Г.Уянга: ”Эрдэнэт”-ийн асуудал хуулийн дагуу УИХ-аар орж, нээлттэй шийдвэрлэх ёстой гэлээ
- schedule 2016 оны 11 сарын 9
- chat_bubble 1
УИХ-ын гишүүн асан, Тусгаар тогтнол-Эв нэгдлийн намын /ТТЭНН/ дарга Г.Уянга өнөөдөр мэдээлэл хийлээ. Тэрээр "Эрдэнэт үйлдвэр" ХХК-ийн хувьчлалын асуудлаар мэдэгдэл гаргаснаа танилцуулсан юм.
Уг мэдэгдэлд “Монгол Улсын төсвийн 40 хувийг дангаар бүрдүүлдэг “Эрдэнэт үйлдвэр”-ийг МАНАН бүлэглэл хууль бусаар авч, түүнийгээ Монголд ашигтай ажил хийсэн мэтээр тайлбарлаж байгааг ТТЭНН эрс эсэргүүцэж байна. Эрдэнэтэд хувьчлал болоогүй, "худалдан авалт" л болсон гэж Ерөнхийлөгч мэдэгдсэн.
Ерөнхийлөгч хэлэхдээ, "Эрдэнэтийн хувьчлал гэж хүмүүс яриад байна. Гаднын улс орон, аж ахуйн нэгжид байсан 49 хувь Монголын аж ахуйн нэгжид ирсэн. Тэгэхлээр нэр томъёоны хувьд хувьчлал биш. Хэрэв энэ хувьчлал байсан бол УИХ-аар хэлцүүлэх хуультай" гэж мэдэгдсэн. Зөвхөн энэ үгээрээ Ерөнхийлөгч Ц.Элбэгдорж өөрийгөө илчилсэн. Эрдэнэт үйлдвэрийн 49 хувь хувийн өмчид шилжсэн л бол бид "Эрдэнэтийн хувьчлал" гэж ярих эрхтэй. Хэрэв Монголын болон Оросын талын аль нь ч хувьчлал явуулаагүй, харин "зүгээр л худалдан авалт" хийсэн байхад яахаараа Эрдэнэтийн 49 хувийн ганцхан компанийн хувийн өмч болов гэдгийг Ерөнхийлөгч Ц.Элбэгдорж тайлбарлах ёстой. Ерөнхийлөгч Ц.Элбэгдорж “нэр томьёоны хувьд хувьчлал биш" гэж залилах оролдлого хийсэн ч бодит байдал дээр хувьчлалтай төстэй дээрэм болсон нь тодорхой байна.
Үндсэн хуульд зааснаар Монгол Улсад газар, түүний хэвлий, ой, ус, амьтан, ургамал болон байгалийн бусад баялаг гагцхүү ард түмний мэдэл, төрийн хамгаалалтад байна гэж заасны дагуу Монгол Улсын Ерөнхийлөгч, төрийн тэргүүний хувьд төрийн өмчит Эрдэнэт үйлдвэрийг хууль бус худалдан авалтаас хамгаалах үүрэгтэй юм. Гэтэл үүний оронд харин ч нийлж хууль бус үйлдэл хийсэн Ерөнхийлөгч огцрох ёстой гэж үзэж байна. МАНАН бүлэглэлийн хэрээс хэтэрсэн, бусармаг үйлдэл, ноёрхлын эсрэг бүх нийтийн тэмцэл эхлүүлж байгаагаа ТТЭНН мэдэгдэхийн хамт энэ тэмцэлд хамтрахыг улс төрийн бүх нам хүчин, Монголын ард түмэнд хандан уриалж байна" гэжээ.
Мөн “Эрдэнэт”-ийн асуудлыг хуулийн дагуу шийдвэрлэх боломжтой хувилбаруудыг дэвшүүлжээ. Тодруулбал “Эрдэнэт үйлдвэрт” үүссэн асуудлыг УИХ-аар дахин нухацтай, ил тод хэлэлцэж шийдвэрлэх, “Эрдэнэт үйлдвэр”-ийн 49 хувийг төрийн мэдэлд авч, 100 хувь төрийн өмчит компани болгох, 49 хувийг бүх ард түмэнд хувьцаа болгон хүртээх, нээлттэй тендер зарлан “Эрдэнэт”-ийн хувьчлалд Монголын аж ахуйн нэгжүүдийг адил, тэгш эрхтэй оролцох боломж бүрдүүлэх боломжтой гээд дээрх хувилбаруудын аль нь ч байсан хуулийн дагуу УИХ-аар орж, нээлттэй, ил тод шийдвэрлэх ёстой гэлээ.
Түүнчлэн ТТЭНН-ын дарга Г.Уянга “Монголын бүх хүний санаа зовоож байгаа энэ асуудлыг манай нам удирдах зөвлөлөөрөө хоёр удаа хэлэлцээд байр сууриа илэрхийлэх нь зөв гэж үзсэн. Бүхний нүдэнд ил байгаа, улаан цайм дээрэм хийж, хууль зөрчиж байна. Хамтарсан үйлдвэрийн асуудлыг шийдвэрлэх хуультай. Монголын талд мэдэгдэж, төрд мэдэгдсэний дараа УИХ-аар хэлэлцэж шийдвэрлэх ёстой. Бид энэ бүх асуудлаар хууль зүйн үндэслэлүүдээ гаргаж тавина. Монголын ард түмний өмчийг хамгаалах ёстой Ерөнхийлөгч энэ асуудалд гардан оролцож байгаа нь үнэхээр байж боломгүй үйлдэл. Бид тун удахгүй Ерөнхийлөгчийг огцруулах улс төрийн болон хууль зүйн үндэслэлүүдийг гаргаж тавих болно. Энэ асуудлаар хуралдаж байр сууриа нэгтгэж байгаа” гэлээ.
Санал болгох
Сонин хачин
Уншиж байна ...