Та Далий ягаан цэцгэнд “сууж”, хусны шүүс уух гэж байна уу?
- schedule 2016 оны 4 сарын 27
- chat_bubble 2
Mанайхан үнэгүй бүхэнд нугасгүй. Хөдөө гадаа явж чадахгүй, суурин ажилтай нэгэнд хусны шүүс нийлүүлдэг нэгэн бизнес хаврын цагт өрнөдөг. Учир нь энэ бизнес өрнөхийн хэрээр хусаа сүйтгээд дуусдаг.
Мөн энэхүү шүүсийг эмийн болон амтат ундаа, нарийн боов, шар айрагны үйлдвэрлэлд өргөн хэрэглэх болсонтой холбоотой байж болох юм.
Далий ягаан цэцгэнд “сууж”, хусны шүүс ууна гэж ярих хүмүүстэй ихээхэн таарч байна. Хаврын улиралд хүмүүсийн хууч өвчин хөдөлж ядарч сульдах нь их байдаг. Тиймдээ ч тэр үү юутай ч хусны шүүсэнд явна, ууна гэсэн хүний тоо олширчээ. Үүнтэй холбогдуулан уншигч та бүхэндээ бяцхан мэдээлэл хүргэхээр бэлтгэлээ.
Хусны шүүсийг ардын эмнэлэгт чийг бам өвчнөөс урьдчилан сэргийлэх, шээс хөөлгөх, үе мөчний шархираа, хаван, ангина ялангуяа уушигний мэнгэр бронхит өвчинг анагаах, махбодыг сэргээн тэнхрүүлэх зорилгоор хэрэглэдэг юм байна. Хаврын урь орж газар гэсэн хусны үндэс сэргэж эхлэх үед үндсэнд нөөцлөгдөж байсан шүүс шим дээш хөөрч навч нахиандаа ирдэг аж. Ялангуяа чийг манантай үед хусны шүүс хүчтэй хөөрөх тул “уйлах цаг” хэмээн нэрлэх нь ч бий. Хусны шүүс ялгаралт нь цас ихээр хайлж буй үетэй давхцадаг гэж байсан. Энэ процесс нь 18-20 өдөр үргэлжилдэг юм байна. Хусны шүүс авах хугацаа навч дэлгэрэхээс өмнө тавдугаар сарын эхний арван хоногоос зургаадугаар сарын 10-ны хооронд багтана гэж заасан байдаг. Энэ хугацаанд тухайн жилийн цаг агаарын нөхцөл байдлаас шалтгаалан хэлбэлзэлтэй байдаг. Шүүс ялгарч эхлэх үеийн хоногийн дундаж дулаан дөрвөн хэмтэй байна. Шүүс 12.00-18.00 цагийн хооронд илүүтэй ялгардаг аж. Иргэд хусны шүүс ууна хэмээн модыг зүсч гэмтээдэг тал бий. Гэтэл үнэн хэрэг дээрээ нэг модноос дээрх хугацаанд 80 л шүүс авч болдог гэдэг нь нэгэнт судалгаагаар нотлогджээ. Хусны шүүс нь тухайн модны нарийн бүдүүнээс шалтгаалан их бага гардаг байна. Тэгэхээр мод бүдүүн бол ялгарах шүүс нь их байна гэсэн үг юм. Шүүс авах хугацааны дунд үед чихэрлэг ихтэй шүүс гардаг аж.
Харин одоо хусны шүүсийг хэрхэн авч хэрэглэх талаар бичье.
Мод бүрт гаргах нүхний тоо, гүн, голч, түүний байрлалыг тодорхойлох нь чухал. Нэг модонд гаргах нүхний тоо нь уг мод хэдэн настай болох мөн модны бүдүүн нарийнаас хамаарна.
Модны голч ба түүнийг шүүслэх хугацааг тодорхойлсны дараа модон дээр нүх гаргах хэсгийг өнгийн шохойгоор тэмдэглэн уг модны аль талаас нь хүрч очиход тохиромжтойг бодолцоно. Шүүс тосох савыг газарт байрлуулах хэрэгтэй. Газрын гадаргуугаас 25-30 см өндөрт модны нүхийг гаргана. Нүх гаргаж өрөмдөхийн өмнө шүүс гүйлтийн хөдөлгөөн эхэлсэн эсэхийг мэдэх нь чухал. Үүний тулд модыг хадаас буюу ямар нэгэн хурц үзүүртэй төмрөөр 1-1.5 см гүн хатгаж үзэх хэрэгтэй юм байна.
Хэрэв хатгахад шүүс гарвал нүх өрөмдөх хугацаа болсныг харуулдаг аж. Өрөмдлөгийг хөнгөвчлөхийн тулд нүх гаргахаар шохойгоор тэмдэглэсэн хэсэгт 5х5 см талбайд үйсний хатуу хэсгийг цэвэрлэнэ. Цэвэрлэгээг жижиг сүхээр хийх бөгөөд модны холтосны доод нимгэн давхаргыг гэмтээхгүй байх нь чухал. Нүхийг модны ишинд эгц байхаар гар өрмөөр өрөмдөн гаргана. Өрөмдлөгийн гүн нь шүүслэлт явуулах хугацаа, модны ачааллаас хамаарна. Гарсан үртэсийг сайтар цэвэрлэнэ. Ингэж бэлтгэсэн нүхэнд зэвэрдэггүй ган буюу модоор хийсэн гуурс суулгах юм. Гуурсны хажуугаар шүүсийг гадуур нь гойжуулахгүйн тулд модны хананд сайтар шахаж байрлуулна. Гуурсны эргэн тойрныг давирхайгаар нь сайтар шавж өгөх хэрэгтэй аж. Дараа нь халуун усаар сайтар угааж цэвэрлэсэн шил савыг полиэтилен таглаагаар таглаж шүүсийг тосохоор байрлуулна. Таглаандаа 0.5-1.0 см нүх гаргахаа мартуузай. Энэ нүхний нэг үзүүрт 25-30 см урт резинэн хоолой хийж нөгөөг нь модонд байрлуулсан ховил гуурсанд хийнэ. Ийнхүү шүүрс авсан модны нүхийг өмнөх жилд гаргасан нүхнээс баруун, зүүн тийш нь 10 см-ийн зайтайгаар адил түвшинд гаргана. Нүхийг ийм байдлаар байрлуулахад дунд зэргийн бүдүүн модонд гурван жилийн турш шүүслэлт явуулж болно. 10 жилээр шүүслэлт явуулахдаа сүүлчийн хоёр жилд нүхийг урьд жилийнхээс 10 см дээр буюу дор гаргана.
Мөн огтолсон модны хожуулаас шүүс бэлтгэж бас болдог байна.
Тосгуур сав шүүсээр дүүрэх үед түүнийг авч таглаад оронд нь дараачийн ээлжийн савыг тосно. Шүүслэлтийн хугацааны хоёрдугаар хагаст үүссэн цагаавтар буюу цагаавтар хөөсийг модноос нь салгана. Нэг ёсондоо цэвэрлэх юм. Энэ нь тэнд эндомицесс верналас хэмээх мөөгөнцөр үржсэнээс болж үүсдэг аж. Шил сав хүрэлцээгүй үед паалантай хувинд шүүсийг тосч авч болно. Ингэхдээ шүүсийг давхар маарлаар шүүх хэрэг гарна. Ингэж шүүдэг маарлыг өдөрт хоёроос доошгүй удаа угааж ариутгах хэрэгтэй юм байна.
Шүүсийг дарс адил модон торхонд хийж зооринд хадгалж болно. Харин торхыг халуун усаар сайвтар угааж арцны мөчрөөр доторхи хэсгийг нь арчвал сайн гэж үздэг юм байна. Хэрэв зооригүй бол гүн нүх ухаж / 5 хэмээс бага дулаанд/ хийн хадгалж болно. Хаврын улиралд хөрсний дулаан 1-2 хэмээс ихгүй байдаг учир 8-10 хоногийн илүүгүй хадгална. Шүүс 3-5 хэмд мууддаггүй. Харин түүнээс илүү дулаанд шууд муудах тул хүнсэнд хэрэглэхийг хоригллодог.
Шүүс авах хугацаа хэдийд дуусдаг вэ?
Үүнийг хус мод өөрөө хэлж өгдөг байна. Агаарын дулаан нэмэгдэх үед модны нахиа идэвхитэй томорч нахиалах үед шүүс гадагшлахаа больдог. Энэ үед хусны шүүс тунгалаг байхаа больж булингартай гарч эхэлдэг байна. Мэдээж дээр нь гарах хэмжээ нь багасна. Ийнхүү шүүсээ авч дууссаны дараагаар нүхийг давирхайн нунжгайгаар бөглөх хэрэгтэй байдаг аж. Нунжгайг бэлтгэж очих хэрэгтэй болно. Үүний тулд танд нарсны давирхай хэрэг болно. Түүнийг саванд хийж халаана. Энэ үед давирхайд наалдсан модны холтос зэрэг нь ялгарах нь. Түүнийг авч оронд нь модны үнс хийж 15-20 минут хутгаж найруулдаг байна. Ингээд л давирхайн нунжгай бэлэн болно гэсэн үг.
Санал болгох
Сонин хачин
Уншиж байна ...