1072 хувьцааны талаар худал мэдээлэл тараасан хүмүүст хариуцлага ногдуулна гэлээ
- schedule 2016 оны 5 сарын 3
- chat_bubble 0
Урт цагааны гудамжинд "Эрдэнэс тавантолгой"-н 1072 хувьцаагаа зарахаар цугласан хүмүүс хонон өнжин байсаар байна. Улаанбаатар хотын цагдаагийн газар, Цагдаагийн ерөнхий Газар, Санхүүгийн зохицуулах хороо, Үнэт цаасны хорооноос хамтран 1072 хувьцаатай холбоотойгоор худал мэдээлэл тарааж, иргэдийг төөрөгдүүлж буй асуудлаар сэтгүүлчдэд мэдээлэл хийлээ.
Санхүүгийн зохицуулах хорооны Хяналт шалгалтын газрын орлогч дарга Т.Жамбаажамц: “Эрдэнэс Тавантолгой” ХХК-ийн 1072 хувьцааг арилжиж байна, худалдан авч байна гэсэн мэдээлэл өнгөрсөн сарын 5, 6-наас эхлэн олон нийтийг хамарсан. Хүмүүс маш олноор цугларч эхэлсэн. Одоогоор энэхүү хувьцаа анх эзэмшүүлсэн хүнээс хүн рүү шилжихгүй байх нөхцөл нь хэвээр хадгалагдаж байгаа. Өөрөөр хэлбэл ямар нэг байдлаар худалдаж, шилжүүлж авсан ч өмчлөх эрх үүсэхгүй гэсэн үг. Хэдийнээс эхэлж энэ хувьцаа арилжаалагдаж, эзэмшигч нь хэдийнээс зарж үрж болдог болох вэ гэдэг асуудал одоогоор тодорхойгүй байна. Эрх бүхий, шийдвэр гаргах түвшний байгууллагуудын шийдэх хэрэг. Тиймээс хувьцаа зарж, худалдан авч байгаа гэх мэдээллүүд худлаа, хуурамч, олон нийтийг төөрөгдүүлсэн мэдээлэл юм гэдгийг дахин хэлье. Энэхүү мэдээллийг олон нийтэд хүргэсэн гэж хэлж болохоор зарим нэг брокерийн компаниудад Санхүүгийн зохицуулах хорооны зүгээс захиргааны арга хэмжээ аваад, үйл ажиллагаа явуулах эрхийг нь хязгаарласан” гэлээ.
ЦЕГ-ын Хэвлэл мэдээллийн төвийн дарга, цагдаагийн дэд хурандаа Б.Баатархүү: Цагдаагийн байгууллагаас хувьцаа худалдаж байна, худалдан авч байна гэдэг асуудалд холбогдох шалгалт хийж байгаа. Шалгалтаар хувьцаагаа зарсан, ямарваа нэг хүн худалдан авсан асуудал тогтоогдоогүй. Энэ бол худал ташаа, иргэдийн ам дамжсан яриа. Цагдаагийн байгууллагаас энэхүү шалгалтыг үргэлжлүүлна. Мөн худал мэдээллийг санаатайгаар тарааж, зохион байгуулан иргэдийг бөөгнүүлж, ямар нэг санаа зорилго агуулж байгаа хүмүүсийг олж илрүүлэх бөгөөд холбогдох хуулийн дагуу хариуцлага ногдуулна. Тодорхой үр дүн гарсны дараа эргэн мэдээлэх болно. Энэ асуудалтай холбоотойгоор иргэдээс маш их гомдол санал ирж байгаа. Амгалан тайван байдал алдагдуулах, тухайн нутаг дэвсгэрт тээврийн хэрэгсэлтэйгээ зорчиж байсан иргэний өмч хөрөнгөд халдсан тохиолдол хүртэл цагдаагийн байгууллагад бүртгэгдлээ. Энэ мэтчилэн нийгмийн дэг журам зөрчигдөх асуудал ихсэх хандлагатай байна" гэлээ.
Санал болгох
Сонин хачин
Уншиж байна ...