Өөрөө өөртөө тушаал гаргаж мөнгө авдаг төрийн өмчит компанийн захирал байдаг л юм байна
- schedule 2017 оны 12 сарын 6
- chat_bubble 1
Төрийн өмчийн бодлого, зохицуулалтын газраас төрийн өмчит компаниудыг цэгцлэх, 2017 онд багтаан 30 гаруй компанийг хувьчлах, чиглэл үйл ажиллагааг нь нэгтгэх, нэгдсэн удирдлагаар хангах саналаа Засгийн газарт танилцуулсан. Харин зургаан төрийн өмчит компани болох “Аж үйлдвэрийн цогцолбор”, “Монгол мах корпораци”, “Монгол тариалан корпораци”, “Монгол тамга”, “Техник спортын төв” зэрэг компаниудыг татан буулгах саналаа Засгийн газарт өргөн бариа байгаа. Энэ тухай бид өмнө нь мэдээлж байсан. Эдгээр аж ахуйн нэгжүүдийг яагаад татан буулгах болов? Татан буулгах шаардлага бий юү гэдэгт хариулт олохыг зорилоо.
Татан буулгах компаниудын жагсаалтад орсон “Монгол тамга”-ын тухайд үндсэн зорилго, чиг үүрэг нь Монгол Улсын хууль тогтоомжийн дагуу ХЗДХЯ-ны тусгай зөвшөөрлөөр тамга тэмдэг үйлдвэрлэх, түүнд нийцүүлэн хууль тогтоомжоор хориглоогүй бизнесийн үйл ажиллагаа эрхлэх явдал юм. Хувийн тамга тэмдэгийн үйлдвэрүүд хэд хэдээрээ зах зээлд түрэн орж ирж, чамгүй ашигтай ажиллаад байхад төрийн өмчит компани л хөөрхий өөрийн орон зайгаа тэдэнд тавиад өгчихлөө. Үндэсний аудитын газраас энэ төрийн өмчит компанийн санхүүгийн тайланд аудит хийсэн тайлантай танилцлаа.
“Монгол тамга” ТӨҮГ нь өнгөрсөн оныхоо зорилтот түвшингийн төлөвлөгөөгөө Төрийн өмчийн хороогоор батлуулаагүй юм байна. 2016 оны эдийн засгийн үндсэн үзүүлэлтийн зорилтот түвшинг байгууллагын саналаар нь нийт орлогыг 175.0 сая төгрөг, зардлыг 199.5 сая төгрөг байхаар тооцож, гүйцэтгэлээр үндсэн үйл ажиллагааны орлого 197.5 сая төгрөг, үндсэн бус үйл ажиллагааны орлогыг 0.2 сая төгрөг гээд нийт 197.7 сая төгрөгийн орлого төвлөрүүлж, орлогын төлөвлөгөөг 12.9 хувиар буюу 22.7 сая төгрөгөөр давуулан биелүүлсэн гэж үзсэн байна.
Товчхондоо бол 2016 онд борлуулсан бүтээгдэхүүний өртөг 33.7 сая төгрөг, борлуулалт маркетинг удирдлагын зардалд 159.0 сая төгрөг бусад зардалд 14.1 сая төгрөг гээд нийт 206.8 сая төгрөг зарцуулж батлагдсан зорилтод түвшингээс 4.5 хувиар хэтрүүлж, 9,156.8 мянган төгрөгийн алдагдалтай ажилласан байгаа юм.
Борлуулалтын орлогоо харин НӨАТ-ын тайланд 129.7 сая төгрөгөөр дутуу тайлагнасан байна лээ.
“Монгол тамга” ТӨҮГ-ын дарга Д.Рэнцэнтавхай нь өөрөө өөртөө тушаал гаргаж цалингийн урьдчилгаанд 4.1 сая төгрөг, орон сууцны зээл төлөхөд 6.1 сая төгрөг, хүүхдийн сургалтын төлбөрт 1.0 сая төгрөг, 17.2 сая төгрөгийн үнэ бүхий 2800 м2 газрыг өөрийн эзэмшилд шилжүүлж түүнийгээ авлагаар бүртгүүлсэн байх юм. Мөн нягтлан бодогчийн хүүхдийн сургалтын төлбөрт гээд 2.0 сая төгрөг олгосон гээд баримтуудыг нарийн дурдсан байна. Нийтийн албанд хувийн ашиг сонирхлоор хандаж буй нь эндээс илт байна.
Ажилтан албан хаагчдын ээлжийн амралтын цалинг бодохдоо унаа, хоолны зардалд олгосон 3.2 сая төгрөгийг дундаж цалинд оруулж тооцсон байх юм.
Санхүүгийн тайланд тусгагдсан 54.3 сая төгрөгийн авлага, 84.0 сая төгрөгийн өглөгийг тооцоо нийлж актаар баталгаажуулаагүйн дээр 3.7 сая төгрөгийн шатахууныг данс бүртгэлд тусгалгүй шууд зардлаар тайлагнасан нь баримтаар илэрсэн байна.
Энэ мэт нийт 340.2 сая төгрөгийн алдаа, зөрчил илэрснээс 132.9 сая төгрөгт албан шаардлага өгч, 30.7 сая төгрөгт төлбөрийн акт тогтоон, 176.6 сая төгрөгийн зөрчлийг цаашид давтан гаргахгүй байх зөвлөмж хүргүүлсэн байна.
“Монгол тамга” ТӨҮГ-ын удирдлага өмнө нь ч төсвийн хөрөнгийг дур мэдэн зарцуулж байж. Энэ үйлдэлд нь нийт 67.5 сая төгрөгийн төлбөрийн акт, 186.2 сая төгрөгийн зөрчилд зөвлөмж өгснийг мөн л хэрэгжүүлээгүй байна.
Энэ үйлдэл нь давтагдсан гэж байгаа. Төрийн өмч хаана, хаанаа ийнхүү үрэгдсээр байг уу, яах уу? Ийнхүү яван явсаар эцэст нь татан буулгах дээрээ л тулж байх шив дээ.
Санал болгох
Сонин хачин
Уншиж байна ...