Хувийн хэвшлийн орон сууцны компаниудад шалгалт хийж 11 аж ахуйн нэгжид 2.1 сая төгрөгийн торгууль ногдуулав
- schedule 2014 оны 11 сарын 6
- chat_bubble 0
Нийслэлийн Мэргэжлийн хяналтын газрын 2014 оны хяналт шалгалтын төлөвлөгөөний дагуу газрын дэд даргын баталсан 02-02/229 дугаартай удирдамжаар нийслэлд үйл ажиллагаа эрхлэж байгаа “Хувийн хэвшлийн орон сууцны компаниудын төлбөр тооцоонд ашиглагдаж байгаа хэмжих хэрэгслийн баталгаажуулалт, ашиглалт,хэмжлийн нэгдмэл байдалд” хяналт шалгалт хийлээ.
Шалгалтад нийтийн аж ахуйн үйлчилгээний чиглэлээр тусгай зөвшөөрөлтэйгээр үйл ажиллагаа явуулж байгаа хувийн хэвшлийн 40 аж ахуйн нэгжийн харъяа ус, цахилгааны төлбөр тооцоог гүйцэтгэдэг 74 аж ахуйн нэгж, 126 айл өрхийн 445ш усны тоолуурын баталгаажуулалт, ашиглалт, лац тэмдгийн бүрэн бүтэн байдал, тоолуурын заалт авалт, үнэ тарифын мөрдөлт зэргийг шалгалаа.
Шалгалтыг “Хэмжүүр, хэмжих хэрэгслийн хэмжлийн нэгдмэл байдлыг шалгах хяналтын хуудсааргүйцэтгэж, эрсдлийн үнэлгээ хийхэд:
17 аж ахуйн нэгж -бага,
22 аж ахуйн нэгж -дунд,
1 аж ахуйн нэгж- их эрсдэлтэй дүгнэгдлээ.
Ихэнх аж ахуйн нэгжийн удирдлагуудын хэмжилзүйн хууль тогтоомжийн мэдлэг хангалтгүй, улсын баталгааны хугацаа дууссан тоолуурыг ээлжит баталгаажуулалтад хамруулах, хуучин /ашиглалтанд ороод олон жил болсон/ байруудад усны тоолуур суурилуулах ажил дутуу хийгдсэн зогсонги байдалтай болсон байгаа нь хяналт шалгалтаар харагдаж байлаа.
Одоогоор Ус сувгийн удирдах газартай усны төлбөр тооцоо хийдэг хувийн орон сууцны үйл ажиллагаа эрхэлдэг 194 аж ахуйн нэгж компани байгаагийн 45 аж ахуйн нэгж нь орон сууцны доторхи цэвэр, бохир усны шугам сүлжээний ашиглалт, засвар үйлчилгээний чиглэлээр тусгай зөвшөөрөл авсан байна.
Нийтийн аж ахуй эрхлэх тусгай зөвшөөрлийг 2012 оноос эхлэн Хот суурины ус хангамж, ариутгах татуургын ашиглалт, үйлчилгээг зохицуулах зөвлөл өгч байгаа ба 2013 оны 7 дугаар сарын 9-ний өдрийн Зохицуулах зөвлөлийн “Тусгай зөвшөөрлийн нөхцөл шаардлагыг тогтоох тухай” 18 дугаартай тогтоол батлагдан гарсан байна. Тус тогтоолын орон сууцны доторхи цэвэр, бохир усны шугам сүлжээний ашиглалт, засвар үйлчилгээний чиглэлээр үйл ажиллагаа эрхлэх аж ахуйн нэгжийн нөхцөл шаардлагад айл өрхийн тоо 750-иас дээш байх, хэрэглэгчид нь өөр өөр дүүрэгт байрладаг бол байршил тус бүрт ажлын хэсэгтэй байх гэсэн заалт орсон байна.
Энэ нь 750-иас доош өрхтэй аж ахуйн нэгжийг тусгай зөвшөөрөлгүй ажиллах боломжийг олгож, хэрэглэгчээсээ хол, өөр өөр дүүрэгт байрлах компанид хэрэглэгчийхээ дуудлагыг цаг алдахгүй түргэн шуурхай гүйцэтгэж чадахгүй, хэрэглэгчийг чирэгдүүлэх, ажлыг чанаргүй гүйцэтгэх нөхцлийг бүрдүүлж байгаа талаар тусгай зөвшөөрөлтэй аж ахуйн нэгжүүд /компаниуд/ шалгалтын ажлын хэсэгт гомдол гаргаж байв.
Мөн айл өрхийн усны тоолуур тухайн айлд байрладаг, зарим айлууд тоолуурыг хааж эд зүйлс, тавилга тавьсан, хэдэн сараар эзэнгүй байдаг тул орон сууцны компаниас сар бүр айлд орж, заалт бичихэд хүндрэлтэй байдаг байна.
Шалгалтанд хамрагдсан аж ахуйн нэгжүүдэд дараах нийтлэг зөрчил илэрлээ.
- Айл өрхүүдийн усны тоолуурын баталгаажуулалтын хугацаа дууссан
- Улсын баталгаагүй тоолуурын заалтаар усны төлбөр тооцоог гүйцэтгэдэг,
- Хэмжих хэрэгсэл суурилуулах тусгай зөвшөөрлийг Стандартчилал, хэмжил зүйн газраас аваагүй.
- Орон сууцны барилгуудын усны тоолуур барилгын зургийн дагуу айл дотор байрладаг тул зарим үед тоолуурын заалтыг үнэн зөв авч чаддаггүйгээс заалтын зөрүү гарч төлбөр тооцоо буруу бичдэг зэрэг нь “Хэмжлийн нэгдмэл байдлыг хангах тухай” хуулийн холбогдох заалтыг зөрчиж байна.
- Мөн зарим аж ахуйн нэгжүүд нь байруудын /хэрэглэгчийн/ цахилгаан эрчим хүчийг мэргэжлийн байгууллагад хүлээлгэж өгөөгүй, тусгай зөвшөөрөлгүйгээр цахилгааны төлбөр тооцоог гүйцэтгэдэг, айл өрхийн цахилгааны төлбөрийг аж ахуйн нэгжийн тарифаар тооцдог зэрэг зөрчил илэрсэн нь “Эрчим хүчний тухай” хуулийн холбогдох заалтыг зөрчиж байна.
Авсан арга хэмжээ
Шалгалтаар нийт 102 зөрчил илрүүлж, 61 зөрчлийг арилгуулж, 12 аж ахуйн нэгжид 48 заалт бүхий улсын байцаагчийн албан шаардлагыг хүргүүлэн 11 аж ахуйн нэгжид “Хэмжлийн нэгдмэл байдлыг хангах тухай”, “Төрийн хяналт шалгалтын тухай” хуулиудын холбогдох заалтын дагуу 2 сая 084.0 мянган төгрөгийн торгууль шийтгэвэр ногдуулав.
Шалгалтын явцад улсын баталгааны хугацаа дууссан 185ш усны тоолуурыг ээлжит баталгаажуулалтад хамрууллаа.
Нийслэлийн мэргэжлийн хяналтын газар
Дэд бүтцийн хяналтын хэлтэс
Санал болгох
Сонин хачин
Уншиж байна ...