БСШУС-ын сайд Ж.Батсуурь зөвлөх Ж.Цолмондоо ”өртэй” байх аа

БСШУС-ын сайд Ж.Батсуурь өөрийн зөвлөх болох  Ж.Цолмон  /Эрүүл мэндийн дэд сайд асан/-г дагуулан АШУҮИС-ийн үйл ажиллагаатай танилцаж, багш ажилчид, оюутнуудтай уулзаж санал хүсэлтийг сонссон нь саяхан.

Түүнчлэн АШУҮИС-ийн цаашдын бодлого, үйл ажиллагааны чиглэлийн талаар тус сургуулийн захирал Г.Батбаатарын товч танилцуулгыг анхааралтай сонсож өнгөрсөн хугацаанд хийсэн олон амжилттай ажлуудтай нь танилцсан. Тухайлбал, бүтээн байгуулалтын тухайд хамгийн том төсөл буюу түүхэндээ анх удаа их сургуулийн эмнэлэг барих том төслийг эхлүүлсэн тухай.

Япон улсын буцалтгүй тусламжаар Жайка олон улсын байгууллагатай хамтран их сургуулийн эмнэлэг барих төслийг боловсруулж, барилгын ажлыг өнгөрсөн  оны дөрөвдүгээр сард эхлүүлсэн. Улмаар ирэх 2018 оны зургаадугаар сард тус сургууль түлхүүр  гардаж авах  тухай байлаа.

Мөн өнгөрсөн жил АШУҮИС-ийнхан улсын төсвийн хоёр тэрбум, сургуулийн 1.1 тэрбум төгрөгийн хөрөнгө оруулалтаар долоон давхар номын сангаа ашиглалтад оруулсантай танилцуулж,  оюутнууд 100 хувь номын сангаараа үйлчлүүлэх боломж бүрдсэн сайхан мэдээг дуулгасан.

БСШУС-ын сайд Ж.Батсуурь улс орны өмнө хамгийн чухал үүрэг хүлээсэн боловсон хүчин бэлтгэдэг хариуцлага өндөртэй сургуулийн чадварлаг хамт олонтой уулзаж байгаадаа баяртай байгаагаа илэрхийлээд багш, ажилчдад цаашдын ажилд нь амжилт хүсч, Монголын анхны их сургуулийн эмнэлэг байгуулах,  үйл ажиллагаа явуулах хүрээнд хууль эрх зүйн орчинг бүрдүүлэх тал дээр анхаарах болно гэдгийг амласан.

Харин амлалтаа биелүүлэхийн оронд асуудал өөр тийшээ эргээд амжив бололтой.

Хариуцлагатай удирдлагатай, ажил сайтай байгууллагаар орох тэдэнд  сайхан л байсан байх даа. Монголын аль ч их, дээд сургуулиар ороход ийм сайхан орчин угтахгүй. Энэ үнэн шүү.

Гэтэл БСШУС-ын сайд Ж.Батсуурь өөрийн сулхан зөвлөх Ж.Цолмонгоо тус сургуулийн захирлын албан тушаалд томилохоор санаархан ийнхүү явж байсан болж таарч байна.  Даанч харамсмаар.

Томоохон эмнэлэг барих төслийн ажил тэдний сонирхолыг тэгж их татав уу?

Ж.Эрдэнэбатын Засгийн газрыг бүрдүүлэх үед МАН-аас Эрүүл мэндийн сайдад Ж.Цолмонг нэр дэвшүүлсэн. Харамсалтай нь бүтээгүй. "Авлигатай тэмцэх газар"-аас ирүүлсэн “ашиг сонирхлын зөрчил”-тэй гэсэн дүгнэлтээс үүдэн материалыг нь буцааж байсныг Монголын ард түмэн мартаагүй ээ. Төрийн өндөр албанд томилж болохгүй гээд дүгнэлт гаргаад байхад дахиад л нөгөө Ж.Цолмон цохиж явна.  Чадвал энд болохгүй бол тэнд гээд л болоод байна.

БСШУС-ын сайд Ж.Батсуурь ингэж махран зүтгэх шалтгаан нэгээс илүү байгаа байх. Үүнийгээ юу гэж ард түмэнд, намынхаа удирдлагад тайлбарлах юм байгаан, харж л байя.

Монголын төр тоглоом биш шүү.  Хийсэн ажилтай, өмнөө зорилготой, эрдэмтэй, сайн боловсон хүчин, чадварлаг удирдлагатай энэ сургуулиар тоглох эрх МАН-д байхгүй.