”Велл март” худалдааны төв шатлаа

Баянзүрх дүүргийн нутаг дэвсгэр, Ботаникийн эцсийн автобусны буудлын хажууд байрлах "Велл март" худалдааны төвд өнгөрсөн шөнө 02.00 цагийн орчимд гал гарчээ. Гал бүтэн таван цаг гаруй хугацаанд үргэлжлэн өглөөний 07.00 цагт унтраажээ.

Нийслэлийн Онцгой байдлын газрын Гал түймэртэй тэмцэх хэлтсийн дарга Д.Эрдэнэбаатарын мэдээлснээр,

        -"Баянзүрх дүүргийн 12 дугаар хороо, "Велл март" худалдааны төвд шөнийн 02.50 минутад гал гарлаа гэсэн дуудлага Нийслэлийн онцгой байдлын газарт ирсэн. Дуудлагын дагуу гал унтраах аврах ангийн алба хаагчид очиход галын тархалт их байсан учраас бид хүч нэмэгдүүлж ажилласан. Өөрөөр хэлбэл, гал унтраах аврах ангийн дөрвөн ангийн долоон тасаг 11 автомашин, 70 гаруй хүний бүрэлдэхүүнтэйгээр зургаан цаг ажилласны эцэст галыг бүрэн унтраасан."Велл март" худалдааны төвийн барилга нь 46х24 хэмжээтэй талбайтай бөгөөд хоёр давхарт иргэд худалдаа үйлчилгээ явуулдаг байсан. Дөрвөн ангийн долоон тасаг 11 автомашин, 70 гаруй хүний бүрэлдэхүүнтэйгээр зургаан цаг ажилласны эцэст галыг бүрэн унтраасан.

Галын тархалт их байсны улмаас тэнд худалдаа, үйлчилгээ явуулдаг иргэдийн бүх бараа шатсан. Манай аврах ангийн алба хаагчид хорт утаатай, их халуун ялгарсан, шаталтын хэмжээ өндөр нөхцөлд ажиллалаа гэв.

Тус худалдааны төвийн нэгдүгээр давхарт "Мобиком","Капитал" банк, "Эмийн сан" байрладаг бөгөөд гурван давхарт үйл ажиллагаа явуулдаг гадаадын хөрөнгө оруулалттай 2-3 компаниуд галаас бүрэн аврагджээ.

Худалдааны төвийн гадаа цагдаагийн хамгаалалт гарсан байна.  Дотогшоо нэг ч хүнийг оруулахгүй байна.

Нэг давхарт хяналтын камер байгаа бөгөөд болсон үйл явцын бичлэгийг хяналтын байгуулгынхан үзэж, галын дүгнэлтийг мэргэжлийн байгууллагынхан гаргах юм.

Худалдаа үйлчилгээ явуулдаг нийт 60 гаруй түрээслэгч байдаг юм байна. Түрээслэгчид одоогоор 30-40 сая төгрөгийн бараатай байсан гэж мэдүүлж байгаа гэнэ.