Манай олон өвчтөнд тусалсан сайхан үйл ажиллагаа болж байна

БНХАУ-ын Бээжингийн "Чоен" эмнэлэг болон манай эмнэлгийн урологийн тасгийн эрхлэгч, докторууд Нэгдсэн нэгдүгээр эмнэлгийн урологийн тасгийн залуу эмч болон АШУҮИС-ийн оюутнуудад лекц уншлаа.  Лекцийн үеэр Нэгдсэн нэгдүгээр эмнэлгийн Уролог, андорлогийн төвийн эрхлэгч Баян-Өндөртэй уулзаж тодруулга авсныг хүргэе.

-Өнөөдөр БНХАУ-ын "Чоен" эмнэлгийн хоёр доктороор ахлуулсан эмч нарын багийнхантай хамтран бөөрний дурангийн хагалгаа хийлээ.  Энэ талаар тодруулж өгөхгүй юу?

-Бид 2016 оны аравдугаар сарын 8-ны өдөр Бээжин хотод болсон Дурангийн мэс заслын чуулганд Хан докторын урилгаар оролцсон. Энэ хурал дээр Хан доктортой ярилцсаны үндсэн дээр Монгол Улсад лазерын технологи нэвтрүүлэх эмчилгээг нэвтрүүлэх талаар санал солилцоод энэ аппаратаа Монголд авч ирээд лазерын мэс засал хийх талаар тохирсон юм. Энэ ажлын хүрээнд  Монголын ард түмэнд тусалж дээрх хагалгааг хийлээ. Манай эмнэлэгт энэхүү лазерийн аппарат  бол байхгүй. Тиймээс Бээжингээс аппаратаа өөрсдөө авчраад энэхүү үйлчилгээг үзүүллээ. Энэ жилээс энэхүү хамтын  үйл ажиллагаа маань эхэлж байгаа юм. Энэ хамтын ажиллагааны хүрээнд  манай олон өвчтөнд тусалсан сайхан үйл ажиллагаа болж байна.

-Энэхүү хагалгаанд бөөрний ямар өвчтэй хүмүүс ордог бол?

-Бөөрний болон бөөрний шээлгүүрийн чулуу зэрэг ер нь бөөрөн дотор байдаг чулуунуудыг лазераар буталж гаргах хагалгааг хийдэг.

-Энэхүү хамтын үйл ажиллагаа цаашид үргэлжлэх болов уу?

-Бид цаашдаа үргэлжлүүлнэ гэж бодож байгаа. Ер нь бол бөөр, шээсний замын чулууны өвчин дахидаг тал бий. Иймд чулуу үүссэн  өвчтөнийг эмчлэх шаардлага гарна.

-Хагалгаанд орох өвчтөнүүдээ хэрхэн сонгож авав?

-Манай эмнэлгийн амбулаторийн хяналтанд байдаг хүмүүсдээ уг хагалгааг хийлээ. Хоёр бөөрөндөө болон бөөрний шээлгүүрийн олон жижиг чулуутай,  мэс засал хийх шаардлагатай өвчтөнөөс сонгосон. 

-Энэхүү аппаратаа танай эмнэлэгт үлдээх үү, буцаагаад аваад явах юм болов уу?

-Аппаратаа аваад явна.

-Манай улсын эмнэлэгт  ийм аппарат авах боломж бий болов уу?

-Бид ийм аппараттай болъё гэж мөрөөдөж байгаа. Их үнэтэй 90 мянган юанийн үнэтэй аппарат юм.