“Ябаолу” худалдааны төв нээгдэж, Монголын бизнес эрхлэгчдэд таатай нөхцөл бүрдлээ

БНХАУ-ын Бээжин хотод байрлалтай байсан “Ябаолу” худалдааны төвийг шинэчлэн Өвөр Монголын Улаанцав хотод нээх арга хэмжээ өнгөрөгч амралтын өдрүүдэд боллоо.

Энэхүү худалдааны төв нь БНХАУ-ын үйлдвэрийн чанартай бүтээгдэхүүнийг олон улсын зах зээлд нийлүүлдгээрээ танигдсан манай улсын иргэдэд болон ОХУ-ын иргэдэд танигдсан.  

Тус төвийн нээлтийн үйл ажиллагаанд Монголоос 300, ОХУ-аас 500 бизнес эрхлэгчдийн төлөөлөл, Украйн, Турк, Казахстан зэрэг арав орчим улсын бизнес эрхлэгч, худалдан авагчдын төлөөлөл Улаанцав хотноо очиж оролцлоо.

Ийнхүү Улаанцав хотноо “Ябаолу” худалдааны төвийг нээж байгаа нь газар нутаг, эдийн засгийн үр ашгийг харгалзан үзэж байгаа онцлогтой аж.

Тус хот нь Эрээн хотоос 400 км зайд оршдог. Тиймээс Монгол Улстай хамгийн ойрхон учраас Монголын иргэдэд хоёр боломж нээгдэж байгааг албаныхан тодотгож байлаа. Тодруулбал, Монголын иргэд чанартай бараа бүтээгдэхүүнийг Бээжин орохгүй худалдан авах боломж нээгдэж байгаа.

Энэхүү худалдааны төвийг нийт 2.5 тэрбум юанийн хөрөнгө оруулалттайгаар барьж байгуулжээ. Тус төвийн бараа бүтээгдэхүүн нь гол төлөв савхи, арьсан гутал, цүнх, булган дээл зэрэг төрөл бүрийн үслэг эдлэл юм. Эдгээр бараа бүтээгдэхүүн нь Орос, Монгол, Турк, Зүүн Европ, Төв Ази, Өмнөд Африк зэрэг 30 гаруй улс орноор борлуулагддаг байна. Ийнхүү арьсан эдлэл, үслэг эдлэлийг дэлхийн зах зээлд хямд үнээр борлуулдгаараа танигджээ.

Мөн Монгол Улсад ойрхон нээгдэж байгаа нь манай иргэд, бизнес эрхлэгчид нэрийн бүтээгдэхүүнээ энэхүү төвд борлуулах боломжийг олгож байгаа юм. Тодруулбал, энэхүү олон худалдааны төвд ямар ч орны бизнес эрхлэгчид худалдаа хийхэд талбайн түрээс авахгүй, зөвхөн цахилгааны төлбөр болон урсгал зардлаа л төлөх юм.

Ингээд энэхүү худалдааны төвийн нээлтийн арга хэмжээнд Монголын үндэсний худалдаа аж үйлдвэрийн танхимын /МҮХАҮТ/ Эрээн дэх төлөөлөгч Н.Энхзаяагаас авсан тодруулгаа хүргэе.

Тэрээр “Монголын худалдаа эрхлэгч, үйлдвэрлэгчид арьс, үслэг эдлэл, чанартай бараа бүтээгдэхүүнээ тус хотод борлуулах боломжтой. Энэ худалдааны төвд павьлеон авч, нэрийн бүтээгдэхүүнээ худалдаалах боломж Монголын бизнес эрхлэгчдэд нээлттэй.

Тус төвд нэг өдөртөө л гэхэд монгол, орос, хятадын 20 мянган худалдан авагчид ирж үйлчлүүлдэг гэсэн тооцоо байна. Тиймээс Монголын худалдаачид арьсан эдлэл, төрөл бүрийн үслэг эдлэл бүхий нэрийн бүтээгдэхүүнээ борлуулах боломж нээгдлээ” гэж ярилаа.

Түүнчлэн Улаанцав хотын намын хорооны нарийн бичгийн дарга Ай ли Хуа  “Ябаолу худалдааны төв нь Бээжинд үйл ажиллагаа явуулдаг байх үеэсээ л чанартай барааг олон улсын зах зээлд таниулдгаараа нэртэй байсан. Энэ ч үүднээсээ Орос, Монгол, Европын зах зээлд чухал нөлөөтэй байдаг” хэмээн онцоллоо.

Улаанцав хотод жилд хоёр сая гаруй гадаадын иргэд ирж худалдан авалт хийдэг байна. Энэ ч үүднээс жилийн орлого нь 500 сая юань хүрдэг аж ахуйн нэгж Улаанцавд олон бий гэдгийг албаныхан тодотгож байлаа.  

Улаанцав хот нь Монгол, Орос, Хятад, Европыг холбосон, худалдааны идэвхтэй бүс гэдгээрээ онцлог аж. Өвөр Монгол, Шаншы, Хэбэй гэсэн гурван аймгийн уулзварт, мөн Бээжин хотоос 350, Тяньжин, Эрээн хотоос 300 км-ийн зайд оршдог “Нэг зам, нэг бүс” хөгжлийн стратеги бүхий хот юм байна.

Энэ ч утгаараа Хятадаас Монгол, Орос, Польш, Герман, Бельги хүрэх, мөн Хятад Орос, Хятад Европын тусгай галт тэрэг дайран өнгөрдөг. Мөн тус хотын өмнө хэсгээс Хөх хот, Бугат, Лин хэ, Эзнээ хошуу, Хами, Урумчи зэрэг хотоор дайран Алматы руу аялах Хятад-Европын галт тэргийг энэ сарын 17-ноос явуулж эхлээд байгаа гэнэ. Түүнчлэн 2016 оны сүүлээр хоёр ээлжийн галт тэрэг, 2017 он гэхэд 50 ээлжийн галт тэрэг явуулахаар төлөвлөөд байгаа аж.

Монголын бизнес эрхлэгчид арьс, үслэг эдлэлийн нэрийн бүтээгдэхүүнээ худалдаалах таатай нөхцөл боломж нээгдэж байгааг онцлож байлаа.