Хятад хүүхэд залуус код бичих ур чадвараараа дэлхийд тэргүүлж байна
- schedule 2021 оны 5 сарын 16
- chat_bubble 0
Өнөө үед код бичих, компьютер технологийн арга ухаан дэлхийн аль ч улсын хамгийн эрэлттэй мэдлэгт тооцогдож байна. Код бичих нь 21 зууны хүүхэд залуусын “шинэ хэл” хэмээгдэж, бүтээлч сэтгэлгээ, хил хязгааргүй мэдлэгийн эхлэл болжээ. Тэгвэл Хятад улсын хүүхдүүд 6-8 насандаа энэхүү шинэ хэлэнд суралцаж буй нь дэлхийн аль ч улсын хүүхэд залуусаас урьтан суралцаж буй хэрэг юм.
Шанхай хотод амьдардаг Ви Та гэх найман настай хятад хүү “Bilibili” сүлжээг үүсгэн байгуулж, код бичих сургалтыг өөрөө багшлан удирдаж байгаа нь үүний нэгэн жишээ. Хятадын код бичих, програм боловсролын салбар сүүлийн жилүүдэд үсрэнгүй хөгжиж байна. Хятадын интернэт судалгааны “Analysys” хүрээлэнгээс тус улсын энэ салбарын орлого 2017 онд 7.5 тэрбум юань байсан бол 2020 онд 37.7 тербум юаньд хүрсэн тухай мэдээлсэн юм.
22 жил програмчлалын салбарт багшилсан Сюй Синьян багш өнөөг хүртэл 30 мянга гаруй хүүхэд залууст код бичих сургалт явуулжээ. Өдгөө тэр Хятадын боловсролын салбарт нөлөө бүхий нэгэн болсон бөгөөд шинэ эдийн засгийн эрин үед компьютерын ухаан, код бичих, ашиглах мэдлэг бүхий шинэ үеийн залуусыг бэлтгэсээр байна. Тэр одоо “Microsoft China Education”-т ажиллаж, цахимаар сургалтаа явуулж байгаа нь 150 сургуулийн 30 мянган сурагчдад хүржээ.
Хятад улс ирээдүйн инженерийн салбартаа хиймэл оюун ухаан болон роботикыг нэн чухалд үзэж байна. Хүүхэд залуусын энэ салбарын мэдлэг мэдээллийг тэлснээр ирээдүйн боловсон хүчнээ бэлтгэх өргөн боломжтой юм. 2030 онд гэхэд Хятад улс хиймэл оюун ухааны салбарт дэлхийд тэргүүлэх зорилгыг дэвшүүлээд буй. Ингэснээр Хятадын зөвхөн хиймэл оюун ухааны салбар 150 тэрбум ам.доллараар эргэлдэнэ гэсэн үг.
Сюй багш шиг арвин туршлагатай багш нар энэхүү салбарт нэн чухал үүрэг гүйцэтгэж байна. Тэр багаасаа компьютертой харьцаж, Бээжингийн Шинжлэх ухаан, Технологийн сургуулиас зохион байгуулсан багшлах хөтөлбөрт хамрагджээ. Ингээд ур чадвараараа шалгарч, ийнхүү ажиллах болсон нь ихээхэн амжилтад хүрчээ. Тэр 20 жилийн турш хүүхдүүдтэй ажиллаж, хиймэл оюун ухааны салбарын хөгжилд идэвхийлэн оролцжээ.
Хятад улсад 40 сурагчтай ангийн 35 сурагч аливаа техник хэрэгсэлтэй байдаг ч үлдсэн 5 сурагчийг ч хамруулсан, ижил тэгш, үр бүтээмжтэй, сонирхолтой хичээл зохион байгуулахаар Сюй багш хичээж иржээ. 2016 оноос эхлэн 3D, визуал програмчлалын хэл зэрэг хүнд төвшний хичээлийг хүүхдүүдэд сургаж, ингэснээр хүүхдүүд өөрсдийн бүтээлээ хийхэд илүү хялбар болжээ.
“Програмын хэлийг сайн сурснаар хүүхдүүд өөрсдийгөө илэрхийлж, бичиж, дуулж, бүжиглэж, зурах зэргээр өөр өөрийн дотоод мэдрэмжээ кодоор гаргадаг. Жишээ нь, охид л гэхэд 3D ашиглан далайн дагинын дүрстэй богино хэмжээний анимейшн бүтээл хийчихдэг. Бага насны хүүхдүүдэд тод өнгө, 3D график дүрслэлийг кодын хэлээр бүтээх нь маш их таалагддаг” гэж Сюй багш хэлжээ. Одоогоор Хятад улсын бараг бүх сургуульд энэхүү кодын хэл бүхий KODU сургалт явагдаж байгаа бөгөөд зарим хичээлийн улиралд тусгайлсан уулзалт, нэмэлт хичээлийг явуулдаг аж. Хүүхэд залуус кодын хэлийг сурсанаар ямар ч мэргэжилтэй болсон ч тухайн мэргэжлээ кодтой хослуулан ажиллах бүрэн боломжтой юм. Тиймээс ч энэхүү “шинэ эриний хэл” дэлхий нийтийн хамгийн эрэлттэй, хамгийн өндөр цалинтай 10 ур чадварын 1-т бичигдсээр байна.
Сэтгүүлч Г.Сүйлэн
Санал болгох
Сонин хачин
Уншиж байна ...