Жижиг, дунд үйлдвэр эрхлэгчдэд батлан даалттай, хөнгөлөлттэй хүүтэй, урт хугацаатай зээлд хамрагдах боломж бүрдэж байна

Зээлийн батлан даалтын сан нь Азийн хөгжлийн банкны санхүүжилтээр хэрэгжүүлж буй төслийн хүрээнд ХАС банктай хамтран ажиллахаар боллоо. “Зээлийн батлан даалтын тогтолцоог дэмжих замаар эдийн засгийг төрөлжүүлж, ажил эрхлэлтийг нэмэгдүүлэх нь” төслийн дамжуулан зээлдүүлэх гэрээнд Зээлийн батлан даалтын сан болон Хас банк 2017 оны энэ сарын 08-ны өдөр гарын үсэг зурсан байна.

Гэрээ байгуулснаар Хас банкны харилцагч жижиг, дунд үйлдвэр эрхлэгчдэд батлан даалттай, хөнгөлөлттэй хүүтэй, урт хугацаатай зээлд хамрагдах боломж бүрдэж байна.

Азийн хөгжлийн банкны санхүүжилтээр хэрэгжүүлж буй энэхүү төсөл нь зээл авахыг хүссэн боловч барьцаа хөрөнгө хүрэлцэхгүй байгаа шалгуур хангасан жижиг, дунд үйлдвэр эрхлэгчдэд 10 хүртэл жилээс хэтрэхгүй хугацаатай, 30-60%-ийн батлан даалттай, 1 тэрбум төгрөгөөс хэтрэхгүй хэмжээтэй зээлийг банк болон Зээлийн батлан даалтын сангийн хамтарсан эх үүсвэртэйгээр олгох юм байна.

Төсөлд хамрагдаж санхүүжилт авахыг хүссэн жижиг, дунд бизнес эрхлэгчид Зээлийн батлан даалтын сан болон Худалдаа хөгжлийн банк, Хас банк, Төрийн банкны өөрт ойр салбарт хандаж дэлгэрэнгүй мэдээлэл авах боломжтой аж.

 Юутай ч бизнес эрхлэгчид нэг тэрбум хүртэлх төгрөгийн хөнгөлөлттэй хүү бүхий урт хугацааны эх үүсвэрийн батлан дааллтай зээлийг авахын тулд ямар шаардлага хангасан байх ёстойг одоо танилцуулъя.

ХАНГАСАН БАЙХ ШААРДЛАГА:
• Монгол улсын хууль тогтоомжид нийцсэн үйл ажиллагаа эрхлэдэг байх,
• Сүүлийн 6 сарын хугацаанд хугацаа хэтэрсэн, чанаргүй өр зээлийн үлдэгдэл үүсээгүй байх,
• Нэгээс дээш жил үйл ажиллагаа явуулсан, санхүүгийн орлоготой байх.
• Зээл авахыг хүссэн боловч барьцаа хөрөнгө хүрэлцэхгүй байх.

“ЭХ ҮҮСВЭРТЭЙ БАТЛАН ДААЛТ” БҮТЭЭГДЭХҮҮНИЙ НӨХЦӨЛ
Зээлийн хэмжээ Нэг тэрбум төгрөгөөс хэтрэхгүй,
Зээлийн хугацаа 10 жилээс хэтрэхгүй,
Зээлийн хүү /батлан даалтын хэмжээтэй уялдана/ Жилийн 12%-15%,
Зээлийн үндсэн төлбөрөөс чөлөөлөгдөх хугацаа 24 сараас хэтрэхгүй /Бизнесийн орлоготой уялдана/,
Батлан даалтын хувь, хэмжээ Олгох зээлийн 30-60% /500 сая төгрөгөөс хэтрэхгүй/,
Батлан даалтын өргөдлийн хураамж 50.000 төгрөг /1 удаа төлнө/,
Батлан даалтын шимтгэл /батлан даалтын хэмжээнээс хамаарна/ Жилийн 1% /Батлан даалтын үлдэгдлээс тооцож, жил бүр төлнө/

"ЭХ ҮҮСВЭРТЭЙ БАТЛАН ДААЛТ" ХҮСЭГЧИЙН БҮРДҮҮЛЭХ БИЧИГ БАРИМТЫН ЖАГСААЛТ:
1. Зээл хүсэгч, хамтран зээл хүсэгчийн иргэний үнэмлэхийн хуулбар,
2. Бизнесийн товч танилцуулга,
3. ЖДҮЭ-ийн гэрчилгээ, тодорхойлолт,
4. Зээл хүсэгч, хамтран зээл хүсэгчийн оршин суугаа газрын тодорхойлолт,
5. Үйл ажиллагаа явуулах зөвшөөрөл / шаардлагатай тохиолдолд /,
6. Төсөл / төслийн зааврын дагуу /,
7. Санхүүгийн тайлан /Сүүлийн 1 жилийн/,
8. Орлого нотлох баримтууд,
9. Зээл хүсэгч, холбоотой этгээдийн нэр дээрх үл хөдлөх хөрөнгийн дэлгэрэнгүй лавлагаа,
10. Зээл хүсэгч, холбоотой этгээдийн нэр дээр хуулийн этгээдийн лавлагаа,
11. Зээл, барьцааны гэрээ, дансны хуулга,
12. Барьцаа хөрөнгийн гэрчилгээний хуулбар, итгэмжлэл,
13. Барьцаа хөрөнгийн зураг,
14. ЗБДС-н төслийн өргөдлийн хураамж төлсөн баримт,
15. Байгаль орчны ерөнхий үнэлгээ /B ангиллын салбарт хамаарагдах бол/,
16. Сангаас шаардсан холбогдох бусад баримт бичиг,
17. Бүрэн гүйцэд бөглөсөн батлан даалтын өргөдлийн маягт,
18. Бүрэн гүйцэд бөглөсөн Байгаль орчин, Нийгмийн үнэлгээний 6 ажлын хуудас

Батлан даалт хүсэгч нь ХУДАЛДАА ХӨГЖЛИЙН БАНК, ТӨРИЙН БАНКНЫ САЛБАР болон ЗЭЭЛИЙН БАТЛАН ДААЛТЫН САН-д хандаж дэлгэрэнгүй мэдээллийг авах боломжтой юм байна. Лавлах утас: 77002033; 77002031