Сайд нар санаарширч, МАН-ынхан "махийж" байна
- schedule 2014 оны 12 сарын 15
- chat_bubble 0
Шийдлийн Засгийн газрын танхим бүрдээд 10 хонож байна. Шинэ сайд нар түрүүчээсээ ажилтайгаа танилцаж эхлэв. Өмнөх Ерөнхий сайд Н.Алтанхуяг танхимдаа бүтцийн өөрчлөлт хийх сураг гарснаас хойш л яам, агентлагт ажил цалгардаж эхэлсэн. Бараг гурван сарын турш назгайрсан газрууд одоо л эзэнтэй болж буй. Сайд өөрчлөгдсөн учраас яамдад “газар хөдлөх” нь ойлгомжтой. Тэдэнд ч түрүүчээсээ “ажлын захиалга” ирж байгаа болов уу. “Нам, фракцын ашиг сонирхлыг хойш тавьж, улс эх орноо бодсон сонголт хийлээ” гэж бараг л бүх намынхан ярьж байгаа. Энэ зарчим нь бодитой эсэхийг сайд нар одоо л харуулах учиртай. Аль болох халаа сэлгээ бага хийж, нам, фракц харгалзан “бялуу” хуваах байдлаар биш, мэдлэг чадварыг нь үнэлж хүмүүсээ сонговол үлдсэн жил гаруйн хугацаанд Ч.Сайханбилэгийн зорилго биелж мэднэ. Шийдлийн Засгийн газрын 19 сайд дотроос хамгийн залуу нь болох Зам тээврийн сайд Н.Төмөрхүү, Эрүүл мэнд, спортын сайд Г.Шийлэгдамба нараас бусад нь хаа очиж мэргэжлийн, туршлагатай хүмүүс байгаа. Дэд сайдаар ч бас иймэрхүү байдлаар, мэргэжлийн, чадварлаг нь давамгайлах хүмүүсийг томилоосой гэх хүлээлт нийгэмд бий.
ДОЛООН КВОТОД 40 ОРЧИМ ГОРИЛОГЧ ТОДРОВ
Засгийн газрыг хамтран байгуулах гэрээ ёсоор АН-д тав, МАН-д долоо, “Шударга ёс” эвсэлд гурав, ИЗНН-д нэг дэд сайдын суудал ногдож буй аж. Намууд Засгийн газраа хамтарч байгуулж буй тохиолдолд нэг яамны сайд, дэд сайдыг сөөлжиж томилдог. Ингэснээр тухайн яам нэг намын “хараанд” орохгүй, харилцан хяналт тавих боломжтой гэж үздэг юм. Тэгвэл МАН-ынхан энэ зарчмаас ухарч, “Нэг намын сайд, дэд сайд томилбол үлдсэн жил гаруйн хугацаанд гар нийлж, ажил хийх боломжтой биш үү” гэсэн санал гаргажээ. Гэвч АН-ынхан энэ саналыг хүлээж аваагүй юм байна. Дэд сайдын марафон ид хүчээ авч эхэллээ. Экс гишүүд, амбийцтай залуус Төрийн ордон руу бараг жим гаргаад буй юм. Ил, далд уулзалт, яриа хэлэлцээ үргэлжилж байна. МАН-ын долоон дэд сайдын квотын төлөө 40 орчим хүн өрсөлдөхөөр удирдлагадаа хүсэлт гаргасан гэх тоо ч дуулдав. Ялангуяа МАН-ын НАМЗХ-ныхон болон Шинэчлэлийн хорооны залуус тун ч идэвхтэй горилогчийн тоонд багтжээ.
УИХ-ын гишүүн асан Ж.Сүхбаатар, МАН-ын Шинэчлэлийн хорооны бодлогын зөвлөлийн дарга Т.Аюурсайхан, Монголын хөрөнгийн биржийн захирал асан Х.Алтай, “Эрдэнэс Монгол”- ын дэд захирал асан Г.Тэмүүлэн, Нийслэлийн МАН-ын хорооны дарга Ц.Сандуй, Их засаг их сургуулийн захирлын хүү Н.Учрал, МАН-ын УИХ дахь бүлгийн Ажлын албаны дарга Ш.Раднаасэд, Зам тээврийн яамны Төрийн нарийн бичгийн дарга асан Ж.Бат-Эрдэнэ гэх мэтээр горилогчдын нэр хөвөрч байгаа юм. Ц.Сандуйгийн хувьд сайдад хүч үзээд бараагүй учраас дэд сайд дээр “уначих” хүсэлтэй яваа юм билээ.
Долоон квот байгаа учраас МАН-ын эмэгтэйчүүд зүгээр суухгүй нь мэдээж. Тэд удирдлагадаа “Намын дүрэмд заасан квотоо баримтлаарай” гэсэн хүсэлт тавьсан байна. МАН-ын дүрэмд аливаа шатны сонгуульд нэр дэвшигчдийн 25 хувь нь бүсгүйчүүд байх заалт бий. Үүгээр бол НАМЭХнд хоёр дэд сайд ногдоно. Энэ суудал дээр бүсгүйчүүдээс бас л багагүй амбийц гаргаж байгаа сурагтай. “Бишрэл”-тийн Б.Ундармаа, УИХ-ын гишүүн Б.Наранхүүгийн эгч Б.Саранчимэг, хэдийгээр өөрөө үгүйсгэж байгаа ч Уул уурхай, эрчим хүчний дэд сайд асан Б.Гарамжав, УИХ дахь МАН-ын бүлгийн Хэвлэлийн албаны дарга М.Оюунчимэг, НАМЭХ-ны ерөнхийлөгч Ж.Цогзолмаа нарын нэр илүү сонстож байна. Бүсгүйчүүдийн хувьд ЭМСЯ, ХАХНХЯ, Хөдөлмөрийн яам хавиар очих сонирхолтой байгаа юм билээ. Энэ олон горилогч дундаас МАНын удирдлага сонголт хийхдээ харах нэг гол зүйл нь хандив. Намдаа хэр зэрэг санхүүгийн дэмжлэг үзүүлж, хандив өргөсөн бэ гэдэг чухал. Ийм төрлийн хандивын ханш нэлээд хэдэн оронтой тоо хүрч өссөн сураг бас байна. Хандиваас нь гадна мэргэжил, ур чадвар, туршлагыг нь МАН-ын дарга нар харна гэж найдаж сууя. Одоогоор намууд аль яамыг хэн авахаа тохиролцоогүй учраас горилогч нар нэлээд удаан “махийх” бололтой. АН болон “Шударга ёс” эвслийн дунд ийм “зодоон” бага болж буй аж.
ЯАМД ДАХЬ ХӨДӨЛГӨӨН
Сайд нар “дор” нь аль намын, хэн дэд сайдаар ирэхийг хүлээж байх зуураа “вант улс”-даа ямар өөрчлөлт хийхээ төлөвлөж, санааширч байгаа. Намаас нь, найз нөхд өөс нь “Манай тэрийг гайгүй албанд томилоод өгөөч” гэсэн гуйлт, хүсэлт ч хөвөрч буй биз. Гэхдээ халаа сэлгээ хийлгэж, бужигнуул гэж сайд нарыг томилоогүй. Үлдсэн хугацаанд шаргуу ажилла гэж томилсон. Тиймээс тэдний олонх нь нэг их хөдөлгөөн хийхгүй байхыг хичээх нь. Гэвч танилын нүүр халуун. Өөрийг нь сайд болгосон намдаа “Үгүй” гэж хэлэх амаргүй. Батлан хамгаалахын сайд Ц.Цолмон харин ийм “зоригтон” болж мэдэх нь. Тэр “Тусгай мэргэжлийн салбар учраас ямар ч халаа, сэлгээ хийхгүй” гэсэн зарчим баримталж байгаа сурагтай. МАХН мэдээж яаж зүгээр байх вэ, хүмүүсээ санал болгоно. Ц.Цолмон сайд үүнд нь ямар хариу өгөхийг ирэх өдрүүдийн үйл явц харуулна.
Мөн Аж үйлдвэрийн сайд Д.Эрдэнэбат мэргэжлийн, бас дахин мэргэжлийн гэсэн шалгуур тавьж ажиллах гэнэ. Шинээр байгуулагдсан яам учраас тэнд хөдөлгөөн өрнөх нь мэдээж. Тиймээс тэрбээр нам, фракцын ашиг сонирхлыг хоёрдугаарт тавьж ажиллахаа онцолж байна. Аж үйлдвэрийн салбараа түшиж улс орон хөгжинө. Тэнд мэргэжлийн баг бүрдэх нь маш чухал. Энэ мэтээр сайд нар салбартаа тодорхой хөдөлгөөн хийх юм байна. Богинохон хугацаанд улс орноо өөд татах гол зорилгоо харин бүү умартаасай билээ.
С.ТУУЛ
Эх сурвалж: WWW.MONGOLNEWS.MN
Санал болгох
Сонин хачин
Уншиж байна ...