ТӨР УЛСЫГ ТӨВШИТГӨН БАЙГУУЛАХАД ХҮН БҮРИЙН ХҮЧИН ЗҮТГЭЛ ХЭРЭГТЭЙ
- schedule 2024 оны 6 сарын 28
- chat_bubble 0
Монгол Улсын Ерөнхийлөгч У.Хүрэлсүх иргэний эрхээ эдлэн төрийн эрх барих дээд байгууллага парламентын сонгуульд саналаа өглөө. Тэрбээр саналаа өгснийхөө дараа хэвлэлд мэдээлэл өглөө.
Тэрбээр хэлсэн үгэндээ “Юуны өмнө ард иргэддээ энэ өдрийн мэндийг дэвшүүлье. 1992 оноос хойш УИХ-ын сонгууль явагдсан. Энэ удаагийнх 9 дэх сонгууль болж байна. Энэ жил анхдугаар Үндсэн хууль батлагдсаны 100 жилийн ой тохиож байгаа. Ийм сайхан жил манай УИХ-ын сонгууль давхцаж байгаа нь онцлогтой. Одоогоос 100 жилийн өмнө манай улс Хаант төр, хамжлагат ёсыг халж, бүгд найрамдах засаглалыг тогтоож, үндэсний ардчилсан үзэл санааг дэлгэрүүлж, эрэгтэй эмэгтэй хүмүүсийг тэгш эрхтэй болгож, сонгох сонгогдох эрхийг олгож байсан ийм сайхан түүхтэй. Энэ түүхэн жил Үндсэн хуулийн маань ой давхцаж байна. Энэ сайхан жил УИХ-ын ээлжит сонгууль явагдаж байна. Энэ удаагийн УИХ-ын сонгууль бас хэд хэдэн зүйлээр онцлог. Хуучин бид 76 гишүүн сонгодог байсан бол энэ жил 126 гишүүн сонгож байгаа. 78 гишүүнийг нэрсийн жагсаалтаар, 48 гишүүнийг намын жагсаалтаар сонгох сонгууль болж байна. УИХ-ын гишүүдийн тоо 126 болж нэмэгдсэн. Холимог тогтолцоог энэ удаад хэрэгжүүлж байгаа. Бүсчилсэн хөгжлийн үзэл баримтлалын дагуу бүсээрээ нэр дэвшин сонгогдох ийм сайхан боломж бүрдсэн. Энэ нь Монгол Улсын цаашдын хөгжил дэвшилд ихээхэн ач холбогдолтой. Мөн энэ удаагийн сонгууль 1992 оноос хойш анх удаа хамгийн олон нам, эвсэл, бие даагч оролцож байгаа сонгууль болж байна. Нийт 1341 хүн нэр дэвшжээ. Түүний хамгийн залуу нь 25 настай. Хамгийн ахмад нь 79 настай нэр дэвшигч байна. Нийт нэр дэвшигчдийн 40 орчим хувь нь эмэгтэй хүмүүс нэр дэвшжээ. Энэ бол их сайхан үзүүлэлт. УИХ-аа эмхлэн байгуулах, төр төвшитгөн засах их үйл хэрэгт Монголын ард түмэн бүгдээрээ оролцож, саналаа өгөх ёстой. Монгол Улсын иргэн танд Үндсэн хуулиар олгогдож байгаа сонгох, сонгогдох эрхээ хэрэгжүүлж байна гэсэн үг. Мөн төр улсыг төвшитгөн байгуулахад хүн бүрийн хүчин зүтгэл хэрэгтэй. Үүнээс хойшоо сууж болохгүй. Үндсэн хуулиар олгогдсон эрхээ эдлэх ёстой. Үүргээ биелүүлэх ёстой. Энэ бол Монгол Улсын иргэний нэн чухал асуудал. Төрийн эрх мэдэл ард түмний гарт байна гэж Үндсэн хуульд заасан. Тиймээс ард түмэн өөрсдийнхөө сонгох эрхийг хэрэгжүүлж, УИХ буюу төрийн эрх барих дээд байгууллагынхаа сонгуульд идэвхтэй сайхан оролцохыг улсын ерөнхийлөгч, төрийн тэргүүний хувьд нийт ард түмэндээ уриалж байна. Та бүхэндээ сайн сайхан бүхнийг хүсэн ерөөе. Төр түвшин, шашин тунгалаг, дэлхий амгалан байх болтугай. Баярлалаа” гэв.
Санал болгох
Сонин хачин
Уншиж байна ...