Сангийн шинэ сайдад “Эрдэнэт”-ийн луйврыг таслан зогсоохоос ажлаа эхлэхийг хүслээ
- schedule 2016 оны 7 сарын 23
- chat_bubble 5
Сангийн сайдаар Б.Чойжилсүрэнг томилох асуудлыг УИХ-ын чуулганы нэгдсэн хуралдаанаар хэлэлцэж байна. Хэлэлцэж байгаа асуудалтай холбогдуулан гишүүд үг хэлж, асуулт тавив.
УИХ-ын гишүүн Ц.Нямдорж: -1999 онд Эрдэнэтэд будилаан гараад би ахлан шалгаж байсан юм. 2000 онд Эрдэнэтийн асуудлаар хууль гаргаж байлаа. Одоо танай яамны 3 хүн, эзэмших хүн гээд нийт 5 хүн Эрдэнэтийн 49 хувийн луйвартай наалдаад байгаа юм билээ. Үүнийг яаралтай шийдэх хэрэгтэй. Эрдэнэтийн шинэ захирлыг Засгийн газар томилох хэрэгтэй. 49 хувьтай холбоотой асуудлаа 1 дэх өдөр оруулж шийд. Энэ бол та бүхний анхны шийдвэр байх болно. Эрдэнэтийг луйвардах асуудал байхгүй. 49 хувийн ард байгаа нөхөд шуналаа татаж, зогсох хэрэгтэй. Нууц ноёнтнууд зогсох хэрэгтэй. Цагаан луйвар байж болохгүй. Луйврыг таслан зогсоохоор ажил чинь эхэлнэ шүү.
УИХ-ын гишүүн Ж.Батзандан: -Би анх Б.Чойжилсүрэн гишүүнийг Сангийн сайдаар тавьж байна гэхэд гайхсан. Мэргэжил нь автомеханикч мэргэжилтэй гэсэн. Тэгээд МАН-ын гишүүдээс асуухад “Манай Чойжилсүрэн хар ухаан сайтай хүн. Толгойтой хүн” гэсэн. Тиймээс олонхи итгэл даалгаж байгааг хүндэтгэж байна. Төсвийн төсөлд ажиллаж байсныг нь мэдэх юм. Намайг эрх баригч намын гишүүн байхад манай намынхан зээлж авсан мөнгөө өрнөөс гадуур тооцсон нь алдаатай бодлого байлаа. Төсвийн алдагдлыг бонд гаргах замаар явуулбал Монгол Улс дампуурна. Төсөв, мөнгөний бодлогыг системтэй, уялдаатай холбоотой нэгтгэн базаарай.
УИХ-ын гишүүн Б.Жавхлан: Төлбөрийн тэнцэл нэлээд алдагдалтай болсон. Төсвийн алдагдал 1.1 их наяд байгаа, ийм хүнд нөхцөлд энэ албыг авах нь.
“Эрдэнэт” саалийн үнээ хэвээр байгаа, 25-30 хувийн нөлөө үзүүлдэг. Энэ том үйлдвэрийн 49 хувийн асуудал хөндөгдөөд байгаа нь ард олонд шийдвэртэй хариу өгөх.
“Эрдэнэт”-ийн 49 хувийг Худалдаа хөгжлийн банк авсан тухай мэдээлсэн. Гэтэл арилжааны 13 банк нийлээд 500 тэрбумыг гаргах боломжгүй. Тэгэхээр нэг банк тэр хэмжээний хөрөнгө гаргахад бэрх.
Ирэх намар Дэлхийн банк, Олон улсын валютын сангаас хүмүүс ирнэ. Шинэ он гарангуут Чингис бонд, Самурай бондын төлбөрийг хийж эхлэх ёстой. Бондыг бондоор төлөхөөс аргагүй болно. Маргаашнаас эхлээд дээрх асуудлаар ажлын хэсэг байгуулж ажилдаа ороорой.
УИХ-ын гишүүн Б.Элдэв-Очир: -Энэ Засгийн газар хүнд нөхцөлд ажиллана. Эдийн засгийн хүндрэлтэй энэ нөхцөлд аливаа ажлуудыг санхүү, эдийн засгийнхаа байдалтай уялдуулж хийгээрэй. Сэтгэл гаргаж байсан хийгээрэй.
УИХ-ын гишүүн Б.Энх-Амгалан: -Санхүүгийн тогтвортой байдлаа яаж хангах вэ. Энэ талаас анхаарч ажиллах хэрэгтэй байна. Жижиг, дунд үйлдвэрлэл эрхэлж байгаа байгууллагууд дампуурлын ирмэгт байна. Арьс шир, ноос ноолуур зэрэг манай бүтээгдэхүүнийг хоёр хөрш авах хүсэл их байдаг. Үүн дээр анхаарч ажиллаарай.
УИХ-ын гишүүн Сү.Батболд: -Засгийн газруудын авсан өр, улсын өрийг тодорхой гаргаж, бодлогоо боловсруулаад УИХ-д ярих шаардлага байна. Өнгөрсөн 4 жил төсвийн хуулийг яаж зөрчиж болох вэ, сахилга батыг яаж баримтлахгүй байх вэ гэдгийг харууллаа. Төсвийн дүрэм, журам бодлогоо тогтвортой байлгаж, ярих нь зүйтэй.
Чуулганы хуралдаан үргэлжилж байна.
Санал болгох
Сонин хачин
Уншиж байна ...