Авлигатай тэмцэх газраас шүүхэд шилжүүлсэн хэргүүд
- schedule 2018 оны 2 сарын 28
- chat_bubble 1
Авлигатай тэмцэх газраас 21 эрүүгийн хэргийг шүүхэд шилжүүлжээ.
Тодруулбал,
1. Эдийн засгийн хөгжлийн сайдаар ажиллаж байсан Н. Батбаяр нь албан тушаалын байдлаа урвуулан ашиглан улсад онц их хэмжээний хохирол учруулсан хэрэг юм. Түүнийг “Чингис”, “Самурай” гээд гадаад зах зээлээс босгосон бондын мөнгөний олголт, зарцуулалттай холбогдуулан албаны эрх мэдлээ хэтрүүлсэн, төсвийн хөрөнгийг үрэгдүүлсэн гэх үндэслэлээр АТГ шалгаж эхэлсэн. Ингээд Эрүүгийн хуулийн 263.2 “Төрийн албан тушаалтан албаны эрх мэдлээ урвуулсан” зүйл ангиар шалгаж, хэргийг шүүхэд шилжүүлжээ.
2. Авто тээврийн үндэсний төвийн тээвэр зохицуулалтын хэлтсийн дарга Д.Батбаяр нь албан үүргээ хэрэгжүүлсний хариуд бусдаас удаа дараагийн үйлдлээр онц их хэмжээний хахууль авсан. Түүнийг Эрүүгийн хуулийн 22.4.4 “Хахууль авах" гэсэн зүйл ангиар шалгажээ.
3. "Багануур" ХК-ийн охин компани болох "Багануур илч" ХХК-ийн гүйцэтгэх захирлаар 2015 оны тавдугаар сарын 1-нээс 2017 оны хоёрдугаар сарын 20-ны хооронд ажиллаж байсан С.Батболд нь компанийн хөрөнгийг хувьдаа завшиж, тус компанийг санхүүгийн хүнд байдалд оруулсан асуудлыг шалгуулжээ. Түүнийг Эрүүгийн хуулийн 265.2-т заасан зүйл ангиар шалгасан байна.
4. Чингэлтэй дүүргийн Эрүүл мэнд, нийгмийн даатгалын хэлтсийн нийгмийн даатгалын шимтгэл ноогдуулалт, төлөлт хариуцсан байцаагч Д.Бат-Эрдэнэ нь тасгийн дарга болон дотоод хяналтын албандаа танилцуулалгүй албан тушаалын байдлаа урвуулан ашиглаж, Я.Алдар, К.Баатарчулуун нартай үгсэн тохирч бусдаас авлига авсан.
Ингээд нэр бүхий ХХК-иудын нэр дээр нийгмийн даатгалын шимтгэл төлөгч гэж найман иргэний мэдээллийг шивж оруулан 2016-2017 онуудад 40.0 сая төгрөгийн хохирлыг аж ахуйн нэгж, байгууллагуудад учруулжээ. Иймээс түүнийг Эрүүгийн хуулийн 268.2, 269.1, 270.2-т заасан зүйл ангиар шалгасан гэнэ.
5. Өнгөрсөн оны наймдугаар сарын 10-ны өдөр хилийн боомтоор 96-94 ДГА дугаартай авто машинаар 76 кг үнэт чулуу хууль бусаар нэвьрүүлснийг Дорноговь аймгийн Сайншанд сумын гаалийн байцаагч Ц. Ариунболд нь буцаан олгож давуу байдал бий болгожээ. Иймээс Эрүүгийн хуулийн 22.1.1 зүйл ангиар шалгасан байна.
6. “Их хаадын цуваа" ХХК-ийн менежер Т.Гэрэлмаа нь хувьдаа давуу байдал тогтоох, ашиг хонжоо олох зорилгоор “Эрдэнэт үйлдвэр” ХХК-ийн ажилчдад хөнгөлөлттэй үнээр худалдаж буй орон сууцыг хөнгөлөлтөд хамрагдах эрхгүй иргэдэд худалдаж компанид үлэмж хэмжээний хохирол учруулжээ. Хэргийг Эрүүгийн хуулийн 148.2-т заасан зүйл ангиар шалгасан гэв.
7. "Шинэ ёндоо" ХХК-ийн гүйцэтгэх захирал Б.Эрдэнэбат нь “Монгол ёндоо полимөр” ХХК-ийг шинээр байгуулсан байна. Ингээд “Шинэ ёндоо” ХХК-ийн нэр, гэрээ болон ажилчид, тоног төхөөрөмжийг ашиглан үйл ажиллагаа явуулж, тус ХХК-д онц их хэмжээний хохирол учруулжээ. Иймээс Эрүүгийн хуулийн 148.4, 265.2-т заасан зүйл ангиар шалгажээ.
8. Нийслэлийн засаг даргын санхүүгийн эдийн засгийн асуудал хариуцсан орлогч дарга асан Н.Батаа нь албан тушаалын байдлаа хэтрүүлсэн Нийслэлийн хөрөнгөнөөс үндэслэлгүйгээр зарцуулсан байна. Иймээс түүнийг Эрүүгийн хуулийн 263.2, 264.2-т заасан зүйл ангийн дагуу шалгажээ.
9. Батлан хамгаалахын яамны Төрийн захиргаа, удирдлагын газрын орлогч дарга х/а Ж.Алтансүх нь бусдаас хахууль авчээ. Иймээс түүнийг Эрүүгийн хуулийн 268.2, 269.1, 270.1-т тус тус заасан зүйл ангиар шалгасан байна.
10. Цагдаагийн Ерөнхий газрын төв архивын дэд дарга, дэд хурандаа Д.Цогтгэрэл нь албаны чиг үүргээ хэрэгжүүлсний хариуд бусдаас хахууль авчээ. Иймээс Эрүүгийн хуулийн 22.4.1, 22.5.1-т заасны дагуу шалгасан байна.
11. Дундговь аймгийн Засаг даргын тамгын газрын дарга Ц.Эрдэнэсүрэн нь Тамгын газраас өнгөрсөн оны зургаадугаар сарын 19-ны өдөр зарласан Зөөврийн угсардаг тайз гэрэлтүүлэг худалдан авах тендерт өөрийн нөхөр Б.Гантогтохыг хууль бусаар шалгаруулжээ. Иймээс түүнийг Эрүүгийн хуулийн 22.1.1-т заасан зүйл ангиар шалгасан гэнэ.
12. Ж.Цэндсүрэн нь Төв аймгийн Зуунмод сумын засаг даргаар ажиллаж байх үедээ албаны эрх мэдэл албан тушаалаа урвуулан ашиглаж улсад онц их хэмжээний хохирол учруулжээ. Иймээс Эрүүгийн хуулийн 263.2-т заасан зүйл ангиар шалгажээ.
13. Говь-Алтай аймгийн Нэгдсэн эмнэлгийн даргын үүргийг түр орлон гүйцэтгэгч Б.Ундрах албан тушаалын байдлаа урвуулан ашигласан бусдад давуу байдал бий болгожээ. Иймээс Эрүүгийн хуулийн 22.1.1, 22.4.3-т заасан зүйл ангийн дагуу шалГасан байна.
14. Сонгинохайрхан дүүргийн цагдаагийн III хэлтсийн мөрдөн байцаагч, цагдаагийн ахлах дэслэгч Г.Чинболд нь бусдаас хахууль авсан гэв. Иймээс Эрүүгийн хуулийн 22.4.1-т заасан зүйл ангиар шалгажээ.
15. Сэлэнгэ аймаг дахь Гаалийн газрын Алтанбулаг салбар (боомт)- ын эрхлэгч Д.Батбаатар нь албан тушаалаа урвуулан ашиглажээ. Иймээс түүнд Эрүүгийн хуулийн 263.2-т гзаасан зүйл ангиар шалгасан гэнэ.
Дээрх 15 хэрэг нь авлига, албан тушаалын холбогдолтой юм байна. Харин дараахь зургаа нь цагдаагийн албан хаагчдын холбогдсон хэрэг ажээ.
16. Замын хөдөлгөөний аюулгүй байдлыг хангах хэлтсийн Чингэлтэй дүүрэг дэх Замын цагдаагийн тасгийн зохицуулагч, цагдаагийн дэслэгч Н.Жигдийванчиг хэрэгт холбогджээ. Түүнийг Эрүүгийн хуулийн 11.4.2-т заасан зүйл ангиар шалгасан байна.
17. Хэнтий аймгийн Бор Өндөр суман дахь цагдаагийн тасгийн дуудлага хүлээн авах цагдаа, цагдаагийн ахлагч Д Мөнх-эрдэнэ нарын хэргийг Эрүүгийн хуулийн 272.2-т заасан зүйл ангиар шалгажээ.
18. Замын цагдаагийн албаны Жижүүрийн шуурхай удирдлагын мэдээлэл хүлээн авагч цагдаа, цагдаагийн ахлагч Б.Саруул-Оршихыг Эрүүгийн хуулийн 27.10.2.1-т заасан зүйл ангиар шалгажээ.
19. Сонгинохайран дүүргийн цагдаагийн I хэлтсийн цагдаа, цагдаагийн ахлагч О.Хишиг-Эрдэимйг Эрүүгийн хуулийн 11.6.1-т заасан зүйл ангиар шалгасан байна.
20. Төв аймгийн Цагдаагийн газрын мөрдөн байцаах тасгийн мөрдөгч, цагдаагийн дэслэгч Ч.Мөнхтүвшинг Эрүүгийн хуулийн 21.1.2-т заасан зүйл ангиар шалгажээ.
21. Баянгол дүүргийн цагдаагийн II хэлтсийн эргүүлийн цагдаа жолооч, цагдаагийн дэд ахлагч М.Пүрэвцэрэнг Эрүүгийн хуулийн 22.4.5, 22.5.3-т заасан зүйл ангиар шалгасан байна.
Б.УРАНЧИМЭГ /Өдрийн сонин/
Санал болгох
Сонин хачин
Уншиж байна ...