Москвад гарсан томоохон түймрийг унтраах үеэр 8 гал сөнөөгч амиа алдав

Москвагийн Гольяново дүүргийн нэгэн агуулахад хүчтэй түймэр гарсны улмаас Москвагийн Онцгойгийн /МЧС/  8 гал сөнөөгч амиа алдсан эмгэнэлт явдал болов.

Түймэр өнгөрсөн пүрэв гаригийн үдшийн 6 цагт пластик эдлэлийн нэгэн агуулахад гарчээ.

Уг агуулахад хиймэл /пластмас/ цэцэг, лаа болон оршуулгын бусад эд бараа хадгалдаг байжээ. Гал түймэр  4  мянган м.кв талбайд тархаж, 1,5 мянган м.кв талбайд барилга нуржээ. Түймэрт 4 дэх  зэргийн  буюу хамгийн  хүнд зэрэг тогтоосон байна. Тэр үед түймрийн голомтонд төмөр хайлж байсан  тийм л халуун байсан тухай аврагчид ярьжээ.

Оросын МЧС –ын тэргүүн Дмитрий Пучков ажил үүргээ гүйцэтгэж байгаад  амь үрэгдсэн 8 сөнөөгчийн гэр бүл, төрөл төрөгсдөд гүн эмгэнэл илэрхийлэв.

Москва хотын дарга Сергей Собянин амь үрэгдэгсдийн гэр бүлд эмгэнэл илэрхийлж, тэдний  гэр бүлд 1 сая рублийн тусламж олгож, насанд хүрээгүй хүүхдүүдэд сар бүр тэтгэмж олгох болсон тухай мэдэгдэв.

Эх сурвалж: МОНЦАМЭ