Шин Хаймин: Хятадын Элчин сайдын яам ХААИС-д 10 мянган ам.долларын тэтгэлэг гардууллаа

БНХАУ-аас Монгол Улсад суугаа Онц бөгөөд Бүрэн эрхт Элчин сайд Шин Хаймин өчигдөр ХААИС-д тэтгэлэг гардуулж өгсөн билээ. Энэ үеэр түүнтэй уулзлаа.

-ХААИС-д тэтгэлэг гардуулж өглөө. Ямар учиртай, юунд зориулсан тэтгэлэг вэ?

-Эн жилийн долоодугаар сард Хятадын Ерөнхий сайд Монгол Улсад албан ёсны айлчлал хийсэн. Энэ үеэр хоёр улсын Ерөнхий сайд уулзалт хийж, цаашид хөдөө аж ахуйн салбарын хамтын ажиллагааг улам бэхжүүлэх тухай ярилцсан юм. Хоёр Ерөнхий сайдын ярилцаж тохиролцсон зүйлийг бодитоор ажил хэрэг болгохын тулд ХААИС-д тэтгэлэг өгч байна. Энэ тэтгэлэг бол БНХАУ-ын Элчин сайдын нэрэмжит оюутны сургалт, хөдөө аж ахуйн мэргэжилтэн бэлтгэх тал дээр анхааран ажиллах болно. Мөн оюутнуудыг тэтгэлэгт хамруулах, тэтгэлгийн хэмжээг нэмэхийн тулд хичээн ажиллана. Манай хоёр улсын хөдөө аж ахуйн харилцааг шинэ шатанд гаргахыг зорьж байна.

-Энэ удаа хэчнээн ам.долларын тэтгэлэг гардуулсан бэ?

-Хятадын Элчин сайдын яамны нэрэмжит тэтгэлэг хэмээн 10 мянган ам.долларын хөрөнгө оруулж байна. Цаашид энэ тоог нэмэгдүүлсэн байдлаар хөрөнгө оруулах болно. Гэхдээ бодитоор хэдэн оюутан, залуус тэтгэлэгт хамрагдах боломжтой вэ гэдэг нь тухайн сургуулийн асуудал. Элчин сайдын яамны зүгээс хөрөнгө оруулалтаа нэмэхэд бэлэн.

-Хятад улсад 10 мянган гаруй оюутан суралцаж байгаа. Тэдний долоон мянга нь Хятадын Засгийн газрын тэтгэлгээр суралцаж буй. Энэ тоог цаашид нэмэх үү?

-Хятадын талаас Монголын долоон мянган оюутныг тэтгэлгээр сургаж байгаа. Манай улс дэлхийн олон улсын оюутнуудад тэтгэлэг олгож байгаа. Засгийн газраас тэтгэлэг авч буй оюутны тоогоор Монгол улс хоёрдугаарт бичигдэж байна. Монгол Улс гурван сая гаруй хүн амтай. Тэднээс долоон мянган оюутныг үнэгүй сургана гэдэг бол их тоо. Монголын залуусын боловсролд чухал нөлөө үзүүлж байгаа гэж бодож байна. Бид сайн түншийн харилцаатай улс. Цаашид энэ тоог нэмэгдүүлэхэд бэлэн, Хятадын Засгийн газрын тэтгэлгээр дамжуулан залуусын боловсролыг нэмэгдүүлэхийн төлөө ажиллах болно. Манай улсад суралцаад ирсэн залуус улсынхаа бүтээн байгуулалтад оролцохын зэрэгцээ Хятад, Монголын найрамдалт харилцааг бэхжүүлэх гүүр болно гэдэгт итгэж байна. Мөн цаашид зөвхөн оюутан залуус гэлтгүй төрийн албан хаагчид, багш нар, цагдаа, хууль, прокурорынхонд зориулсан сургалт явуулан тэтгэлгийнхээ цар хүрээг нэмэгдүүлэхээр төлөвлөж байгаа.

-Хятадын Коммунист намын төв хорооны улс төрийн товчооны гишүүн өнөөдөр манай улсад айлчилж байна. Энэ айлчлалын ач холбогдол ямар байх вэ?

-Айлчлалын үеэр Монгол Улсын Ерөнхийлөгч, Ерөнхий сайд, УИХ-ын даргатай албан ёсны уулзалт хийнэ. Энэхүү айлчлалаар дамжуулан хоёр улсын харилцаа болон бусад бүхий л салбарын хамтын ажиллагааг дээшлүүлэхийн тулд яриа, хэлэлцээ хийх юм.

-Удахгүй Хятадын үндэсний баяр болох гэж байна. Энэ хүрээнд ямар ажил зохион байгуулах вэ?

-Хятадын Үндэсний баяр айлчлалтай давхцаж буй учраас бид баяраа урьдчилан тэмдэглэсэн. Харин Улаанбаатар дахь Хятадын соёлын төвд маргаашаас эхлэн уран зургийн үзэсгэлэн зохион байгуулж байгаа.