Г.Майцэцэгт Монгол Ардын Намын даргад өрсөлдөх эрх үүсэхгүй болохыг бичгээр мэдэгджээ

МАН-ын гишүүн Г.Майцэцэг МАН-ын даргад өрсөлдөх өргөдлөө өгч нэр дэвших болсноо олон нийтэд зарласан билээ. Гэтэл түүнийг нэр дэвшүүлэх нь бүү хэл  Намын их хуралд оролцох мандат ч олгоогүй байна. Түүнийг мадатгүй хэмээн Намын их хуралд нэвтрүүлсэнгүй.  Харин яагаад мандат олгоогүй талаар  Г.Майцэцэгт Монгол Ардын Намаас дараах албан ёсны хариуг өгсөн байна.

Уг албан бичигт “Танаас 2017 оны 11 дүгээр сарын 18-ны өдөр ирүүлсэн Монгол Ардын Намын даргад өрсөлдөх тухай хүсэлтийг хүлээн авч судлан үзлээ. Монгол Ардын Намын дүрмийн 4.1.2 дахь хэсэгт намын удирдах байгууллагад нэр дэвшүүлэх, өөрийн нэрийг дэвшүүлэх, сонгох, сонгогдох эрхтэй гэж заасан байдаг.

Та Баянгол дүүргийн Монгол Ардын Намын 121 дүгээрт харьяалагддаг намын гишүүн гэдэг нь тогтоогдохгүй байгаа тул Монгол Ардын Намын даргад өрсөлдөх эрх үүсэхгүй байгааг үүгээр мэдэгдье” гэжээ. Иргэн Г.Майцэцэг нь Нийслэлийн Баянгол дүүргийн Монгол Ардын Намын 121 дүгээр үүрт огт харьяалагддаггүй болохыг үүрийн дарга Д.Цэрэндэжидийн албан бичгээр баталгаажуулжээ.