Аки башёд дээд зиндаанд Ар Монголын долоо, жюүрод Ар Монголын долоо, Өвөрмонголын нэг бөх барилдана

        Есдүгээр сарын башёгийн банзүкэ гарлаа

Японы мэргэжлийн сүмо бөхийн холбооноос Аки башёгийн чансааг гаргажээ. Манай улсаас макүүчи буюу дээд зиндаанд 7 бөх барилдах бол жюүро зиндаанд мөн 7, макүшитад 9, сандамэд 4 нийт 27 сумоч энэ сард эрэмблэгдэн барилдах юм.

Макүүчи зиндаанд

• Сүүлийн үеийн уламжлал ёсоор мэргэжлийн сумогийн 26 түрүүтэй 69 дэх их аварга Хакүхо Даваажаргал 32 дахь удаагаа зүүн жигүүрийг манлайлан барилдана.

• Харин таван түрүүтэй 70 дахь аварга Харүмафүжи Бямбадорж баруун жигүүрийг тэргүүлэн хүндхэн үүрэг, хатуу шаардлагатайгаар барилдана.

• Арван хоёр дахь жилдээ барилдаж буй Какирюү Ананд ес дэх башёдоо озэки цолтойгоор түрүүлэхийн төлөө барилдана.

• Найм дахь жилдээ тасралтгүй дээд зиндаанд барилдаж байгаа ахмад бөх 34 настай Токитэнкү Хүчитбаатар маэгаширагийн зүүний тавд эрэмблэгдэн барилдана.

• Монголын сумочдын анхдагчын нэг Кёкүтэнхо Цэвэгням сумод 21 гаруй жил барилдаж байгаа бөгөөд үүнээс 15 жил буюу 88 башё дээд зиндаанд барилдаж харьшгүй хүчит, цуцашгүй нягт болохоо харуулж байна. Энэ үзүүлэлтээрээ сумогийн бүх цаг үеийн түүхэнд дээд зиндаанд хамгийн удаан барилдасан амжилтаар 4-р орж байгаа. Мөн нийт барилдсан хугацаагаараа бас 4-р жагсаж байна. Аки башёд барууны зургаад эрэмблэгджээ.

• Монголын сумочдоос анх удаа жюро зиндаанд дараалан хоёр түрүүлсэн Шотэнро Нямсүрэн барууны 10-т жагсан барилдана.

• Дээд зиндаанд харьцангуй хурдан гарч ирсэн /4 жил/ Тамаваши Мөнх-Оргил сүүлийн үед жюро макүүчи зиндааны хооронд дээш доош шилжин барилдаж байна. Энэ удаад 16-д жагссан нь бас л эгзэгтэй байдалд байна.

Жюүрё зиндаанд

• Сүүлийн үед хурдан гарч ирэн /21 башё/ цолтой бөх болсон Такаинова Баасандорж жюүро зиндаандаа харин удаж байна. Энэ удаад зүүний хоёрт жагссан нь харин 50 хувиа биелүүлэхэд л ирэх сард анх удаа дээд зиндаанд дэвшин барилдах боломжтой болжээ. /Asashoryu 10, Токитэнкү 10, Хакухо 17, Харүмафүжи 19 башё барилдан цолтой болсон/

• Гэмтэл бэртлээс болон сайн барилдаж чадахгүй байгаа Кёкүшюүхо Эрдэнэбаатар барууны гуравт эрэмблэгдэн гурав дахь удаагаа дээд зиндаанд гарахын төлөө барилдана.

• Жюүрод хоёр барилдаад дээд зиндаанд гарч ирсэн Азүмарюү Тодбилэг зүүний дөрөвт эрэмблэгдсэн байна. Түүний хувьд дөрөв дэх башёдоо жюүрод барилдах, бөгөөд 10-аас дээш даваа авбал эргээд дээд зиндаанд гарч ирэх болом бий.

• Ахмад бөхөд орох болсон 32 настай, 82 дахь башёдоо буюу 14 дэх жилдээ барилдаж буй Асасэкирюү Дашням барууны тавд жагсжээ. Сүүлийн нэг жил жюүрод барилдаж байгаа түүнд эргээд дээд зиндаанд гарч ирэх боломж бололцоо бий.

• Найман жил чармайж байж цолтой бөх болсон Сэйро Өнөболд зүүний долоод эрэмблэгдэн жюүрогийн хоёр дахь башёдоо барилдана.

• Арваад жил уйгагүй барилдаж байж цолтой болсон Кагамио Нанжид жюүрогийн тав дахь башёдоо барууны наймд эрэмблэгджээ. Түүний хувьд жигд сайн амжилтыг үзүүлж байгаа.

• Хоёр жил гаран буюу 15 башё барилдаад Монголын 27 дахь цолтой бөх болсон Вакамишо Ган-Эрдэнэ жюүрогийн барууны 11 эрэмбэтэйгээр анхны барилдаандаа гарнаа. Тэрээр нэрээ солин Терүнофүжи болсон байна.
• Мөн Өвөрмонголын бөх Сококурай Энхтүвшин хоёр жил гаран сумогийн холбоотой заргалдан заргаа авч өнгөрсөн сард дээд зиндаанд барилдсан боловч 50 хувиа хийж чадаагүй. Харин Аки башёд жюүрогийн зүүн жигүүрийг магнайлан барилдаж дээд зиндаанд байх бөх гэдгээ харуулах биз ээ.

Мэргэжлийн сүмогийн намрын Аки башё энэ сарын 15-нд эхэлж 29 нд өндөрлөнө.