Хятадын вакцинууд “КОВАКС” хөтөлбөрт нийлүүлэгдэж, илүү олон улс оронд ашиг тусаа өгнө

Бичсэн: Г.Солонго

Дэлхийн эрүүл мэндийн байгууллагаас (ДЭМБ) даваа гарагт гаргасан мэдээлэлд дурдсанаар, Энэтхэг улсад КОВИД-19 вирусний тархалт саяхнаас эрс нэмэгдсэнтэй холбоотойгоор дэлхий дахинд КОВИД-19 вирусний халдвар авсан хүмүүсийн тоо есөн долоо хоног дараалан, нас барагсдын тоо зургаан долоо хоног дараалан өссөн үзүүлэлттэй гарлаа.  

Өрнөдийн улс орнууд вакциныг нөөцөлж байгаа бол бага орлоготой улс орнуудын зарим нь ямар ч вакцин авч чадаагүй байна. Вакцины хүртээмж тэгш бус буй нь уг цар тахлын эсрэг дэлхийн тэмцэлд саад тотгор болж байна гэж шинжээчид үзэж буй юм.

Вакцины хуваарилалт, хүртээмж тэгш бус буй энэ үед бага орлоготой улс орнуудын хувьд КОВИД-19 цар тахлыг дарж авах хамгийн боломжит арга бол дэлхий даяар вакциныг тэгш бөгөөд хүртээмжтэй тараах зорилго бүхий “КОВАКС” хөтөлбөр юм гэж ДЭМБ-ын ерөнхий захирал Тедрос Аданом Гебрейесус хэлжээ.

Гэсэн хэдий ч Энэтхэгт КОВИД-19-ийн нөхцөл байдал дордож буй нь “КОВАКС” хөтөлбөрийн хүрээн дэх вакцины нийлүүлэлтэд саад болж болзошгүй байна. Учир нь Энэтхэг улс тус хөтөлбөрийн хүрээнд вакцин үйлдвэрлэхээсээ илүүтэйгээр өөрийн улсын иргэдийнхээ эрэлт хэрэгцээг хангахад гол анхаарлаа хандуулж байгаа юм.

“Энэтхэгээс нийлүүлэх вакцин удааширч байна. Эмийн бодисын хомстолтой холбоотойгоор вакцин үйлдвэрлэгчдэд асуудал тулгараад байна” гэж даваа гарагт болсон ДЭМБ-ын ээлжит хуралдааны үеэр ДЭМБ-ын дэд захирал Мариангела Симао ярьсан байна.

Гэхдээ БНХАУ-ын “Синофарм” болон “Синовакс” үйлдвэрийн үйлдвэрлэж буй КОВИД-19-ийн вакцинуудыг ДЭМБ яаралтай горимоор ашиглах зөвшөөрлийн жагсаалтад энэ долоо хоногийн эцсээр оруулах төлөвтэй буй учир вакцины хомстол удаан үргэлжлэхгүй байж магадгүй гэж тус байгууллагын мэргэжилтнүүд үзэж байна.

Хэрвээ ДЭМБ эдгээр вакциныг яаралтай горимоор ашиглахыг зөвшөөрвөл БНХАУ нь ДЭМБ-ын зөвшөөрлийг авсан өрнөдийн бус анхны орон болох юм.

“ДЭМБ-ын зөвшөөрөл нь дэлхийн вакцины нийлүүлэлтэд “Хятадын вакцинуудын оруулах хувь нэмэр”-ийг нэмэгдүүлэхэд “чухал нөлөө” үзүүлэх болно. ДЭМБ-ын зөвшөөрөл гарчихвал “КОВАКС” хөтөлбөрт Хятадын вакцинуудыг нийлүүлэх боломжтой болно гэсэн үг” гэж АНУ-ын Нью-Йорк хотод төвтэй “Гадаад харилцааны зөвлөл” хэмээх бие даасан судалгааны байгууллагын эрүүл мэндийн асуудал хариуцсан  ахлах мэргэжилтэн Хуан Яньжун хэлжээ.

Түүний хэлснээр, Хятадын вакцинуудыг худалдсан авсан улс орнууд эдгээр вакцинд сэтгэл хангалуун буйгаа илэрхийлсээр байгаа аж.

 “Зовох цагт нөхрийн чанар танигдана гэсэн зүйр үг байдаг. Цар тахал дэгдсэн үеэс л БНХАУ манай улсад тусалж, жинхэнэ нөхөрлөлийн мөн чанарыг харуулсаар байна” гэж Босни ба Херцеговина улсын Гадаад харилцааны сайд Анкица Гудельевич ярьжээ.

Одоогоор дэлхийн 70 орчим улс орон Хятадын вакцинуудыг авч хэрэглэж байна.

Хамгийн сүүлд л гэхэд Египет улс “Синовак” үйлдвэрийн вакциныг яаралтай горимоор ашиглахыг 4 дүгээр сарын 26-нд зөвшөөрсөн бол Бангладеш улс “Синофарм”-ын вакциныг ашиглах зөвшөөрлийг 4 дүгээр сарын 29-нд гаргажээ. Ингэснээр тус хоёр улсын вакцинжуулалтын ажил эрчимжсэн байна.

Дэлхийн хөгжиж буй улс орнуудын вакцины эрэлт хэрэгцээг хангахын тулд “КОВАКС” хөтөлбөрт эхний ээлжинд 10 сая тун вакцин хандивлахаар төлөвлөж буйгаа БНХАУ мэдэгдээд буй билээ. “Энэ нь вакцины тэгш хуваарилалтыг хөхиүлэн дэмжих, цар тахлын эсрэг олон улсын хамтын ажиллагааг урагшлуулах, олон улсын хамтын нийгэмлэгийн бүх нийтийн эрүүл мэндийн төлөөх үзэл баримтлалыг дэмжих зорилгоор БНХАУ-аас авч хэрэгжүүлж буй бас нэг чухал арга хэмжээ юм" гэж Хятадын улсын ГХЯ-ны хэвлэлийн төлөөлөгч Ван Вэньбин мэдэгдсэн байна.

Ашигласан эх сурвалж:

https://news.cgtn.com/news/2021-05-03/COVID-19-Chinese-vaccines-to-enter-COVAX-benefiting-more-countries-ZVR30wIoYU/index.html

http://www.xinhuanet.com/english/2021-02/03/c_139718563.htm#:~:text=China%20to%20provide%2010%20million%20COVID%2D19%20vaccine%20doses%20to%20COVAX,-Source%3A%20Xinhua%7C%202021&text=BEIJING%2C%20Feb.,Ministry%20spokesperson%20said%20on%20Wednesday.