МАН-ын бүлэг Цэцийн дүгнэлтийг яаралтай шийдэж, сонгуулийг цаг хугацаанд нь явуулах ёстой гэлээ
- schedule 2016 оны 5 сарын 2
- chat_bubble 0
УИХ дахь МАН-ын бүлгийн хуралдаан болж өндөрлөлөө. Хуралдаанаар Газрын тухай хуулийн төсөл, Санхүүгийн зохицуулах хорооны 2015 оны тайлан болон цаг үеийн асуудлыг хэлэлцсэн байна. Бүлгийн хуралдаанаар хэлэлцсэн асуудлын талаар УИХ дахь МАН-ын бүлгийн дарга С.Бямбацогт нар мэдээлэл хийлээ.
Сонгуулийн хуулиар зургадугаар сарын 29-нд сонгуулийн санал хураалт болох ёстой. Иймд сонгууль зохион байгуулах хуулийн хугацаанд бэлтгэл ажлууд ч хангагдах ёстой байгаа. “Эрхээ эдэлж, саналаа өгч, цэвэр, шударга, тунгалаг төрөө байгуулах ажил нь хугацаандаа явагдах ёстой. Харамсалтай нь Үндсэн хуулийн Цэцийн дүгнэлт гарсантай холбогдуулан сонгуулийн төлөвлөгөөт ажил хойшлогдож байна. Тухайлбал, энэ долоо хоногт нам, эвсэл нэр дэвшигчдээ тодруулах заалттай. Тийм болохоор Цэцийн дүгнэлтийг УИХ хурдан шийдэж, шаардлагатай бол Сонгуулийн хуульд өөрчлөлт хийж, сонгуулийг цаг хугацаанд нь шударга, ил тод, олон нийтэд нээлттэй, хэрүүл бужигнаангүй явуулах ёстой гэж МАН-ын бүлэг байр сууриа илэрхийлж байна” хэмээлээ. Монголын ард түмэн дөрвөн жилд нэг удаа төр барих эрхээ эдэлдэг билээ.
УИХ-ын гишүүн О.Содбилэг "Засгийн газар Эрүүл мэнд, спортын сайдыг томилолгүй хагас жил боллоо. МАН-ын бүлгээс Эрүүл мэндийн сайдыг томилохыг удаа дараа шаардсан. Өнгөрсөн гуравдугаар сард МАН-ын бүлгийн гишүүд ХӨСҮТ-д ажиллаж, тулгамдсан асуудлыг яаралтай шийдэх шаардлагыг Ерөнхий сайдад хүргүүлсэн. Мөн АТГ-ын даргыг яаралтай томилох ёстой гэж МАН-ын бүлэг үзлээ. Сонгууль дөхсөн үед хууль хүчний байгууллагууд бүрэн бүрэлдэхүүнээрээ, улс төрөөс ангид, хуулийн хэрэгжилтийг хангаж ажиллах үүднээс шаардлага хүргүүлж байна" гэлээ.
Засгийн газраас өргөн барьсан Газрын тухай хуульд нэмэлт оруулах хуулийн төслийг судлах ажлын хэсэг байгуулсан байна. Энэ тухайд бүлгийн дэд дарга Н.Номтойбаяр "Хаврын тариалалт эхэлж буй энэ үед тариаланчдад санхүүгийн дэмжлэг чухал. Тариаланчид банкнаас зээл авах гэхээр барьцаа хөрөнгөнд тавьдаг шалгуурыг давахад хүндрэлтэй байдаг. Энэ асуудлыг зохицуулах нэрийн дор тариалангийн газраа барьцаалж банкнаас зээл авах зохицуулалтыг Газрын тухай хуульд оруулах төслийг Засгийн газар оруулж ирсэн. Газрын тухай хуулиар газар эзэмших эрхээ барьцаалах эрх зүйн орчин нээлттэй. Гэтэл өргөн барьсан нэмэлт өөрчлөлтөд давуу эрх гэсэн зөрчилтэй ойлголтыг тусгасан байна. Давуу эрхийг юу гэж ойлгох вэ гэдгийг хууль эрх зүйн хүрээнд судалж үзэх ёстой. МАН-ын бүлэг тариаланчдаа дэмжиж байгаа. Засгийн газар, Монголбанк Үнэ тогтворжуулах хөтөлбөрт 3.8 их наяд төгрөг зарцуулсан ч амжилттай хэрэгжээгүй. Хөтөлбөрт зарцуулсан хөрөнгийн эргэн төлөлт ямар байгаа, энэ мөнгөн эх үүсвэрээс тариаланчдад санхүүгийн дэмжлэг үзүүлж болох эсэх асуудлыг судлах зорилгоор ажлын хэсэг байгуулсан" гэв.
Санал болгох
Сонин хачин
Уншиж байна ...