орж чаддаггүй байсан юм. Тэгээд ч дунд сургуулиа төгсөөгүй хүний диплом хуурамч байх нь ойлгомжтой биз дээ.
-Холбооны бүгд найрамдах Герман улсын техник эдийн засгийн дээд сургуулийг дүүргэсэн юм биш үү?
-2009-2011 оны хооронд Герман улсад дээд сургууль, магистр хамгаалсан гэж байна уу. Чи нэг зүйл анзаарсан уу. 2001 онд АНУ, Герман улсад сураад байсан байдаг. Бас Тагнуулын Ерөнхий газар 2001-2009 онд ажилласан гэдэг байхгүй юу. Инээдтэй байгаа биз дээ. Хэдийд нь тив алгасаж сураад, ажиллаад байсан нөхөр бэ.Миний мэдэхээс гадаадад сурч байгаа нэртэй барнаас барны хооронд, зочид буудал хэсээд явсан нөхөр шүү дээ. Нэг онц сурдаг хүүхдээр хичээл номоо хийлгэдэг гээд урьсан юм даа. Ер нь тэгээд бид хоёрын 14 жилийн мэдлэг боловсрол ойролцоо шүү дээ.

“Цагаан шонхор”-ын Ч.Энхтайваны цүнхийг барьдаг байсан гэв

-Дунд сургуульд байхдаа охин жирэмсэн болгосон гэдэг?
-Уг энэ талаар яримааргүй байгаа юм. Цаадах намайг өдөөд байгаа болохоор хэлээд өгье. Хэвлэл мэдээллийн хэрэгслээр гарч байсан шүү дээ.
-Ер нь танай найз хэдэн хүүхэдтэй юм бэ. Нэг охин нь АНУ-д байдаг сурагтай?
-Манай хүн  гурван хүүхдийн эцэг болсон. Миний мэдэхээс шүү дээ. Туяа гэдэг бүсгүйгээс Сүндэрээ гэдэг охинтой болсон. Мань эр тэр охиноо зодоод цаадах нь зугтаагаад АНУ гарсан юм шүү дээ. Туяа нь “Номтойбаяраа чи АНУ-ын иргэнд гар хүрлээ” гээд хашгичаад байна гэсэн.
-Номтойбаяр охиныхоо чихийг сэт татаад сургууль дээрээсээ эмээ руугаа утасдсан байдаг. Тэгээд эмээ нь сургууль дээрээс нь ирж аваад АНУ гаргачихсан. Охин үрээ хайрладаггүй, Мөнгөншагайгаа хүүгээ гэж хүлээн зөвшөөрдөггүй хүн гэмт хэргээ хүлээхгүй нь ойлгомжтой шүү дээ. Миний гэр бүл, хүүгийн маань доромжилсонд ясны дургуй хүрээд байгаа юм даа.
-УИХ-ын гишүүн Н.Номтойбаярыг аавынхаа мэргэжлийг өвлөх гээд Тагнуулын Ерөнхий газар ажиллаж байсан гэдэг шүү дээ?
-Б.Нямтайшир гэдэг хүн өөрийн хөрөнгөөр хайгуул хийгээд Нарийн сухайт, Цагаан суварга, Хүрэн толгой, Хөөт зэрэг 34 орд газрыг ордыг олсон гэж бодож байна уу. Үгүй л байхгүй. Тагнуулын Ерөнхий газар мэдээлэлд ойр байсан учраас улсын хөрөнгөөр хайгуул хийгдсэн бэлэн ордуудыг авсан. Аль билээ нэг аймгаас том талбайтай гэж дуулсан. Улсын хөрөнгөөр хайгуул хийгдсэн орд газрыг “соц” нийгмийн үнээр авчихаад ард түмнийг нь дээрэлхээд байж болохгүй. Би Номтойбаярыг тагнуулд байхыг нь мэднэ. Тэндээс хөөгдсөн нөхөр шүү дээ. “Центрпойнт”-ын хэмээх хэргийн үед Ч.Энхтайванг дагаад намирч явсан нөхөр. Тэгээд ТЕГ-аас халагдсан.
-Н.Номтойбаяр энд тэнд зодоон хийлээ, буудлаа гэж сонсогддог. Тийм зодоонч хүн үү. Тухайлбал “Метро полис” бааранд айхтар зодоон болсон гэдэг. Яг юу болсон юм бэ?
-“Женко” Баттулгын хүү Жавхланг Номтойбаяр өөрөө өдөөд байсан байхгүй юу. Гараад үзсэн чинь Номтойбаяр зодуулаад амьтан хүний араар ордог юм байгаа биз дээ. Тэгээд машинаасаа ангийн хутга барьж ирээд Жавхаа юу дайраад цаадах чинь зугтаасан. Хажууд нь нэр алдартай залуус үзээд зогсож байсан даа.
-Бас “Эрэл” компанийн босс Б.Эрдэнэбатыг хүүг зодоод дээр нь шээчихсэн гэдэг?
-“Face” бааранд  “Эрэл” компанийн босс Б.Эрдэнэбатын хүүг өдсөөр байгаад зодчихсон. Архи уухаараа угийн тавтиргүй шүү дээ. Бүгдийг мөнгөөр шийдээд сурчихсан болохоор хийсэн гэмээ хэзээ ч хүлээдэггүй. Нэг удаа ч гэсэн гэм буруугаа хүлээгээд хүнээс уучлалт гуйчих хэмжээний сэтгэхүй боловсролтой хүн биш. Намайг яах бэ. Монголын ард түмэн, хууль хяналтынхнаар ингэж тоглохоо болиоч. Эр хүн шиг байгаач гээд гэмээр байна. Б.Нямтайшир ганц хүүгээ өмөөрөхийн оронд алгадаад загнаж болдоггүй юм уу. Төрийн түшээ хүн бусдыг хутгалчихаад мөнгө төлөөд зүгээр гарч болох уу.

МАН-ын нэгэн сайд, Ерөнхий прокурор асан хоёр түүний улаан хамгаалагч

-Ардчилсан намыг гарахаар рэкетүүд гарч ирдэг гэх юм?
-МАН-ын эрин үед Н.Номтойбаяр бусдын шүд амыг цөм цохиод л явсан. Түүний хэргийг аргалаад бенц жипээр шагнуулсан МАН-ын эрхэм түшээ байдаг юм. Тэр үеийн сайд, улсын Ерөнхий прокурор шүү дээ. Олон нийт тэр хоёр улаан хамгаалагчийн  нэрийг мэдэж байгаа.
-Нэрийг нь хэлж болох уу?
-Цаг нь болохоор хэлж болно. Номтойбаяр улаан хамгаалагчийнхаа талаар “Энэ муу новш маш их шуналтай. Дандаа мөнгө зээлээд өгдөггүй дурак” гэж байсан. Тэгэхээр хэнийг хэлээд байгаа нь ойлгомжтой  биз.
-УИХ-ын гишүүн асан О.Чулуунбат, Батж.Батбаяр, Ө.Энхтүвшин, Д.Бадамдамдин нарын хүүхдийг зодсон гэх юм?
-Нуугаад яах бэ. Би хар багаасаа зодоон цохионд холбогдож байсан. Тэгэхдээ өөрөөсөө дүү болоод сул дорой хүнд гар хүрч үзээгүй. Яг үнэндээ Бадамдамдины хүүг Номтойбаяр чинь “Брикс” бааранд өөрөө зодчихсон шүү дээ. Наадах чинь бүр олон гэрчтэй асуудал шүү дээ. Би О.Чулуунбат, Батж.Батбаяр гуайн хүүтэй нэг довных,  Дөчин мянгатынхан. Ө.Энхтүвшингийн хүү миний найзын найз. Энэ сайхан залуустай мэндтэй устай явдаг хүн шүү. Харин Н.Номтойбаярын хувьд баян айлын хүүхдүүдийг ангуучилдаг гэхэд болно. Бараг бүгдийг нь бусадтай элбэж зодлоо шүү.
-Өөрийг чинь “Центрпойнт”-ын гэх зодооны үеэр “Цагаан шонхор” холдингийн захирал Ч.Энхтайваныг хутгалахаар дайрч байсан гээд баахан шуугив?
-Н.Номтойбаяр минь өөрийнхөө хэрэгт  “Цагаан шонхор”-ын Энхтайван гэдэг хүнийг битгий оролцуул.Тэр зодооны үеэр би “Цагаан шонхор”-ын Ч.Энхтайван гэдэг хүн рүү хутга барьж дайрах нь бүү хэл хараагүй. Би зодооны хэргээр ял аваад салсан. Харин нэг юм хэлэхэд 2001 онд  эрхэм гишүүн Н.Номтойбаяр чинь “Цагаан шонхор”-ын Ч.Энхтайваны цүнхийг бариад, хаалга онгойлгоод явж байсан юм. Харин одоо болохоор Ч.Энхтайвантай муудсан гэж ярьдаг байхгүй юу.
-Тэр хоёр юунаас болж муудсан юм бэ?
-“Цагаан шонхор”-ын Ч.Энхтайваны бие хамгаалагч нарыг өдөөд  зодуулахгүй юу. Тэгээд  хоёр сайхан залууг нь матаад шоронд суулгачихсан. Өөдгүй зүйл хийсэн дээ Номтойбаяр.

                         “Come on baby”-нүүд ээ болиорой

-Та хоёрыг сүүлийн дөрвөн жил салаагүй найзууд гэдэг?
-Бид хоёрыг олон жил хамт явсныг улаанбаатарчууд мэднэ. Намайг танихгүй гэснээ таньдаг болсон шиг. Би Номтойбаярын хэрэг төвөг өдүүлж байхад байж л байсан. “Анод” банкны захирлыг зодож байхад байж л байлаа. Сэлэнгэд нэг хүүхнийг олуулаа хүчиндсэн гэж шуугихад байж л байсан. Н.Номтойбаяр энэ хэргээ хүлээчихсэн шүү дээ. “Би мөнгийг нь төлөөд үйлчилгээ авсан” гээд фэйсбүүк дээрээ бичсэн. Үүнээс илүү нотолгоо гэж хаана байх юм бэ. Ардын намын шинэчлэгчид, МАН-ын  хэдэн залуусыг  мэднэ шүү. “Come on baby”-нүүд ээ болиорой.
-Түүний өмнөөс хүн зодож байсан уу?
-Би түүнийг олон хүнээс өмөөрч байсан. Согтуу хөлчүү явж байгаад хэрэг төвөгт орохоос  хамгаалж байсан юмдаг. Энэ залуугийн хүмүүжлийн талаар МАН-ын гишүүд ч бодох хэрэгтэй. Мөнгөтэй бацаан орж ирээд гурван сарын дотор Удирдах зөвлөлд, зургаан сарын дотор дэд сайд, жилийн дараа УИХ-ын гишүүн боллоо. Насаараа намд зүтгээд үүрийн дарга болж чадахгүй хөгшчүүл зөндөө байна цаана чинь.
-Ямар хэрэг бэ?
-Манай  Номтойбаяр хоёр хүний  байр залилаад Чингэлтэй дүүрэгт эрүүгийн хэрэг үүсчихдэг байхгүй юу. Яалт ч үгүй. Эрүүгийн хэрэг үүсдэг юм. Тухайн үед Чингэлтэй дүүргийн цагдаагийн газрын дарга Батсайхан байлаа. За ингээд миний найз Номтойбаярыг хорихоор болоод Ганц худаг руу аваад явдаг юм байна. Тэгэнгүүт  би машинаараа хааж байгаад дарга энэ тэр рүү яриулаад хориулаагүй байхгүй юу. Төд удалгүй Б.Нямтайшир гуай ирээд тэр хоёр хүний байрны мөнгийг өгөөд асуудлыг хааж байсан юм.Эрхэм сэтгүүлч нар миний үгэнд итгэхгүй Чингэлтэй дүүргийн цагдаагийн газраас асуугаад үзээрэй.
-Тийм баян айлын хүүхэд байж залилан хийдэг нөхөр бэ?
-Угийн л хогийн этгээд шүү дээ. Хэрэг төвөг холбогдоод эхлэнгүүт Хууль зүйн сайд Ц.Нямдорж руугаа яриулдаг байсан байхгүй юу.
-Н.Номтойбаярын бие хамгаалагч Б.Батзориг гэдэг залууг таних уу?
-Танилгүй яах юм бэ. Н.Номтойбаярыг долоон жил нохой шиг дагасан хүн шүү дээ. Хөдөө хээр Н.Номтойбаяр майханд унтаж байхад Б.Батзориг бороонд нороод гадаа хэвтдэг байлаа. Гэр хороололд гурван хүүхэдтэй амьдарч байсан тэр залуу шударга үнэн ярьсныхаа төлөө гадаадад цагаачилж явна. Франц улсын цагаачдын лагерьт Монгол Улсын таван иргэн амь зогоож байна шүү дээ. Номтойбаяраас айгаад Оросоор дамжин явган нүцгэн Монгол Улсын таван иргэн харийн нутгийн хилийн дээс алхсан даа.  Би сая утсаар ярилаа. Шударга үнэн гэж байдаг бол эх орондоо очих юмсан гээд хоолой нь зангирч байна. Энэ төр засаг тэр таван иргэнээ авчрах цаг болсон биш үү. Ер нь Б.Батзоригийн утсыг хэвлэлийнхэнд өгнө.
-Түүний ярьсан үнэн болов уу?
-Хууль хяналтынхан шалгаад үнэн зөвийг нь тогтоож болно шүү дээ. Бүх гэрч байна. Хоёр бамбарууштай баавгай алахад нь харж байсан хүмүүс бий. Энэ баавгай алсан газрын цаахан талд  Содоо гэдэг залуу бид хоёр  сайхан буга алахад нь харж л байсан. Энэ ч яахав. МАН-ын ерөнхий нарийн бичгийн дарга У.Хүрэлсүхэд 600 сая төгрөг бэлнээр нь аваачаад өгсөн биз дээ. Номтойбаяр өөрөө хүртэл “Хүрэлсүхийн бөгсөөр гартал мөнгө өгсөн” гэж твиттертээ донгосч байсан шүү дээ.

        Н.Номтойбаяр хутга барьж өөрөө босч ирээд “Алалцъя” гээд агсарчээ

-“Le Triskell” бааранд яг юу болсон бэ?
-Тэр өдөр Номтойбаяр над руу утасдаад “Дорнодоос ирж байна. Чи “Миранда” бааранд очиж бай” гэж ярьдаг байхгүй юу. Мань хүн ирээд нэг шил коньяак уугаад хүнтэй уулзахаар гарсан. Хэсэг хугацааны дараа над руу залгаад дээд давхарт Мандухай сууж байна уу. Хар” гэсэн. Дээд давхарт эхнэр Мандухай нь сууж байгааг утсаар хэлэхэд Засгийн газрын ар талын Le Triskell” бааранд  хүрээд ир” гэсэн. Сар гаруй хоногийн өмнө энэ бааранд бид хоёр уулзахад “Аригу” студийн Ариунболдоос бусад нь  байсан л даа. Вип өрөөнд ороход “Аригу” студийн Ариунболд  нэмэгдсэн байсан. Б.Баттулга бид хоёр ороод нэг шил конъяак уусан. Тэр үед Н.Номтойбаяр “Чиний ажил гэж юу байдаг юм бэ. Яг очиж үзнэ” гээд доош хийгээд агсараад болдоггүй дээ. Их тэссэн дээ. Тэгтэл УИХ-ын гишүүн Н.Номтойбаяр хутга бариад босоод ирсэн. Надад хутга өгөөд “Чи тийм овоо бол алалцъя” гээд байсан. Би хамт явсан найздаа баярлаж байгаа шүү. Миний найз пауэрлифтингийн спортын улсын дөрвөн удаагийн аварга, Монгол Улсын хамгийн хүчтэй хүн Б.Баттулга намайг бариад авсан. “Чи наад Номтойбаярт гар хүрч болохгүй. Наадах чинь муу ч сайн УИХ-ын гишүүн” гэсэн. Тэгээд намайг буланд шахчихсан. Энэ хооронд Н.Номтойбаяр нөгөө найз нарынхаа хамт дайрч Баттулгын толгой дээр конъяакны шил хагалж байсан. Тэгтэл Н.Номтойбаяр гарт байсан  хутгаараа Баттулгыг гэдэс рүү хоёр удаа хутгалсан. Намайг шорон оруулчихгүйн тулд миний найз Б.Баттулга УИХ-ын гишүүнд хоёр хутгалуулсан юм. Энэ үнэнийг юугаар үгүйсгэх юм бэ. Би харин Номтойбаярыг бодвол ирт мэсний өөдөөс намайг хамгаалаад зогсох найзтай байгаадаа баярлаж байна.
-Та эмчилгээ хийлгэхээр авч явсан мөнгөөрөө нь казинодчихсан юм биш үү?
-УИХ-ын гишүүн Номтойбаяр угийн ядуу сэтгэлгээтэй. Хүнтэй муудахаараа арав, хорин мянган ам.доллар л ярьдаг юм. Архи ууж, баар хэссэн л гэж бие нь өвдөх үү. Гадаад дотоодод хаустай, нарийн шинжилгээг байнга хийлгэдэг гэр бүл шүү дээ. Хүний дургүй хүртэл мөнгө цацна шүү дээ. Улаанбаатар утаатай, шороотой байна гээд нүүдлийн шувуу шиг нисээд явчихна. Долоон буудал, Дамбадаржаа хаана байдгийг мэдэхгүй. Дөрвөн ханатай гэрт найман ам бүл байдаг гэдгийг мэдэхгүй. Яах юм бэ. Амьдралаас тасарчихсан улс шүү дээ.
-Таныг ийм мэдээлэл хийнгүүт мөнгө авах гээд байна гэх болов уу?
-Монгол Улсад мөнгө төгрөгөөр хэмжиж болохгүй шударга ёс байгаа гэдэгт итгэдэг. Тийм учраас ийм зүйл яриад байгаа юм. Н.Номтойбаярт хэлэхэд ард түмний баялгаас олсон мөнгөө нийгмийн сайн сайханд биш юмаа гэхэд  улсын татвартаа төлөөч, ажилчдынхаа цалин тавихад хэрэглээч.  Тэр их мөнгөө намайг муу муухайгаар булахын тулд цацаад бай. Нэг зүйл нэмээд хэлэхэд ажилчдынхаа компьютер, твиттер, фэйсбүүк, мессенжерийг байнга хянаж байдаг. Компьютерийн мэргэжилтэн залуугаар тийм программ суулгаад бүгдийг нь тагнаж байдаг юм билээ. Ийм тагнах эрх хэнд байдаг юм бэ.
-Танай найз Б.Баттулгын бие сайн уу. Гэмтлийн эмнэлэгт хэвтээгүй гэж сонссон?
-Цаадах чинь бүдүүн баараг хүн дээ. Бие нь зүгээр. Спортын хүн амархан эдгэнэ. Толгой руу нь   араас нь архины шилээр балбасан болохоор тархи нь хөдөлсөн байх.
-Танай найз тэр даруйдаа цагдаад гомдол гаргасан уу. Н.Номтойбаярын хийж байгаа мэдэгдлээс үзэхэд хэн  нэг явуулга байсан өнгө аяс мэдрэгдээд байна?
-Найзууд хоорондоо муудсан. Ирсэн цагдаа нь бид хоёрыг бариад явсан. Юун явуулга байх бэ. Цаадах чинь хийсэн хэргээсээ бултахдаа агуу шүү дээ. Хэрвээ тэнд Б.Баттулгыг хутгалаад алчихсан бол намайг гүтгээд цэвэрхэн гарчих байсныг сая харлаа. Ардын намын Удирдах зөвлөлийн гишүүн, МАК-ийн өв залгамжлагч, УИХ-ын гишүүн, нэгэн цагийн анд Н.Номтойбаяр намайг  гүтгэх болгонд шинэ шинэ мэдээлэл хүргэж хэвлэлийн та бүхнийг баярлуулах болно. Би ярьсан хэлсэндээ хэзээд эзэн байх болно. Миний ярьсан, хэлсэн бүхэн баталгаатай, гэрчтэй зүйл.
-Таныг “Шинэ дэлхий” телевизийн захирлыг хутгалсан, дэлссэн гээд байна шүү дээ?
-Энэ асуудлыг шалгадаг байгууллага нь шалгаад хэн дээр эрүүгийн хэрэг үүсгэсэн гэж хэллээ. Санахгүй байна уу. Цагдаагийн байгууллагаас УИХ-ын гишүүн Н.Номтойбаярт 181.3-аар эрүүгийн хэрэг үүсгэлээ гээд зурагтаар ярьсан. Тэгэхэд хэвлэл мэдээлэл, хууль хяналтынхнаас илүү эрх мэдэл өөртөө өгсөн Н.Номтойбаяр гишүүн төлбөртэй нэвтрүүлгээр  намайг булж өглөө.
-Нямтайшир гуайтай уулзаж байсан уу?
-Нэг удаа Өмнөговь аймаг руу нэг ажилд явуулж байсан. Зүгээр л нэг ажил даа.

Эх сурвалж /tovchoo.mn/