МАЛАЙЗЫН ЖҮЖИГЧИН МИШЕЛЬ ЁО ОСКАРЫН НААДМААС ”ШИЛДЭГ ЭМЭГТЭЙ ГОЛ ДҮР”-ИЙН ШАГНАЛ ХҮРТЛЭЭ

Малайзын жүжигчин Мишель Ёо нь “Бүх зүйл хаа сайгүй нэгэн зэрэг” (“Everything Everywhere All at Once”) киноны дүрээрээ энэ жилийн Оскарын наадмаас “Шилдэг эмэгтэй гол дүр”-ийн шагналыг хүртлээ. Тэрээр энэ шагналыг хүртсэн анхны Ази гаралтай эмэгтэй, энэ төрөлд нэр дэвшсэн хоёр дахь Ази гаралтай жүжигчин юм.

Мишель Ёо буюу Мишель Хан, жинхэнэ нэр нь Ёо Чу Кэн Малайзын-хятад чинээлэг гэр бүлд 1962 оны 8-р сарын 6-нд төржээ. Түүний аав Ёо Киан-теик нь хуульч, Малайзын Хятадын Холбооны гишүүн улс төрч юм.

Тэрээр бага наснаасаа сагсан бөмбөг, усанд сэлэх зэрэг янз бүрийн биеийн тамирын дасгал хийдэг байсан ч балетад онцгой сонирхолтой байв. Өсвөр насандаа тэрээр Лондон дахь Хатан хааны бүжгийн академид суралцаж байсан ч нурууны гэмтэл нь мэргэжлийн балетчин болох мөрөөдлөө зогсооход хүргэжээ.