Зудтай байгаа аймгуудын иргэдэд явуулын баг эмнэлгийн тусламж, үйлчилгээ үзүүлжээ
- schedule 2017 оны 2 сарын 9
- chat_bubble 0
Дорнод аймгийн өвөлжилт хүндэрсэн, зудын гамшгийн нөхцөлд өвөлжиж буй зорилтот бүлгийн иргэдэд төрөлжсөн мэргэжлийн эмч нарын тусламж үйлчилгээг үзүүлэх, болзошгүй эрсдэлээс урьдчилан сэргийлэх, соён гэгээрүүлэх ажлыг зохион байгуулах зорилгоор аймгийн Засаг даргын захирамж гарсан байна.
Энэхүү захирамжтай холбогдуулан Эрүүл мэндийн газар, ХХҮХ, ЭМНДХ-ийн мэргэжилтнүүд болон Бүсийн оношлогоо эмчилгээний төвийн төрөлжсөн мэргэжлийн эмч нар /дотор, шүд, эмэгтэйчүүд, хүүхэд/-ын баг хөдөөгийн 13 сумын төв, сумын төвөөс алслагдсан айл өрх мөн аймгийн төвийн алслагдсан иргэдэд хүрч үйлчлэхээр нэгдүгээр сарын 29-ний өдрөөс ажиллаж эхлээд байна.
Ажиллах хугацаандаа байгууллага бүрийн мэргэжилтнүүд тус тусын чиглэлээр ажиллаж, эмч, эмнэлгийн ажилтнууд зорилтот иргэдэд эрүүл мэндийн тусламж үйлчилгээг үзүүлэн, нөхцөл байдалтай танилцжээ.
Мөн өрхийн хэрэгцээнд шаардлагатай эмийн сангаар хангах, зудын болон гамшгийн үеийн сэтгэл зүйн тусламж үзүүлж, соён гэгээрүүлэх, сумдын ерөнхий боловсролын сургууль, цэцэрлэгийн хүүхдийн амны хөндийг эмчлэн, эрүүлжүүлэх зэрэг ажлыг зохион байгуулсан байна.
Энэхүү үйл ажиллагааны хүрээнд анхан шатны эрүүл мэндийн байгууллагуудын бэлэн байдалд хяналт тавьж, зөвлөн туслах үйл ажиллагааг зохион байгуулжээ.
Одоогийн байдлаар Цагаан-Овоо, Баян-Уул, Сэргэлэн сумдад ажиллаж 991 иргэнд тусламж үйлчилгээ үзүүлснээс 276 нь алслагдсан багийн зорилтот хүн ам хамрагдсан байна.
Тус ажиллагааны хүрээнд цаашид бүх сумдад хуваарийн дагуу ажиллах аж.
Санал болгох
Сонин хачин
Уншиж байна ...